JOB Bindu 18
Bindu 18
Hata ni si Bildad paduahalihon:
Mangonai hata ibana tu si Job, ala saritana dompak angka alealena 1-4.
Ditariashon hamagoan na mangonai tu parjahat 5-21.
I. 1Dung i ninna si Bildad sian Sua ma mangalusi: 2Sadia leleng on sai palagelageonmuna hatahata? Sai olo ma hamu parrohaon, dung pe i asa mangkatai hita! 3Boasa tung dietong roham hami songon pinahan? Boasa tung songon na maoto hami di roham? #Job 17:4, 10 4Tung ho sandiri do tahe marsuragehon roham di bagasan dibahen gusarmu; tung tagamon tarulang ma tano on ala ho, manang tung munsat dolok batu sian ingananna?
II. 5Tongon tahe, ingkon mintop do palito ni halak parjahat, jala unang be marsinondang nalanala ni apina. #Job 18:18, 21:17; Ps 73:18-20; Poda 13:9, 24:20 6Hatiuron i pe, ingkon gabe haholomon di bagasan undungundungna, jala palitona ingkon mintop di atasna. #Job 29:3; Ps 18:29; Poda 13:9 7Ingkon lam * targogot langkalangka ni hagogoonna, jala + sangkapsangkapna manginona tu ibana sandiri. #* Ps 18:37; Poda 4:12; + Est 9:25; Ps 7:17 8Ai patna sandiri padapot ibana di bagasan aring, jala mardalani ibana di bagasan tali na rundut. #Ps 9:16 9Sai na taralit do tambihulna di bagasan jorgong, jala lingkup tu ibana rambang. 10Marsibuni di bagasan tano aringna ditaon, jala bostangna di dalan na bolon. 11Angka hinamago manonggoti ibana humaliang, jala dihampungi angka bogas ni patna. #3Mus 26:36; Job 15:21; Jer 6:25, 46:5 12Hisapan hinamagona i pasudasuda ibana, jala ngomngom di lambungna hamagoan i. 13Nunga suda dipangan uraturat ni dagingna, nunga pola suda tahe angka ruasna dipangan anak buhabaju ni hamatean. 14Tarsarat do ibana sian undungundungna, * haposan ni rohana hian, jala ingkon langkahononna mandapothon + raja ni hasonggoton. #* Job 8:13-14; + Ps 18:5, 49:15; Heb 2:14-15 15Halak na pulik marga na ma maringan di bagasan undungundungna, ala so adong tadingtadinganna; tung disirsirhon do * barerang tu ingananna i. #* 1Mus 19:24-25; Ps 11:6; Jes 34:9 16Malos do angka uratna sian toru, jala ditultuli dangkana sian ginjang. #Job 8:16-17, 15:3; Jes 5:24; Am 2:9 17Pesan do baritana sian tano on, jala ndang be targoar ibana di angka alaman. #5Mus 32:26; Ps 9:7, 109:13; Poda 2:22, 10:7 18Dionjarhon halak do ibana sian hatiuron tu haholomon, pola dipabali ibana sian tano on. 19Ndang teba di ibana anak manang pahompu di tongatonga ni bangsona, tung na so adong pasipasina tinggal di ingananna. 20Tung tarsonggot situtu do halak di pudina mida * ari hinamagona, jala panonditnonditon disi halak na robi. #* Ps 37:13 21Sai songon i do parsorion ni isi ni jabu ni halak pargeduk, jala songon i do inganan ni halak angka na so tumanda Debata.
Currently Selected:
JOB Bindu 18: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.