JOB Bindu 30
Bindu 30
Udutna:
Dipajojor si Job hinamagona nuaeng, tole angka jolma mangelesi ibana alani 1-15.
Tole dohot Debata ndang ditangihon alualuna, hira musuna ibana dibahen 16-31.
I. 1Hape anggo nuaeng halak na umposo sian ahu marengkelihon ahu, ianggo amanasida nian na jolo maleahu huetong bahen dongan ni biang angka na mangadu birubirungku. #Job 29:8-11 2Aha ma gunana di ahu nang gogo di tangannasida i, ai ndang sanga nasida sarimatua. 3Nasida angka na marniang binahen ni hahurangan dohot haraparon, pola laho manggagat tu tano bangkalbangkal, tu tano halongonan dohot na niulang sian na robi dope. 4Nasida angka na mansalong siarum horsik di holangkolang ni ramba, jala mangalului siarumpepe bahen panganonnasida. 5Tarliplip do nasida sian tongatonga ni jolma, jala disurakkon do nasida songon halak panangko. 6Ingkon maringan nasida di bagasan lombang sapsap bire, di bagasan liang ni tano i dohot di bagasan jaringjing ni dolok batu. 7Disi do nasida morongorong di holangkolang ni romporompo, jala manggompang nasida di toru ni tadatada. 8Angka anak ni halak na oto do nasida, huhut angka anak ni lapaslapas, pola batahi dibahen pabali nasida sian tano i. 9Hape anggo nuaeng gabe ende aling ahu di nasida, jala sirehereheonna. #Job 17:6; Ps 69:13; And 3:14, 63 10Marbiasbias nasida mida ahu, pola dipaholang dirina sian ahu, jala ndang moralangalang nasida mamursihi bohingku. #Mat 26:67, 27:30 11Ala naung dipahondur Ibana * tali ni siorhu, jala tarjepol ahu dibahen, gabe dibuang nasida kokang na di jolongku. #* Job 29:20 12Di * siamunhu hehe do angka halak gambalgambal jala dionjar pathu, jala dibungbungi + dalan hamagoan dompak ahu. #* Ps 109:6; Sak 3:1; + Job 19:12 13Dilohai nasida do dalanku laho pagandahon hamagoanku, ndang pola adong na mangurupi nasida. 14Hira sian bungbung na ruak nasida ro manahopi ahu, pola mardorop pangarongomna. 15Angka hinamago manahopi ahu humaliang, nunga dipurpurhon hasonanganku hira marhite sian habahaba, jala nunga salpu mamolus hadoharonku * songon ombun. #* Job 7:9; Jes 44:22
II. 16Ala ni * malampot do ateatengku di bagasan huhilala, nunga tung ditangkup angka ari pardangolanku ahu. #* Ps 42:5 17Bornginna i ditura do holiholingku, hira dihishis sibukku huhilala, jala ndang mansohot panggirikna. 18Binahen ni panggagat ni sahithu mubauba do parsisikku hira pangkeanhu, jala disongkik ringkorang i ahu songon parrungkungan ni bajubaju. #Job 7:5, 16:15 19Nunga disampathon Ibana ahu tu bagasan gambo, gabe samak ahu tu orbuk dohot tu sirabun idaon. 20* Mangangguhi ahu nian tu Ho, hape ndang dialusi Ho ahu, tongtong ahu jongjong di jolomi, jala dipanotnoti Ho ahu. #* Job 19:7, 31:35; Ps 22:3 21Nunga tung marbalik Ho gabe musu na songe di ahu, mangasahon gogo ni tanganmu do Ho mangalo ahu. #Job 16:9; Jes 63:10 22Nunga tung dihindat Ho ahu laho papurpurhon tu alogo, tung didugudugu Ho do hadirionku. 23Ai nunga huboto hian naeng boanonmu ahu tu hamatean, tu * bagas partumpuan ni nasa na mangolu. #Heb 9:27; * Pjm 12:3 24Alai tahe, laho ompas jolma i nda diojakkon dope tanganna, manang ia ro hinamagona nda mangangguhi do? 25Nda tangis do ahu mida halak na marhinamagoi? Nda maras do rohangku mida halak na pogos? #Ps 35:13; Rom 12:15 26Ai sai maimaima do ahu di na denggan, hape jea do na ro; * mangkirim ahu di hatiuron, hape haholomon do na ro. #* Jes 59:9; Jer 14:19 27Sai hira gara do butuhangku huhilala, ndang olo marpasadian, nunga tung dirampok angka ari hinamago ahu. #Job 30:16 28Pola marbirong dagingku ahu mardalani, alai ndada binahen ni parngiar ni mata ni ari; hehe do ahu humasungsang di bagasan luhutan ni halak, huhut mangangguhi. 29Nunga tung gabe dongan ni ulok naga ahu, gabe aleale ni pidong unto. #Mik 1:8 30Marbirong do sisikku pola angka luak, jala mosok holiholingku dibahen mohopna di bagasan. #Ps 102:3, 4; And 4:8, 5:10 31Ala ni muba suara ni hasapingku gabe andung, jala suara ni tulilangku gabe suara partatangison. #Ps 30:12; And 5:15; Am 8:10
Currently Selected:
JOB Bindu 30: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.