2 PETRUS Bindu 3
Bindu 3
Sai na ro do Tuhan i, so pangkirimon, di tingkina i 1-10.
Pangalaho na ture, managam ari i 11-18.
I. 1On ma surat na paduahon, na husurat tu hamu, angka haholongan, manungguli bontor ni roha di hamu, marhitehite hata sipaingot, #2Ptr 1:13 2asa diingot hamu hata angka naung hinatahon ni angka panurirang na badia i, nang patik ni Tuhan jala Sipalua i, na binaritahon ni angka apostelmuna. #Jud 1:17 3On ma na rumingkot botoonmuna: Na ro ma di angka ari parpudi angka pangalensem, parhata insahinsak, na mangoloi angka hisapna sandiri; #1Tim 4:1; Jud 1:18 4angka na mandok: Didia do harorona, na pinarbagabaga i? Ai dung monding angka amanta, hot do saluhutna songon i, sian mula ni hasiangan on! #Mat 24:48 5Laho mandok songon i, ndang manganto rohanasida, naung sian aek do langit nang tano, jala marhitehite aek do hajajadina hinorhon ni hata ni Debata. #1Mus 1:2, 6, 9; Ps 24:2; Mat 24:38 6Laos marhitehite aek i do mago uju i tano on, dilantaphon aek i. #1Mus 7:21; 2Ptr 2:5 7Jala marhite sian hata i do diramoti Ibana langit dohot tano nuaeng; dipeop do, asa tu api di ari paruhuman jala hamagaon ni jolma angka na jahat. #2Ptr 3:10; Jud 1:15 8Alai tangkas ma ingot hamu, angka haholongan: Sada ari do di Tuhan i songon saribu taon, jala saribu taon songon sada ari! #Ps 90:4 9Ndang dipagele Tuhan i bagabaga i, songon na nidok ni roha ni na deba; alai lambas do rohana mida hamu, ai dipangido rohana, naeng unang ma nian mago agia ise, naeng ma tahe saluhutna sahat tu hamubaon ni roha. #Hab 2:3; 1Tim 2:4 10Alai na ro ma ari ni Tuhan i, songon panangko; mardorop ma disi langit i, laho sega; masarsar ma sisiasia ni tano on bahenon ni api; songon i nang tano i, ro di sude ulaon na di atasna, masoksok ma. #Mat 24:29; 1Tes 5:2-3; Pgk 20:11
II. 11Antong, anggo masarsar do hape saluhutna on, nda lam sumurung ma parange na badia dohot hadaulaton 12ni angka na paimaimahon jala mangkasiholi haroro ni ari ni Debata, di na masarsar langit i disoksohi, jala malala tartutung do angka sisiasiana! 13Alai na maimaima do hita di langit na imbaru dohot di tano na imbaru, inganan ni hatigoran i, hombar tu bagabagana. #Jes 65:17, 66:22; Pgk 21:1, 27 14Dibahen i, hamu angka haholongan, anggo i dipaimaima hamu, ringkoti hamu ma, asa didapot Ibana hamu so martihas, so hasurahan, di bagasan dame! #1Kor 1:7-8 15Rajumi hamu ma lambas ni roha ni Tuhanta haluaonmuna, songon naung manurat tu hamu dongan haholonganta, si Paulus i, marguru tu parbinotoan, naung dilehon tu ibana. #Rom 2:4 16Songon i di saluhut angka suratna, i dipatorang; adong do deba disi na maol antusan, i ma dipalipe angka na so marroha jala na so togu rohana, nang di surat na asing pe, bahen hamagoannasida sandiri. 17Antong, hamu angka haholongan, ala naung diboto hamu i hian, jaga ma, unang tarela hamu, dibahen haliluon ni angka na so maruhum i, gabe madabu hamu maon sian haojahanmuna. #Mrk 13:5, 9, 33; Jud 1:20 18Alai lam ganda ma di hamu asi ni roha dohot panandaon di Tuhanta Jesus Kristus, Sipalua i! Di Ibana ma hasangapon, nang nuaeng, nang ro di salelenglelengna!
Currently Selected:
2 PETRUS Bindu 3: BBC
Highlight
Copy
Compare
Share
Want to have your highlights saved across all your devices? Sign up or sign in
Batak Toba Bible Revised Edition © Indonesian Bible Society, 1998.