JOB Bindu 26
Bindu 26
Panariason ni si Job paduahalihon: Dung jempek ditulakkon hata ni si Bildad, dipatorang ma hamuliaon ni Debata Nasunhinagogo i 1-14.
1Dung i ninna si Job ma mangalusi: 2Jagar ma ho manolongi halak na so margogo, jala ditumpak ho botohon na so marnangon! 3Jagar ma ho manuturi halak na so marbisuk, jala nunga tung godang pingkiran dipabotohon ho! 4Mangonai tu ise ulaning hatahata angka naung pinaboam, jala tondi ni ise ulaning naung ruar sian ho? 5Gari begu ni halak na mate angka hitir do nang halak isi ni lung. 6Tedek do parbeguan i di jolona, jala ndang martutup banua toru. #Job 38:17; Ps 139:8; Poda 15:11; Heb 4:13 7Ibana pahembang langit parutara i di atas ni lung, Ibana manggantungkon tano on tu atas ni na soada. #Ps 104:2 8Ibana manimpus aek di bagasan ombunna, jala ndang olo mapuntas angka ombun i dibahen. #Ps 104:3 9Ibana manghungkupi bohi ni habangsana, jala dipaherbang ombunna bahen rimberimbena. 10Ibana umpajok parbalohan ni angka aek humaliang, sahat ro di partomuan ni hatiuron dohot haholomon. #1Mus 8:22; Job 38:10-11; Poda 8:27-29; Jer 5:22 11Pola tung humuturhutur angka tiang ni langit jala tarsonggot moradophon pangasupina. 12Pola gunsang laut i binahen ni hagogoonna, jala marhite sian hapistaranna dipatunduk Ibana Rahab. #Job 38:11; Jes 51:15 13Marhite sian hosana minar angka langit i dibahen, jala tanganna manjadihon * ulok na marlegotlegot. #Ps 33:6; * Jes 27:1 14Ida ma, i ma angka ujung ni dalanna dope, asal pistik hata husiphusip na itabege taringot tusi! Tung ise ma na manahan anggo umbege suara ronggur ni hagogoonna? #1Kor 13:9
Currently Selected:
JOB Bindu 26: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.