PODA SIAN RAJA SALOMO Bindu 20
Bindu 20
Lumbalumba maradophon pargadombuson, halosohon dohot pangansion 1-30.
1Pangapasi do anggur i, jala sibahen hagunturon tuak na pang, nasa na lilu tu bagasan ni, ndang tagamon marbisuk ibana. #Poda 23:29-35, 31:5 2Tudoshon parauangon ni babiat do asupasup ni raja, manang ise na manggitik ibana, mardosa tu hosana sandiri do. #Poda 16:14, 19:12 3Hamuliaon ni baoa do i molo mandao ibana sian bada, alai manang ise na girgir manean bada halak na oto do i. 4Binahen ni biar mida ngali ni ari ndang maninggala sigurbak ulu, jadi manohunohu ibana di hamamasa ni gotilon, hape ndang adong jumpangsa. #Poda 6:6-8 5Tudoshon aek angka na bagas do sangkap ni roha ni baoa di bagasan, alai anggo baoa na bistok dapotsa do sulingkitonna. #Poda 18:4 6Lan jolma mangusaphon denggan basana sandiri, alai anggo baoa haposan, tung mahal do jumpang manang ise. 7Halak na marpangalahohon hadaulatonna, i ma partigor, martua ma angka anakna dung mate ibana. #Ps 112:2; Poda 14:26 8Raja na juguk di habangsa paruhuman, mamurpurhon nasa na jat marhitehite matana sandiri. #Ps 101:3-8 9Tung ise ma na hum mandok: Nunga tung huurasi rohangki, nunga tung ias ahu sian dosangku? #1Raj 8:46; Job 14:4; Poda 28:13, 30:12 10Mardua hatian jala mardua solup, rap hagigian ni Jahowa do duansa. #5Mus 25:13; Poda 11:1, 20:23 11Nang dakdanak tartanda do marhite sian angka parulaonna, manang na toman, manang na tigor ulaonna. #Poda 22:6 12Pinggol na tinggil marbinege, dohot mata na torang marnida, Jahowa do jumadihon duansa. #2Mus 4:11; Ps 91:9 13Unang halomohon na modommodom, asa unang gabe pogos ho, pabidok matam, asa butongan sipanganon ho. #Poda 6:10, 19:15 14Na roa do, na roa do! Ninna halak panuhor, alai ia dung tundal ibana, dipapujipuji ma dirina. 15Adong do nian sere dohot torop angka humala: Alai ulaula apala na arga sahali do angka bibir parbinotoan. #Poda 3:15 16Buat hian ma ulosna, ai halak sileban do na hinangkunganna, jala pangido ma singkoram sian ibana ala ni halak ruar. #Poda 6:1-5, 11:15, 17:18, 27:13 17Tabo do didai baoa roti sipaotooto, hape gok batu garaga pamanganna ia di ujung. #Poda 9:17 18Marsihohot do angka sangkap binahen ni tuptupan, jala mardongan partogion na pantas ulahon hamusuon. #Poda 24:6; Luk 14:31 19Manang ise sialap manaruhon hata, i ma na manjehehon hahomion; jala unang angkupangkupi halak sijubajabi. #Poda 11:13 20Manang ise na mamburai amana dohot inana, ingkon mintop palitona di na holom marimpotimpot. #2Mus 21:17 21Teanteanan na nilahutan di mulana, ndang parsaulihononhon di ujungna. #Poda 28:20 22Unang dok: Ingkon marbalos bahenonku na jati! Marhaposan tu Jahowa ma ho tagonan, asa Ibana manumpak ho. #Poda 17:13, 24:29; Rom 12:17-19; 1Tes 5:15 23Hagigian ni Jahowa do na mardua batu timbangan, jala tung na roa sahali do dasing panginsu. #Poda 20:10 24Marharoroan sian Jahowa do langkalangka ni baoa, tung ise ma jolma na mangantusi dalanna sandiri? #Ps 37:23; Jer 10:23 25Manjadi jorgong do di jolma, molo marneang ni roha ibana mangehet na badia i; jala dung sor angka bagabagana naeng dope diordioronna alus. #Pjm 5:1 26Raja na pantas marroha mangkiaphon halak parjahat, jala dibolushon di atas nasida roda pardegean. #Ps 101:8; Poda 25:5 27Palito ni Jahowa do tondi ni jolma, na manulingkit sude bilut ni pusupusu. #1Mus 2:7; Job 27:3-4, 32:8; Luk 14:35; 1Kor 2:11 28Habasaron dohot habonaron mangaramoti raja, jala hot habangsana marhitehite roha haholongon. #Poda 16:12 29Tumpal ni angka dolidoli do gogo nasida, jala * hamuliaon ni halak na tuatua do uban. #* Poda 16:31 30Pangalilitan ni bugang do manjadi pangurasan sian na jat dohot libaslibas angka na masuk tu bagasan angka bilut ni pusupusu.
Currently Selected:
PODA SIAN RAJA SALOMO Bindu 20: BBC
Highlight
Share
Copy
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.