JOB Bindu 28
Bindu 28
Udutna:
Godang do nian na buni sian na tinompa dapot jolma risihonna 1-11.
Alai anggo apala na ummarga i, i ma hapistaran i, ndang dapotsa manang taromosa nang marhite sian luhut arta di tano on 12-19.
Marharoroan sian Debata sambing do hapistaran na sintong i 20-28.
I. 1Adong do panombangan di perak jala pangaragaan anggo di sere. 2Bosi pe sian tano do binuat, jala dilala ia batu gabe tombaga. 3Gari haholomoni marujung do dibahen jolma i, sahat ro di sude tampahanna disulingkit rohana do, nang batu haholomon dohot linggoman ni hamatean. 4Marbuhalbuhal disi sada sunge sian tano na so dung niumbolan ni pat ni jolma, tartantan nasida tusi, gaunggaung holang sian jolma. 5Sada do tano i, sian sisikna do ruar sipanganon, hape anggo partorunai marbalik do dibahen api. #Ps 104:14 6Jumpang do disi batu na marisi mata intan Sapir, huhut marisi sere marhimpalhimpal. 7Ndang dipabotoboto pidong panoro dalan laho tusi, jala ndang dapot mata ni lali piuan idaonna. 8Ndang dung diumboli pat ni * binatang ingananna, jala ndang dung dibolus singa. #* Job 41:25 9Mangonai tanganna tu dolok batu, jala marbalik ojahan ni angka dolok dibahen. 10Tolpus do dituhil angka dolok batu bahen dalan ni aek, luhut arta na arga dapot diida matana do. 11Ditambak do angka sunge, asa unang mimir nanggo santetek, jala na buni sahali diparuar tu hatiuron. #Job 28:4
II. 12Alai anggo hapistaran i, sian dia ulaning jumpang? Jala didia do ulaning inganan pangalapan parbinotoan? #Poda 2:6; Jak 1:5 13Ndang diboto jolma na gale i asamna, jala ndang tagamon jumpang di bagasan * luat ni halak na mangolu on. #* Ps 27:13; Jes 38:11 14* Lung i mandok: Ndang di bagasan ahu ibana; jala laut i mandok: Ndang di lambungku ibana. #* 1Mus 7:11, 49:25 15Ndang dapot tuhoron ibana, nang marhite sian sere na pita, jala asam na i ndang dapot timbangon marhite sian perak. #Poda 3:14-15, 8:10-11 16Ndang tartimbang ibana dohot * sere sian Opir, manang mutiha na arga, manang mata intan pe. #* 1Raj 9:28 17Ndang tartimbang ibana dohot sere manang simata landus pe, jala ndang tartungkar nang marhitehite ulaula sian sere. 18Ndang pola etongon humala dohot mata intan na songkal martimbangkon ibana; molo maruli hapistaran manang ise ummarga do i sian * mutiha. #* Poda 3:15, 8:11, 20:15, 31:10; Mat 13:45 19Ndang tartimbang tusi nang * mata intan Topas sian Kus, jala + sere na pita pe ndang tartimbang tusi. #* 2Mus 28:17; Pgk 21:20; + Job 28:16
III. 20Antong marharoroan sian dia ulaning hapistaran i? Jala didia ulaning jumpang inganan ni parbinotoan? #Job 28:12 21Ai holip do i sian mata ni saluhut na mangolu, jala buni do i nang moradophon pidong angka na martongatonga langit. 22Banua toru dohot hamatean mandok: Nunga nian dibege pinggolnami lingona. #Job 38:17; Ps 9:14; Pgk 1:18 23Debata sambing tahe mangantusi dalanna, jala Ibana umboto ingananna. #Poda 2:6, 8:22-31; Jak 1:5 24Ai Ibana manatap sahat ro di angka ujung ni tano on, Ibana marnida saluhut na di toru ni langit. 25Uju na binahenna timbangan ni alogo, jala dipaojak * parbalohan ni angka aek. #Ps 135:7; * Job 26:10, 38:10 26Uju na binahenna patik di udan, dohot dalan di porhas. #1Mus 2:5; Job 38:25 27Uju i nunga Ibana martiruan tusi, jala dipapatar, jala dipadiri ojahanna huhut * disulingkit. #Poda 3:19-20; * 1Mus 1:31 28Alai anggo tu jolma i songon on do hatana: Ida ma, * biar mida Jahowa, i do hapistaran, jala + sumurut sian hajahaton, i do parbinotoan. #* Ps 111:10; Poda 1:7; Pjm 12:13; + Job 1:1
Currently Selected:
JOB Bindu 28: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.