PODA SIAN RAJA SALOMO Bindu 18
Bindu 18
Angka poda taringot tu na masihaholongan na marhahamaranggi, jala masianjuan 1-24.
1Mangolooloi pinangido ni rohana sandiri do manang ise na papulik dirina, saluhut roha hapantason do na nialona. 2Ndang lomo roha ni halak na oto mida roha hapantason, sai naeng botoon ni halak sibunian ni rohana. 3Molo ro hajahaton, ro ma dohot haleaon, jala mangihut tu haurahon do elakelak. 4Aek angka na bagas do hata sian pamangan ni baoa, jala sunge na doras mardalan do mual ni hapistaran. 5Ndang jadi dingkan an halak parjahat i, ala mida sangap, manang pataluhon partigor di paruhuman. #5Mus 1:17 6Bibir ni halak na oto girgir maniroi parsalisian, jala pamanganna pajuju marsilombutan. #Poda 10:13 7Pamangan ni halak na oto mambahen hamagoanna sandiri, jala bibirna gabe jorgong tu rohana. #Poda 12:13, 13:3, 16:26 8Hatahata ni pangasung i, hira hata pargaiton, hape torus do angka bilut ni pusupusu ditondong. #Poda 26:22 9Nang halak na marlanggelangge di ulaonna, anggi ni pargadombus do ibana. #Poda 10:4 10Partanobatoan na togu do Goar ni Jahowa, marhaporusan tusi do partigor i, gabe timbul do. #Ps 18:2, 20:2, 61:4, 91:2; Poda 14:26 11Sinamotna do huta na gonting anggo di roha ni na mora, jala tudoshon parik na timbo disura rohana. #Poda 10:15 12Jolo * dipaginjang jolma i do rohana, asa ro hamagoan, matua haserepon do anggo + patujolo ni hamuliaon. #* Poda 11:2, 16:18; + Poda 15:33 13Manang ise na mangulak hata, so jolo sahat ditangihon, otona do i, jala parohon haurahon. 14Baoa partondi na pir manaon, i ma paneang parsahitonna, alai anggo partondi na gondok, tung ise ma manganjusa? #Poda 15:13, 15 15Roha na pantas mangomo parbinotoan, jala pinggol ni halak na pistar manjalahi parbinotoan. 16Silehonlehon ni jolma palumbang langkalangkana, jala i do manogihon ibana tu jolo ni halak na balga. #1Mus 43:11; Poda 17:8 17Halak parjolo mangaluhon badana parpintor di rohana, hape ro ma muse alona padapot ibana. 18Rujiruji * pasohot angka parsalisian, jala mambahen tolatola tu halak angka na gogo. #* Poda 16:33 19Haha manang anggi na niosean, ummendel do i sian huta na gonting, jala tudoshon ransangransang ni bagas na bolon do angka parsalisian. 20Ingkon sian parbue ni pamanganna pabutongon ni baoa butuhana, jala sian pinarbuehon ni bibirna sabam rohana. #Poda 12:14, 13:2 21Hamatean dohot hangoluan marpandapotan do tu dila, jala manang ise na mangaradotisa panganonna do parbuena. #Poda 13:3, 21:23; Jak 3:8 22Manang ise naung jumpangan soripada, dapotan tua, jala maruli habasaon sian Jahowa. #Poda 19:14, 31:10 23Marhurajai na pogos i mandok suara, alai kasar do ianggo na mora i maralus. 24Baoa parpedan na torop parohon hasusaan tu ibana sandiri; alai anggo aleale situtu marsilohotan do i sian hahaanggi. #Poda 17:7
Currently Selected:
PODA SIAN RAJA SALOMO Bindu 18: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.