JOB Bindu 27
Bindu 27
Udut ni panariason ni si Job:
Tongtong do diondolhon habontoronna 1-7.
Ingkon monang di ujung do halak parroha na bontor, ingkon mago do anggo halak parjahat 8-23.
I. 1Dung i didatdati si Job ma angka panariasonna, ninna ma: 2Songon sintongna mangolu Debata naung * padaohon sian ahu hatigoranku, mangolu dohot Nasunhinagogo i naung mambahen margudompong rohangku. #* Job 34:5 3Ai saleleng simpan dope hosangku di bagasan ahu, jala hosa na sian Debata di bagasan igungku. #1Mus 2:7; Job 32:8; Poda 20:27; Jes 2:22 4Na so tupa bibir ni pamanganku mangkatahon hageduhon manang dilangku paboahon sipaotooto. #Ps 34:14 5Dao ma sian ahu tung tolopanku hatamuna; rasirasa tos hosangku, ndang tagamon sumurut sian ahu habontoronku. #Job 17:9 6Sai marsitiopan do ahu di hatigoranku, jala ndang paluaonku; ndang pola marlobok taroktokku taringot tu ariaringku nanggo sada. #Ul 24:16; 1Kor 4:4 7Ingkon musungku nian balik tartudu songon halak parjahat, jala songon halak pargeduk ia alongku.
II. 8Ai tung aha ma sihirimon ni halak parjahat, nang pe dipagukguk artana, molo ditait Debata hosana? #Luk 12:20 9Tung tagamon tangihonon ni Debata ma angguhanggukna, molo ro hagogotan tu ibana? #Ps 18:42; Jes 1:15; Jer 11:11; Hes 8:18; Mik 3:4; Joh 9:31 10Tung tarbahensa ma marlas ni roha mida Nasunhinagogo i, manang martangiang tongtong tu Debata? #Job 12:4, 22:26 11Ahu ma nuaeng mangajari hamu taringot tu pambahenan ni Debata, ndang porsoonku tu hamu sangkap ni Nasunhinagogo i. #Job 10:13, 23:10 12Hamu sandiri pe, nunga nian diida hamu luhutna i, boasa sai datdatanmuna mamingkiri na so marguna? #Job 15:17 13I ma jambar na pinatongon ni Debata tu jolma parjahat, jala teanteanan na pinatontu ni Nasunhinagogo i tu halak pangarupa. #Job 20:29 14Molo tamba torop ni angka anakna, sude do i panganon ni podang, jala pahompuna hurangan sipanganon. #Job 21:19; Ps 37:25 15Ia pasipasina na teba i, i ma bonduton ni begu antuk, jala ndang mananangisi parompuan angka na mangkabaluhon ibana. #3Mus 26:25-26; Ps 78:64; Jer 14:12, 15:2, 18:21, 22:18 16Nang pe dipagukguk ibana perak songon orbuk godangna, jala diparade pangkeanna songon tano liat godangna. #Sak 9:3-4 17Na ripe paulina do di ibana, alai * halak partigor do maruloshon, jala halak na so marpipot marbagi perakna. #* Poda 13:25, 28:8; Pjm 2:26 18Dipauli pe bagasna songon ngitngit, jala songon pondokpondok na pinauli ni halak parladang. 19Mamora ibana laho modom, hape ndang be ulahanna; molo dipabidok matana, hape ndang disi be ibana. #Ps 49:18 20Songgotsonggot ni hamatean manahopi ibana songon aek magodang, jala luahonon ni habahaba poting haliung ibana bornginna i. #Job 18:11, 20:25 21Boanon ni * habahaba sian purba ibana, jala purpurhononna ibana dao sian ingananna. #* Jes 27:8; Hes 17:10 22Debata manginonahon luhutna i tu ibana, jala ndang moralangalang, ingkon maporus ibana moradophon tanganna. 23Jadi martilla ni roha ma halak mida ibana, pola martopaktopak tangan jala diasingkon ibana sian ingananna. #And 2:15
Currently Selected:
JOB Bindu 27: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.