JOB Bindu 19
Bindu 19
Sulam ni si Job paduahalihon:
Diulahi mangandungkon na so marpangkaehe hata ni alealena 1-5.
Tung na dangol sahali do parniahapanna 6-20.
Mangido asi ni roha ibana sian angka alealena, jala marhaposan ibana tu Debata Sipalua ibana 21-29.
I. 1Dung i ninna si Job ma mangalusi: 2Sadia leleng on sai arsahanmuna rohangku? Jala pasipalsipalonmuna ahu marhite sian hatahata? #Job 18:2 3Nunga pola sampulu hali hamu manginsahi ahu, ndang maila hamu mangalojai ahu. 4Tung sura pe naung tutu ahu sala, ahu do mandapot salangku. 5Tongon tahe, sai naeng manenganenga hamu dompak ahu, lam mangonai hata muse hamu dompak ahu patamba haurahonku.
II. 6Antong boto hamu ma, nunga dipajepol Debata ahu, jala nunga lingkup tu ahu rambangna. 7Ida ma, huanggukkon pe pangarupaon! Hape ndang adong na mangalusi; sai marhuraja ahu mangido pangurupion, hape ndang adong na mamintori ahu. #Job 30:20 8Nunga dirungga Ibana dalanku, gabe ndang tarbolus ahu; jala nunga gabe haholomon angka dalanku dibahen Ibana. #Job 3:23, 13:27; And 3:7-9; Hos 2:9 9Nunga diosari Ibana hamuliaonku sian ahu, jala nunga dirampas tumpalhu sian ulungku. #Job 29:15; And 5:16 10Nunga tung diparumpak Ibana ahu tuk humaliang asa tung mate ahu; jala nunga diborgati arop ni rohangku songon hau. 11Nunga marsigorgor rimasna dompak ahu, jala * hira musuna ahu dietongi. #* Job 13:24, 30:10 12Nunga isi angka parduan ni paranganna ro mangarampok ahu; nunga dipalendes nasida dalanna laho mangalo ahu, jala ditungkum undungku tuk humaliang. #Job 30:12 13Nunga dipaholang Ibana angka hahaanggingku sian ahu, jala banding tu ahu angka donganku magodang. #Ps 31:12, 69:9; Jer 12:6 14Nunga ditadingkon angka tondongku ahu, jala nunga dihalupahon angka alealengku ahu. #Ps 38:12 15Halak isi ni bagashu pe ro di angka naposongku mangetongi ahu doshon halak ruar, hira halak na pulik luat do ahu di rohanasida. 16Ia hujou naposongku, gabe ndang mangalusi ibana, maradu huparrajarajai ibana dohot pamanganku. 17Nunga biasan * jolmangku manganggo hosangku, nang angka pahompungku manganggo mongkushu. #* Job 2:9 18Gari angka dakdanak na tuit mangaleai ahu; molo huondam hehe, gabe mambebeati nasida dompak ahu. #Job 30:1 19Marbiasbias do mida ahu saluhut aleale hasudungan ni rohangku na sai laon, jala halak na huhaholongi nunga marbalik mangalo ahu. #Job 19:13; Ps 38:12, 41:10, 60:9, 88:9 20Tandos tu holiholingku na ma hulingkulingku dohot sibukku, holan sisik ni suratanku na ma na so hona. #Ps 102:6; And 4:8
III. 21Sai asi ma rohamu mida ahu, asi ma tutu rohamu mida ahu, hamu ale angka alealengku, ai nunga mangonai * tangan ni Jahowa tu ahu. #* Rut 1:13, 20 22Boasa tung leleanmuna ahu songon pangalele ni Debata? Ndang dope mahap rohamu pasipalsipal dagingku? #Ps 27:2 23Aut ni tarsurat nian angka hatangku, aut taruhir nian di bagasan sada pustaha! #Jes 30:8 24Aut dilontik nian dohot panurat bosi dohot simbora tu dolok batu, bahen parningotan salelenglelengna. 25Ai tangkas do * huboto mangolu do ** Sipangolu ahu, jala Ibana + parpudi jongjong di atas orbuk. #* 2Tim 1:12; ** 2Mus 6:6; Jes 41:14, 44:22; Hos 13:14; + Jes 44:6 26Jala ia dung malangke hulingkulingkon, jala malua ahu sian * sibukkon, + idaonku ma Debata. #* Ps 17:15, 73:24; + Mat 5:8; 1Joh 3:2 27Ahu sandiri ma tutu marnida Ibana gabe hatuaonku, apala matangkon marnida Ibana, jala ndada anggo * sileban; pola tung suda + piangku dibahen sihol ni rohangku di bagasan. #* 1Kor 15:38; + Ps 7:10, 16:7, 84:3, 119:81 28Molo tung didok rohamuna dope: Beha bahenonta mangalele ibana? Angkup ni: Parbonsiran ni hata i dapot do di bagasan ahu. 29Sai mabiar ma hamu mida podang partubolon, ai rimas i do podang mangonai tu angka hajahaton, asa tung diboto hamu adong do uhum partubolon sogot.
Currently Selected:
JOB Bindu 19: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.