Imethali 10
10
Ikano chi Naselemani
1Chilha phi imethali chi Naselemani:
Mwaana ri ni irusho phi mpuha wa athumwanawe,
nansho mwaana nkumbafu phi nrushiho wa anumwanawe
2Nhakhu unoopattikana wo iphiro cho unanara chinottunia,
nansho irusho chinomwokholha ntu ukhuma mukhwani.
3Apwiiya Nlhuku khanaahia attu ahuvache wo ithalha,
nansho noothanganyaa chittu chinopanga aya attu o uhilhoka.
4Ureeshi wa ntu unoowiha ushikini,
nansho moono wa ntu o upanga ntheko unoowiha nhakhu.
5Ntu o irusho noothothokaniha cholhia chawe ikatema yo nlhaalha,
norupa ikatema yo ukunguria choolhia nohaalha woona ishoni.
6Ntu o irusho nowiwiihera ibarakha mwanene,
nansho iyano ya ntu nopanga chittu cho uhilhoka uhoorukureria ni ushilhilhi.
7Attu o irusho nowuupuwelhia thoko ibarakha,
nansho attu o uhilhoka anoolhiyalhia.
8Ntu o irusho munrimani norumelhelha malhehero,
nansho ntu nkumbafu noolhumacha pufia nootanganyaa.
9Ntu norumelhelha malhehero nookhalha nkumi,
nansho ntu nowonya noochuwania.
10Ntu noophilhalha wo nlhattu wo uhilhoka noowiha uhuva,
nansho ntu naathelhiha chittu cho uhilhoka yoyo noowiha mpuha.
11Iyano ya ntu o irusho phi nrapo no ukumi,
nansho iyano ya ntu o uhilhoka inoovitha uwonya.
12Uhittuna unothathusha indewo,
nansho uttuna unokhuneelha uwonya wonkhaye.
13Iyano ya ntu o irusho ihana nthimicho,
nansho attu ahiri ni irusho anoottwaarushiya.
14Ntu o irusho novarechesha rata malhove,
nansho iyano ya ntu hiri ni irusho inoowiha marimeelhiho waakuvia.
15Nhakhu wa ntu o nhakhu phi ikikhichero awe,
ushikini wa ntu nshikini unomwiihera mariro.
16Nttuvo na ntu ri ni nrima orera phi nkumi,
nansho ntu o uhilhoka nolhokelha mu uwonyani.
17Ntu norumelhelha waamukiya yoyo noorwaa mu ukumini,
nansho nokhotta mathelhiho yoyo nopotera mwanene.
18Ntu nottunalhelha nkhunanawe wo nivitho yoyo ri nrima o unanara,
ni ntu riyoothe notangacha chittu chaankunanawe yoyo nookhalha nkumbafu.
19Vaari malhove menchi vavawo vanopatikania milhatu,
nansho nothiyelhelha nlhimi awe yoyo ri ni irusho.
20Malhove a ntu orera nrima aari thoko isiliva,
nansho moopuwelho ya ntu o uhilhoka khachirina ithamani iriyoothe.
21Iyano ya ntu ri ni irusho inowaalhoka attu enchi,
nansho nkumbafu nookhwa wo nlhattu no uhikhalha ni irusho.
22Ibarakha cha Apwiiya Nlhuku phi chinowiiha nhakhu,
machiri a ntu mwanene khanomuunchereria ittu iriyoothe.
23Wa ntu nkumbafu nopanga chittu cho uhilhoka thoko nttwelho,
nansho attu ri ni irusho anooshangarera irusho.
24Anoovawe ntu o uhilhoka phi yeyo inohalha awe uunpatta,
nansho anothanana awe ntu ri ni irusho phi anohalha awe uvahiya.
25Nayuupuru nokusha ntu o ulhoka ni upotera,
nansho ntu ri ni irusho noolhipihia mahuku o uhimalha.
26Thoko iriaya isiki wo miino ama mwiishi unoneena awe mmiithoni,
phi ri awe ntu nreshi wa athithi awe.
27Unthimicha Apwiiya Nlhuku unoonvaha ntu ulhokelha mahuku o uhimalha,
nansho iyaakha ya attu o uhilhoka chinokhalha vakani.
28Nikulhuvelho na ntu ri ni irusho chinomalhelha wo mpuha,
nansho niweherero na ntu o uhilhoka khaninttimira.
29Apwiiya Nlhuku phi nowalhita attu o ikekhiaye,
nansho attu anopanga chittu cho uhilhoka anowaarimelhiha.
30Attu ari ni nrima oombone khanokhumihiya velhaponi vawo,
nansho attu o uhilhoka khanolhokelha mu ilhapo.
31Iyano ya ntu ri ni ikekhiaye wuulhumacha chittu cho irusho,
nansho nlhimi a ntu o uhilhoka unootupulhia.
32Iyano cha attu ari ni ikekhiaye chinoochuwelha chittu chinohimiya,
nansho malhove a attu o uhilhoka anokhottiya.
The Bible Version in Makua @The Word for The World International and Makua Language translators. All rights reserved.