ગીતશાસ્ત્ર 18
18
દાઉદ રાજાનું વિજયગાન
મુખ્ય ગવૈયાને માટે. યહોવાના સેવક દાઉદનું [ગીત]. જે દિવસે યહોવાએ તેને તેના સર્વ શત્રુઓના હાથમાંથી તથા શાઉલના હાથમાંથી છોડાવ્યો, તે દિવસે તેણે યહોવાને આ ગીતનાં વચન કહ્યાં કે,
1હે યહોવા, મારા સામર્થ્ય,
હું તમારા પર પ્રેમ રાખું છું.
2યહોવા મારા ખડક, મારો કિલ્લો તથા
મારા બચાવનાર છે;
મારા ઈશ્વર, મારા ગઢ,
તે પર હું ભરોસો રાખીશ.
તે મારું બખતર, મારા તારણનું શિંગ
અને મારો ઊંચો બુરજ છે.
3યહોવા સ્તુતિપાત્ર છે,
તેમને હું વિનંતી કરીશ.
એમ હું મારા શત્રુઓથી બચી જઈશ.
4મરણનાં બંધનોએ મને ઘેર્યો,
અને દુષ્ટતાનાં મોજાંએ
મને બીવડાવ્યો.
5શેઓલનાં બંધનોએ મને ઘેરો ઘાલ્યો,
મરણના પાશ મારા પર આવી પડ્યા.
6મારા સંકટમાં મેં યહોવાને વિનંતી કરી,
અને મારા ઈશ્વરને અરજ કરી;
તેમણે પોતાના પવિત્રસ્થાનમાંથી
મારો અવાજ સાંભળ્યો,
અને તેમની આગળ મારી અરજ
તેમને કાને પહોંચી.
7ત્યારે પૃથ્વી હાલી તથા કાંપી,
વળી પર્વતોના પાયા ખસી ગયા.
તથા હાલ્યા,
કેમ કે ઈશ્વર કોપાયમાન હતા.
8તેમનાં નસકોરાંમાંથી ધુમાડો નીકળ્યો,
અને તેમના મુખમાંથી ભસ્મ કરનાર
અગ્નિ નીકળ્યો;
તેથી કોલસા સળગી ઊઠયા
9વળી તે આકાશોને નમાવીને ઊતર્યા;
અને તેમના પગ નીચે
ઘોર અંધકાર હતો.
10તે કરૂબ ઉપર સવારી કરીને ઊડયા;
અને વાયુની પાંખો વડે વેગે ઊડયા.
11તેમણે અંધકારને એટલે મેઘજળના
અંધકારને તથા અંતરિક્ષનાં ગાઢાં
વાદળને પોતાનું સંતાવાનું સ્થળ અને
પોતાની આસપાસનું
આચ્છાદન બનાવ્યું.
12તેમની સામેના પ્રકાશથી તેમનાં ગાઢાં
વાદળ જતાં રહ્યાં,
કરાં તથા અગ્નિના અંગારા [પડ્યા].
13યહોવાએ આકાશમાં ગર્જના કરી,
અને પરાત્પરે મોટો
અવાજ કાઢયો;
કરાં અને અગ્નિના અંગારા [પડ્યા].
14તેમણે બાણો મારીને
તેઓને વિખેરી નાખ્યા;
વળી તેમણે વીજળીઓ મોકલીને
તેમને થથરાવી નાખ્યા.
15ત્યારે, હે યહોવા, તમારી ધમકીથી,
તમારાં નસકોરાંના શ્વાસના ઝપાટાથી,
સમુદ્રનાં તળિયાં દેખાયાં,
અને જગતના પાયા ઉઘાડા થયા.
16તેમણે ઉપરથી પોતાને હાથે
મને પકડી લીધો.
તેમણે ઘણાં પાણીમાંથી મને કાઢયો.
17તેમણે મારા બળવાન શત્રુથી
અને મારા દ્વેષીઓથી મને બચાવ્યો,
કેમ કે તેઓ મારા કરતાં
જોરાવર હતા.
18મારી વિપત્તિને દિવસે
તેઓ મારા પર તૂટી પડ્યા;
પણ યહોવા મારો આધાર હતા.
19વળી તે મને ખુલ્લી જગામાં
કાઢી લાવ્યા;
તેમણે મને છોડાવ્યો, કેમ કે
તે મારા પર પ્રસન્ન હતા.
20યહોવાએ મને મારા ન્યાયીપણાનું
ફળ આપ્યું;
તેમણે મારા હાથની શુદ્ધતા પ્રમાણે
મને પાછું વાળી આપ્યું છે.
21કેમ કે હું યહોવાને માર્ગે ચાલ્યો છું,
અને ભૂંડાઈ કરીને મારા ઈશ્વરથી
વિમુખ થયો નથી.
22તેમની સર્વ આજ્ઞાઓ
હું મારી સંમુખ રાખતો,
અને મેં તેમના વિધિઓ મારી પાસેથી
દૂર કર્યા નહોતા.
23વળી હું તેમની આગળ નિર્દોષ હતો,
અને હું અન્યાયથી દૂર રહ્યો.
24માટે યહોવાએ મારું ન્યાયીપણું
અને મારા હાથની શુદ્ધતા જોઈને તે
પ્રમાણે મને પ્રતિદાન આપ્યું છે.
