JOB Bindu 37
Bindu 37
Ujung ni hata ni si Elihu:
Didatdati dope pajojorhon hagogoon ni Debata 1-13.
Sipaingotna tu si Job marateatehon angka halongangan binahen ni Debata marhite sian angka na tinompa 14-24.
I 1Tongon tahe pola marlobok taroktokku taringot tusi, jala ndang di ingananna rohangki. 2Ndi hamu ale, tangihon hamu ma pardorom ni ronggurna dohot suara na ruar sian pamanganna. #Job 38:1; Ps 29:3 3Tung tu toru ni sandok langit i margilinggiling suarana, jala sillam ni hilapna sahat tu angka ujung ni tano on. #Luk 17:24 4Ihut tu hilapi mardorom ronggur i, mangkuling Ibana marhite sian suara ni hatongamonna, jala laos so mansohot angka hilapna nang pe tarbege suarana. 5Mangkuling Debata marhite sian ronggurna na * songkal situtu, Ibana patupa habalgaon, angka na + so dapot hita antusanta. #* Ps 65:6, 139:14; Dan 8:24; + Job 5:9, 9:10, 36:26 6Ai Ibana mandok tu * ambolas i: Turun ma ho tu tano i! + Ibana huhut marsuru udan na por dohot udan tipotipo angka na doras situtu. #* Ps 147:16; Jes 55:10-11; + Job 38:28 7Jadi disi ma hona sahap tangan ni saluhut jolma dibahen Ibana, asa tung mananda sude jolma, * angka na tinompana i. #* Job 34:19 8Angka binatang pe masuk do tu bagasan pangaropanna be, jala manggompang di bagasan angka liangna. #Ps 104:22 9Sian bilut na buni ro habahaba, jala alogo sian purba mamboan ngali ni ari. #Job 9:9; Jes 21:1 10Marhite sian pangombus ni Debata ro ambolas, jadi pola tartutup aek na lambas i marhimpalhimpal. #Job 38:30; Ps 147:17-18 11Ibana huhut pasorat ombun i dohot udan, Ibana muse paserakkon ombun na marisi hilap. 12Ibana huhut pahusorhon angka ombun i guru panoguna, manang aha na tinonahonna dipatupa nasida do tu liat portibi on. 13Manang bahen * linsinglinsing, molo tung i haseana tu tanona, manang bahen + tanda ni basana pangonaina i. #* Job 21:9; + Ps 65:10-11
II 14Tangihon ma i, ale Job, jongjong ma ho, jala parateatehon halongangan angka na binahen ni Debata. 15Tung tagamon botoonmu ma parture ni pandokkon ni Debata di nasida! Dohot alana umbahen marsinondang ombunna marhite sian hilap? #Job 38:1-41 16Tung tagamon ma botoonmu pangantanna di ombun, ro di sude halongangan, angka na binahen ni Parbinotonasun? 17Manang botoonmu tagamon parturena umbahen gabe mohop angka pangkeanmu, molo Ibana mamohopi tano i hinorhon ni alogo sian dangsina? 18Tung ho ma donganna pahembang langit parginjang i, asa hira songon sorminan na tinuang idaon? #2Mus 24:10 19Ho ma huroha mamodahon tu hami manang aha sidohononnami tu Ibana; ai ndang tarpajojor anggo hami dibahen haholomon ni rohanami! 20Adong do ulaning na palumbahon tu Ibana molo naeng mangkuling ahu? Manang tung adong ma jolma na mangido naeng mago ibana? 21Ianggo nuaeng tutu, ndang dapot jolma i idaonna sondang ni mata ni ari, atik pe marsinondang di langit i, alai hinungkupan ni ombun do, hape ia ro alogo pasisihon, marsinondang ulahanna. #Job 37:11 22Sian purba do i binsar hira songon sere idaon — humaliang Debata do tongtong hamuliaon na songkal sahali. #Ps 104:1 23Ianggo Ibana Nasunhinagogo i, ndang tagamon dapot hita, ai na songkal sahali do hagogoonna: Alai anggo uhum dohot hinagodang ni hatigoranna, ndang tagamon rupaonna. #Job 28:12-28 24Dibahen i tama ingkon dihabiari jolma Ibana, ai ndang marnida bohi ni saluhut jolma angka na bisuk Ibana. #Job 34:19
Currently Selected:
JOB Bindu 37: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.