Imethali 9
9
Irusho ni ukumbafu
1Irusho ahotheka inupa awe,
ahohema mikurio saba.
2Hohitha ashinama o isikukuu,
idivai aya aheesha chiire,
ahaathalha vachulhu imeza aya.
3Howaaruma anamitheko awe ashithiyana urwaa iwaani,
eehaneke attu ukhuma vachulhu chinene iwaani.
4“Ntu riyoothe nothanana uchuwelha rata ni aweeke vawani va!”
ni riyoothe ari nkumbafu nohimeria,
5“Mmweeke mwaalhia yoolhia,
ni uwuria idivai kithakaniinhe aka.
6Nhiyeke iphiro chinyu cho ukumbafu upatteke ulhokelha mahuku onkhaye,
uttwareke iphiro cho irusho.”
7Ntu riyoothe nonhambulha ri ni idharau nooruwania,
nonchachera ntu nkumbafu noopatta ishoni.
8Nhichachere ntu ari ni idharau khanouttunani ngu,
munchachere ntu ri ni irusho ni uyo nouuttunani.
9Mumwittuchihe ntu ari ni irusho ni uyo noothepa ukhalha ni irusho,
umwiittuchiheke ntu o irusho ni uyo noothepa upatta uchuwelha.
10Unthimicha Apwiiya Nlhuku phi nsingi o irusho,
ni uunchuwelha ulhe rii Ntakatifu phi upatta ibusara.
11Wo nlhattu waka mii irusho mahuku inyu anowuunchereria,
nnowuunchereria iyaakha chinyu chinchi mu ukumi inyu.
12Mwakhalhanaka irusho, inoolhokani mwanene,
nansho mwahirumelhelheke khannopatta ittu.
13Nthiyana nkumbafu noolhumacha pufia,
khanochuwelha ittu mena khaarina ishoni.
14Nookhalha vathi vankhora o inupa awe,
ni weesha ihiche awe vakittu vo nchulhu iwaani,
15ni wiihana attu anovira mphironi,
attu anorwaa unthekoni wawe,
16“Ntu riyoothe ri nkumbafu aweke va!”
ni ntu riyoothe nkumbafu umwiirelha wiira,
17“Maashi eeiye anochiva chinene,
yoolhia inolhia mpiiphini inoochiva chinene.”
18Nansho ntu o uhikhalha ni irusho khanochuwelha wiira attu ari mukhwani,
alheto ari mommo arii mu wiisha no nlhikiti.
The Bible Version in Makua @The Word for The World International and Makua Language translators. All rights reserved.