1 JOHANNES Bindu 1
Bindu 1
Hata hangoluan i, na hinatindangkon ni si Johannes 1-4.
Parsaoranta dohot Debata, Parhatiuron i 5-10.
I. 1Na adong sian mulana, na hubege hami, na niida ni matanami, na hupanotnoti hami, jala na jinama ni tangannami, taringot tu hata hangoluan i. #Joh 1:1, 14 2Naung gabe patar do hangoluan i, nunga huida hami, gabe huhatindangkon jala hubaritahon hami tu hamu hangoluan na salelenglelengna i, naung adong hian di adopan ni Ama i, gabe dipapatar tu hami. #Joh 1:4 3Na huida jala hubege hami, i do binaritahon nang tu hamu, asa marparsaoran nang hamu rap dohot hami. Tu Ama i dohot tu Anakna Jesus Kristus do parsaoranta i. 4Umbahen na husurathon hami hata on tu hamu, asa gok halalas ni rohamuna. #Joh 15:11, 16:24
II. 5On do barita, na hubege hami sian Ibana gabe binaritahon tu hamu: Panondang do Debata; ndang adong di bagasan Ibana manang aha na holom. #Jak 1:17 6Molo tadok, naung saor hita tu Ibana, huhut taulahon na holom, pargabus do hita, ndang siula hasintongan hita. #1Joh 2:4 7Alai molo taparangehon hatiuron, songon Ibana na di bagasan na tiur, saor do hita sama hita, jala dipaias mudar ni Jesus, Anakna i, do hita sian nasa dosa. #Heb 9:14; Pgk 1:5, 7:14 8Molo tadok, na so adong dosanta, tapaotooto do dirinta, jala ndang di bagasan hita hasintongan i. 9Molo tatopoti angka dosanta, haposan do Ibana jala bonar, manesa dosanta jala paiashon hita sian nasa hageduhon. #Poda 28:13 10Molo tadok, na so mardosa hita, pargabus do Ibana tabahen, jala ndang di bagasan hita anggo hatana.
Currently Selected:
1 JOHANNES Bindu 1: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.