25કૃપાળુની સાથે તમે કૃપાળુ દેખાશો;
ન્યાયીની સાથે તમે ન્યાયી દેખાશો;
26શુદ્ધની સાથે તમે શુદ્ધ દેખાશો;
પણ હઠીલાની સાથે તમે હઠીલા દેખાશો
27કેમ કે તમે દુ:ખીઓને બચાવશો;
પણ અભિમાની આંખોને
તમે નીચું જોવડાવશો.
28કેમ કે તમે મારો દીવો સળગાવશો;
યહોવા મારા ઈશ્વર મારા અંધકારનો
પ્રકાશ કરશે.
29કેમ કે તમારી [સહાય] થી હું પલટણ
ઉપર ધસી પડું છું;
અને મારા ઈશ્વર [ની કૃપા] થી
હું કોટ કૂદી જાઉં છું.
30ઈશ્વરનો માર્ગ તો પરિપૂર્ણ છે;
યહોવાનો શબ્દ પરખેલો છે;
જેઓ તેમના પર ભરોસો રાખે છે
તે સર્વની ઢાલ તે છે.
31કેમ કે યહોવા વિના
બીજો ઈશ્વર કોણ છે?
અને અમારા ઈશ્વર વિના
બીજો ગઢ કોણ છે?
32ઈશ્વર જે મારી કમરે
સામર્થ્ય [રૂપી પટો] બાંધે છે,
અને મારો માર્ગ સીધો કરે છે.
33 #
હબા. ૩:૧૯. તે મારા પગ હરણીના જેવા કરે છે.
અને મારાં ઉચ્ચસ્થાનો પર
મને સ્થાપે છે.
34તે મારા હાથોને લડતાં શીખવે છે;
તેથી મારા હાથ પિત્તળનું ધનુષ્ય
તાણે છે.
35વળી તમે તમારા તારણની ઢાલ
મને આપી છે;
તમારે જમણે હાથે મને ઊંચકી
રાખ્યો છે,
અને તમારી અમીદષ્ટિએ
મને મોટો કર્યો છે.
36તમે મારી ચાલવાની જગા ખુલ્લી
કરી છે,
જેથી મારા પગ સરકી ગયા નથી.
37હું મારા શત્રુઓની પાછળ પડીને
તેઓને પકડી પાડીશ;
અને તેઓનો નાશ નહિ થાય,
ત્યાં સુધી હું પાછો ફરીશ નહિ.
38હું તેઓને એવા વીંધી નાખીશ કે
તેઓ ઊઠી શકે નહિ;
તેઓ મારે પગે પડશે.
39કેમ કે તમે યુદ્ધને માટે મારી કમરે
સામર્થ્ય [રૂપી પટો] બાંધ્યો છે;
મારી સામે ચઢાઈ કરનારાને તમે મારે
તાબે કર્યા છે.
40વળી તમે મારા શત્રુઓની પીઠ મારી
તરફ ફેરવાવી છે કે,
જેથી મારા દ્વેષીઓનો હું નાશ કરું.
41તેઓએ બૂમ મારી,
પણ બચાવનાર કોઈ નહોતો;
હા, તેઓએ યહોવાને
[વિનંતી કરી] , પણ
તેમણે તેઓને ઉત્તર આપ્યો નહિ.
42ત્યારે પવન આગળ ધૂળની જેમ
મેં તેઓને બારીક ખાંડયા;
રસ્તાના કાદવની જેમ
મેં તેઓને ફેંકી દીધા.
43લોકોના સંઘર્ષમાંથી
તમે મને છોડાવ્યો છે.
તમે વિદેશીઓને મારે તાબે કર્યા છે.
જે લોકોને હું ઓળખતો નહોતો
તેઓએ મારી તાબેદારી કરી.
44મારે વિષે સાંભળતાં જ
તેઓએ મારું માન્યું;
પરદેશીઓ મારે શરણે આવ્યા.
45પરદેશીઓનો ક્ષય થયો, તેઓ પોતાના
કિલ્લાઓમાંથી ધ્રુજતા ધ્રુજતા આવ્યા.
46યહોવા જીવતા જાગતા ઈશ્વર છે;
મારા ખડકને ધન્ય હો.
મારા તારણના ઈશ્વર ઉત્તમ મનાઓ.
47એટલે જે ઈશ્વર મારું વેર વાળે છે,
અને લોકને મારે તાબે કરે છે
તેમને [ધન્ય હો].
48તે મારા શત્રુઓથી મને છોડાવે છે;
હા, મારી સામે ઊઠનારા પર
તમે મને વિજય આપો છો;
બલાત્કાર કરનાર માણસથી
તમે મને બચાવો છો.
49માટે, #રોમ. ૧૫:૯. હે યહોવા હું વિદેશીઓમાં
તમારી આભારસ્તુતિ કરીશ,
અને તમારા નામનાં સ્તોત્ર ગાઈશ.
50તે પોતાના રાજાને વિજય આપે છે;
અને પોતાના અભિષિક્ત ઉપર,
એટલે દાઉદ તથા તેના સંતાન ઉપર,
સર્વકાળ કૃપા રાખે છે.
Currently Selected:
ગીતશાસ્ત્ર 18: GUJOVBSI
Highlight
Copy
Compare
Share
Want to have your highlights saved across all your devices? Sign up or sign in
Gujarati OV Reference Bible - પવિત્ર બાઇબલ
Copyright © Bible Society of India, 2016.
Used by permission. All rights reserved worldwide.
