JOB Bindu 36
Bindu 36
Udutna:
Patar do sogot hatigoran ni Debata tu halak parjahat dohot tu halak na paubahon rohana 1-15.
Hahonaanna tu si Job 16-21.
Taringot tu hatongamon ni Debata 22-33.
I. 1Dung i diulahi si Elihu muse hatana mandok: 2Paima ahu satongkinnari, asa huajari ho, ai adong dope hata sido sidohononku mamintori Debata. 3Sian na dao ma alaponku * parbinotoanku laho manariashon habonaron ni Sitompa ahu. #* Job 32:6 4Tongon tahe, ndada sipaotooto angka hatangkon, ai halak * na sun marparbinotoan donganmu mangkatai. #* Job 37:16 5Ida ma, Nasunhinagogo do nian Debata, alai ndang ditulak Ibana manang ise, na songkal sahali Ibana marhite sian gogo ni hapistaranna. #Job 8:20, 9:4, 10:3, 12:13 6Ndang leleng pangoluonna anggo halak parjahat i, alai patingkosonna do uhum tu halak na dangol. #Ps 72:4, 12, 82:3 7Ndang padaoonna * matana sian halak na bonar, lam dipahundul do nasida tahe tu habangsa rampak dohot + angka raja ro di salelenglelengna, asa tung timbul nasida. #* Ps 33:18, 34:16; + 1Sam 2:8; Job 5:11; Ps 113:7-8; Pgk 5:10 8Alai tung sura tarihot nasida dohot rante, jala tarhurung di bagasan rante pardangolan. #Job 13:27; Ps 107:10-12; Jes 28:22 9Jala dipabotohon tu nasida pambahenanna na jahat i dohot angka dosanasida i, ala naung pinatimbotimbona dirina. 10Asa Ibana * patinggilhon pinggolnasida tumangihon pangajaran, mandokkon nasida paubaonna rohana sian + hajahaton. #* Job 33:16; + 1Joh 1:9-10, 2:16, 3:10 11Molo tung ditangihon nasida pinsangpinsangna, jala * dipaunduk rohana, jadi rasirasa matua nasida sai marhasonangan nasida bahenonna, jala marlas ni roha. #* Job 21:13; Ps 2:11; Jes 1:19 12Alai molo so ditangihon nasida, * mate garsang nasida bahenon ni podang, jala tos hosanasida + so sanga dapotan roha. #* Job 33:8; Ps 7:13; + Job 4:20-21, 35:16 13Alai marrimas anggo halak na marroha pangansion, ndang marhuraja nasida, molo Ibana mangarante nasida. 14Jadi ingkon tos hosanasida i tagan di * haposoonna dope, jala ngolunasida di tongatonga ni halak pangalangkup. #* 5Mus 23:17; 1Raj 14:24; Job 21:21, 22:16 15Alai dipalua Ibana do anggo halak na * dangol sian pardangolanna, jala dipatinggil + pinggolnasida marhite sian hagogotan. #* Job 5:11; Ps 72:12; + Job 36:10
II. 16Suang songon i paluaonna nang ho sian godung hagogotan, taripar tu * halambason na tongtong, jala paradeonna ** mejam gok dohot + sipanganon na tabo. #* Ps 4:2, 18:20; ** Ps 23:5; + 1Mus 27:28, 39; Jes 25:6, 55:2 17Alai molo tung gok roham panguhumon ni halak parjahat, jadi laos uhum dohot torutoru manginona tu ho. #Job 36:12-13 18Unang tung taiton ni rimas ma ho tu * hajunghaton, jala unang dipaotooto roham ho, tung tarpalua ho dirim marhite sian + godang ni partobus. #* Job 34:37; + Job 33:24 19Tung angguhanggukmi ma tagamon paluahon ho sian hagogotan, manang hinajugulmu mangasahon gogom sandiri. 20Dibahen i unang ma halungunhon haroro ni borngin, na papurpurhon angka bangso sian ingananna hian. 21Jaga ma dirim, asa unang laho roham tu pingkiran na so marguna; tung tagonan ma mate ho pangidoonmu, sian na pataontaon pardangolan!
III. 22Ida ma, * timbul do Debata di bagasan hagogoonna! Tung ise ma + Pangajari tudoshon Ibana? #* Ps 147:5; + Ps 25:8-12, 32:8 23Tung ise ma mangaturhon tu Ibana dalan sidalananna? Jala tung ise ma na hum mandok tu Ibana: Hageduhon do i na binahenmu? #Job 34:10, 13 24Tagonan ingotonmu parturena patimbulhon pambahenanna na pinapujipuji ni halak. #Job 33:27, 35:10; Ps 104:33 25Luhut jolma manisia marlomo ni roha marnidasa, pola ingkon mandaodao jolma na gale i manatap tusi. #Job 26:14 26Ida ma, na timbul sahali do Debata, ndang dapot dongdongan ni rohanta, bilangan ni angka taonna pe, ndang tarsulingkit hita. #Ps 90:2, 93:2, 102:27; Dan 6:26 27Ai Ibana manait tu ginjang uap ni angka aek, na marpungu muse gabe udan, na manetehi sian ombunna. #Job 5:10 28Manetehi tutu sian angka ombun parginjang marsagihon tu torop jolma. #Job 37:12-13 29Lam parsarak ni ombun dohot pardorom ni suara di bagasan undungundungna ma dapot jolma tagamon antusanna? #Job 37:2; Ps 18:12, 104:3 30Ida ma, hira marrimberimbehon hilap Ibana, jala * dihungkupi Ibana dirina marhite sian lung ni laut. #* Ps 18:15-16, 77:19-20 31Ai marhite angka i Ibana manguhumi angka bangso, huhut mangalehon sipanganon marlobilobi. 32Ibana mamegang hilapi marhite sian tanganna, duansa, jala dipaborhat do i manoro angka alona. #Ps 104:2, 4 33Suara ni ronggurna palumbahon harorona, gari angka pinahan marboaboa do taringot tu harorona.
Currently Selected:
JOB Bindu 36: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.