PANURIRANG HOSEA Bindu 12
Bindu 12
Roha gapgap ni Israel 1-3.
Dipasingothon tu nasida jamita mulamula ni bangso i laho maminsang nuaeng 4-15.
I. 1Dihaliangi halak Epraim do ahu marhitehite gabus, jala halak Israel marhitehite sipaotooto; ianggo Juda marsihohot dope nian tu Debata dohot tu na badia i. 2Epraim mangkalomohon alogo jala dieahi habahaba sian purba, ganup ari dipatamba gabus dohot pangarupaon dohot mambahen padan * tu Assur, jala diboan miak tu Misir. #* Hos 5:13, 7:11 3Alai adong do huhut parbadaan ni Jahowa tu Juda, jala marlulu ibana dompak Jakkob hombar tu angka dalanna, hombar tu angka pambahenanna tutu baloshononna tu ibana.
II. 4Di bortian dope ibana nunga ditiop hian tambihul ni hahana, jala di haroro ni gogona marsiranggut ibana dohot Debata. #1Mus 25:22, 26, 32:25-29 5Marsiranggut ibana dohot suruani jala monang ibana, tumatangis ibana huhut diparajarajai suruani. Jumpangsa ibana muse di Betel, jala * disi do mangkatai ibana tu hita. #* 1Mus 28:19, 35:15 6Alai Jahowa do i, Debata ni angka parangan, * Jahowa do goarna. #* 2Mus 3:15; Ps 83:19 7Dibahen i ho ale, sai pauba ma roham tu Debatam; radoti ma haholongon dohot uhum, jala marhaposan tu Debatam ho manongtong! 8Halak Kanaan ibana patioptiop hatian sipaotooto, somal ibana mangarohai rasirasa nuaeng. 9Lam didok Epraim dope songon on: * Asal dung mamora ahu, jumpang ahu sinamot, ndang tagamon jumpangan jea ahu, tau dosangku sian saluhut na huhangaluthon. #* Pgk 3:17 10Hape * ahu do nian Jahowa Debatam olat ni tano Misir; jala ahu mambahen ho maringan dope di undungundung songon uju di angka ari raya. #* Jes 43:11; Hos 13:4 11Jala marboaboa ahu tu angka panurirang, jala ahu patorophon pangungkapon, jala marumpama ahu marhitehite angka panurirang. 12Molo masa pameleon tu begu di Gilead, sai na buriapus do nasida; di Gilgal dipelehon nasida angka jonggi. Langgatannasida pe doshon tambaktambak sogot di atas gole ni hauma. #Hos 4:15, 6:8 13* Maporus tu Padang-Aram ia si Jakkob, jala sinonduk ia + si Israel mambuat boru, marmahanmahan ibana mambuat boru. #* 1Mus 28:5; + 1Mus 29:20 14Jala marhitehite panurirang sada * ditogihon Jahowa Israel ruar sian Misir, jala marhitehite sada panurirang nasida diparmahan. #* 2Mus 3:10 15Alai piripirion situtu ibana dibahen Epraim jadi parsapatahononna ma utangna mudar tu ibana, jala baloshonon ni Tuhanna ma haurahonna tu ibana.
Batak Toba Bible Revised Edition © Indonesian Bible Society, 1998.