JOB Bindu 31
Bindu 31
Ujung ni panariason ni si Job:
Dipajojor disi habontoron ni parangena 1-23.
Biasbias ni rohana mida pardebataon sileban, holong ni rohana mida musuna dohot basarna martamue 24-34.
Marpangatauan ibana tu habonaron ni Debata 35-40.
I. 1Nunga huhomat matangku, tung na so tupa mamereng tu boruboru na marbaju. #Mat 5:28-29 2Jadi ninna rohangku, aha ulaning tohaphu lehonon ni Debata sian ginjang, manang partalianku bahenon ni Nasunhinagogo sian banua ginjang? 3Tung so tama ma mangonai hamagoan tu halak pargeduk, manang hinamago tu halak siula hajahaton? 4Tung na so diida Debata ulaning angka dalanku, jala na so dibilangi ulaning sude langkalangkangku? #2Kron 16:9; Job 23:10; Ps 139:2-5 5Tung sura naung marpangansi pangalahongku, jala pathu manilu manahopi, sipaotooto. 6Ibana nian * mandasing ahu di bagasan timbangan na sintong, asa Debata mananda habontoronku. #* Dan 5:25 7Tung sura naung * manimbil langkangku sian dalan hasintongan, jala dipaihut rohangku lomolomo ni matangku, jala lohot di tanganku haurahon: #* 5Mus 13:11; Ps 7:4-6 8+ Ahu pe manabur, ingkon halak na asing manganhon, jala suansuananku, ingkon butbutonna do rap dohot uratna. #+ 3Mus 26:16; 5Mus 28:38; Mik 6:15 9Tung sura naung tarpaoto rohangku olo ahu elaelaon ni jolma ni halak sileban, jala mangonggop ahu di lambung pintu ni alealengku: 10Jadi ingkon jolmangku manduda di halak na asing, jala halak na asing mangalangkup nasida. #5Mus 28:30; 2Sam 12:11 11Binoto ma i haurahon do i antong, jala hajahaton na patut uhumon ni panguhum. #1Mus 38:24; 3Mus 20:10; 5Mus 22:22 12Ai api do i na manggagat sahat ro di banua toru, jala saluhut na huomo mosokkononna tama. #Poda 6:27-29; Jak 3:6 13Tung sura naung hupametmet uhum tu naposongku baoa manang boruboru, jumpa marsalisi nasida dohot ahu: #Job 22:6-9; Eps 6:9 14Tung aha ma bahenonku tung sura hehe Debata, tung sura marlulu Ibana, aha ma tagamon alushu tu Ibana? 15Nda laos Sitompa ahu di bagasan butuha ni dainang, manjadihon nang ibana? Nda laos Sasadasa do manjadihon hami duansa di bagasan bortian? #Job 34:19; Poda 14:31; Mal 2:10; Eps 6:9 16Tung sura naung hujua pangidoan ni halak na pogos, jala lotop hubahen mata ni parompuan na mabalu. #Job 29:12 17Jala sasada ahu manganhon rotingku, so dohot dakdanak na tading di lampin manganhon sian i. 18Ai olat ni haposoonku magodang ibana rap dohot ahu, * hira sisada ama, jala sian butuha ni dainang ahu mangiringiring na mabalu i. #* Job 29:16 19Tung sura naung huida halak mago marsangkot bulung, manang halak na pogos so marbulusan. #Job 24:7; Jes 58:7 20Tung sura so gontingna * mamasumasu ahu ala so pinalas dagingna sian imput ni birubirungku. #* Job 29:13 21Tung sura naung mangonai tanganku tu dakdanak na tading di lampin, ala mangasahon panolongion ahu di partungkoan. #Job 29:7 22Ingkon tanggal abarangku sian sasapna, jala tanganku sirang sian ringringna! 23Ai matua ahu, sai huhabiari do torutoru ni Debata, jala ndang manahan ahu moradophon hatongamonna. #Job 32:22
II. 24Tung sura sere hubahen haposan ni rohangku, jala hudok tu * sere palangki: Ho do arop ni rohangku! #Mrk 10:24; 1Tim 6:17; * Ps 52:9 25Tung sura mangapian rohangku naeng marsinamot godang ahu, jala naeng jumpangan pangomoan godang tanganku. #Ps 62:11 26Tung sura naung dung hutailihon mata ni ari jumpa marsinondang arian, manang bulan jumpa di rondangna situtu mardalan. #5Mus 4:19 27Manang tung dung tarpaoto rohangku di sibunian, tung olo ahu maniop * tanganku manombahon tusi: #* 1Raj 19:18; Hos 13:2 28Binoto ma i hajahaton na tama * uhumon ni Panguhum do nang i, ala mansoadahon + Debata na di ginjang i do ahu disi. #* 5Mus 17:2-7; Job 31:11; + Job 16:19, 31:2 29Tung sura naung martilla ahu mida hinamago ni musungku, manang marolopolop ahu molo marjea ibana. #Ps 35:13; Poda 24:17 30Alai tahe gari langitlangit ni pamanganku, ndang dung huloas mardosa, mangidohon mate hosana marhite sian bura. #Mat 5:44; Rom 12:14; 1Ptr 3:9 31Balik do jolma isi ni undungundungku mandok: Didia do adong jolma na so dung bosur mangan lompan binahenmi! #Job 31:17 32Halak dagang pe, ndang dung hupasombu marmalam di alaman, sai talak do pintu ni jabungku didapot halak pardalandalan. #1Mus 19:2; Pangh 19:15; Heb 13:2; 1Ptr 4:9 33Tung sura naung huhungkupi pangalaosionku, mangihuthon pangalaho ni jolma, manang hutabunihon hajahatonku, di bagasan andorangku. #1Mus 3:10, 12; Hos 6:7 34Ala na mabiar ahu mida situan na torop i, jala tahuton ahu mida haleaon ni halak marompuompu, umbahen mauhom ahu, jala ndang ruar sian jabungku. #2Mus 23:2
III. 35Aut adong ma nian sahalak na olo pangalualuanku! Na ida ma, tanda tanganhon; sai na alusan ni Nasunhinagogo i do ahu! Aut di ahu nian surat pangaluan na sinurat ni alongku! #Job 23:3-7; Kol 2:14 36Tongon tahe pampehononku do i tu abarangku, jala talitalihononku do i songon bulangbulang. #Jes 9:5, 22:22 37Papataronku ma tu Ibana bilangan ni langkalangkangku, jala marpangalaho raja ahu mandapothon Ibana. 38Tung sura maungaung tanongku dompak ahu, manang rap tumatangis angka baruranna. 39Tung sura naung hupangan gogo na so magargar, manang naung dung hupangan mudar ni anak gajian. #Job 24:11; Jer 22:13 40Denggan ma tubu di ahu sihupi singkat ni eme, jala unak singkat ni jagung! — Marujung ma hata panariason ni si Job.
Currently Selected:
JOB Bindu 31: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.