1 JOHANNES Bindu 2
Bindu 2
Parange hatiuron mangasahon Tuhan Jesus 1-11.
Sirang sian portibi on! 12-17.
Holang sian na mangaliluhon! 18-29.
I. 1Ale angka anaha, umbahen husurat on tu hamu, asa unang mardosa hamu. Molo tung adong na mardosa, adong do pangondianta tu Ama i, i ma Jesus Kristus, partigor i. #Rom 8:34; Heb 7:25 2Ibana do pardengganan pasaehon angka dosanta; alai ndada holan dosanta, tung dohot do dosa ni sandok portibi on. #Kol 1:20 3Sian on do taboto, naung tatanda Ibana: Molo taradoti angka patikna. 4Na mandok: Hutanda do Ibana; alai ndang diradoti patikna, pargabus do i, ndang adong hasintongan di bagasan ibana. 5Alai na mangaradoti hatana, naung tutu ma gok haholongon ni roha ni Debata di bagasan ibana. Sian i ma taboto, hita di bagasan ibana. #Joh 14:21, 23 6Na mandok, mian di bagasan Ibana, ingkon diparangehon ma songon Ibana. #Joh 13:15 7Ale dongan, na hinaholongan, ndada patik na imbaru na husurat tu hamu, patik naung leleng do, na di hamu sian mulana. Patik naung leleng, i do hata na binegemuna i. #Joh 13:34 8Tong do na imbaru patik na husurat tu hamu, sintong do i di bagasan Ibana dohot di bagasan hamu, ai na salpu ma na holom; nunga marsinondang nuaeng Panondang na sintong i. #Rom 13:12 9Halak na mandok di bagasan na tiur i ibana, huhut dihosomi donganna: Na tongtong dope mian i di bagasan na holom. #1Joh 4:20 10Na holong roha di donganna, i do na mian di bagasan na tiur; ndang pargasipan ibana. 11Alai na manghosomi donganna, di bagasan na holom do i; di bagasan na holom do dalanna. Ndang diboto, manang tudia ibana laho, ai dipapitung na holom i do matana.
II. 12Hubahen surat tu hamu, angka anak, dibahen naung sesa dosamuna, ala ni Goarna i. 13Hubahen surat tu hamu, angka ama, ala ditanda hamu Ibana, na sian mulana i; hubahen surat tu hamu, angka dolidoli, ala naung ditaluhon hamu parjahat i; hubahen surat tu hamu, angka anak, ala ditanda hamu Ama i. 14Nunga hubahen surat tu hamu, angka ama, ala naung ditanda hamu Ibana, na sian mulana i; nunga hubahen surat tu hamu, angka dolidoli, ala margogo hamu, jala ala mian hata ni Debata di bagasan hamu, jala ala naung ditaluhon hamu parjahat i. #Eps 6:10 15Unang ma haholongi hamu portibi on, nang angka na dibagasanna! Anggo dihaholongi halak portibi on, ndang di bagasan ibana holong ni roha ni Ama i. #Jak 4:4 16Ai nasa na di portibi on, i ma lomolomo ni roha ni daging, giotgiot ni roha ni mata dohot na manenganengahon sinadongan, ndada sian Ama i anggo i, tung sian portibi on do. 17Jala na laho salpu do portibi on rap dohot na pinarhagiotna; alai na mian ro di salelenglelengna do na mangulahon lomo ni roha ni Debata.
III. 18Hamu angka anaha, tingki parpudi do nuaeng; jala songon naung binegemuna, na naeng ro Antikristus i; nunga lan gabe Antikristus; sian i do taboto, nuaeng ma tingki parpudi. #Mat 24:5, 24 19Sian tongatonganta do nian haroroannasida, alai ndang donganta nasida; ai aut donganta nasida, udur ma nasida dohot hita; alai naeng patar ma nasida, na so donganta saluhutna i. #Ul 20:30 20Naung miniahan ni Na-badia i do hamu, jala saluhut hamu umbotosa. 21Hubahen pe surat tu hamu, ndada ala so diboto hamu hasintongan i, ala naung diboto hamu i tahe, jala ndang sian hasintongan nasa gabus. 22Ise do sipargabus i, ia so na mansoadahon, na mandok: Ndang Kristus i Jesus? I ma Antikristus, na mansoadahon Ama i dohot Anak i. 23Ganup na mansoadahon Anak i, ndang di ibana nang Ama i. Halak na marhatopothon Anak i, di ibana do nang Ama i. #Joh 5:23; 1Joh 4:15 24Mian ma di bagasan hamu na binegemuna sian mulana i! Molo mian di bagasan hamu na binegemuna sian mulana i, mian ma nang hamu di bagasan Anak i dohot di bagasan Ama i. #1Joh 2:7 25Jala anggo bagabaga na pinarbagabaga na i tu hita, i ma ngolu na salelenglelengna i. 26Angka i do husurat tu hamu taringot tu angka na mangaliluhon hamu. 27Na mian do di bagasan hamu pamiahion, naung jinalomuna sian Ibana; ndang pola hamu ajaran ni halak. Sintong do na niajarhon ni pamiahion i saluhutna tu hamu, ndang adong gabus disi. Mian ma hamu di bagasan Ibana, songon naung niajarhon tu hamu! #Joh 16:13; 1Joh 2:20 28Nuaeng pe, angka anaha, mian ma hamu di bagasan Ibana, asa marhiras ni roha hita, di na gabe patar Ibana, unang tarila hita maradophon Ibana di harorona i! #1Joh 4:17 29Molo diboto hamu, tigor Ibana, boto hamu ma: Naung tubu sian Ibana do nasa na mangulahon hatigoran i. #1Joh 3:7, 10
Currently Selected:
1 JOHANNES Bindu 2: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.