Imethali 8
8
Uthothopelha irusho
1Chani, irusho chinowiihana?
Chani uchuwelha khunokhuwelha?
2Vachulhu mwaako vakhiviru ni iphiro,
vamarekhanoni iphiro, phi noweemelha aya,
3Vakhiviru ni nlhako o ukelhelha iwaani,
vakittu vanokelha attu anowiihana wo nlhove eeraka wiira,
4“Kinouuvendani attu onkhaye,
kinokhuwelha wo nlhattu na attu onkhaye.
5Inyu attu ajinga, mwiittuchiheke ukhalha ni irusho,
mwiiwelhelheke rata inyu akumbafu.
6Mwiiwelhelheke, ukhalhawaya kinohimia mwaha woombone,
mu iyano mwaka anookhuma malhove oombone.
7Iyano aka inowuulhumacha ikekhiaye,
uwonya phi nrusho mmalhakuni mwaka.
8Malhaku aka anohimia malhove o ikekhiaye,
khiiwo ittu yo woothacha.
9Wa ntu o uchuwelha kila ittu inowoonia,
ni ntu o irusho chonkhaye ni ikekhiaye.
10Nthanlheke meettuchiho aka badala yo isiliva,
ni irusho wo uhikhalha idhahabu choombone.”
11“Wo nlhattu irusho chiri ni nhakhu mwinchi upwaha malhuku o nhakhu,
chittu chiriyoothe nnottuna inyu khinooria ulhikaana ni irusho.
12Irusho ihaana uchuwelha,
ihaana irusho ni ibusara.
13Unthimicha Apwiiya Nlhuku phi ukhota uwonya,
kinorushiya ni itiamaru, wiichona ni uhilhoka,
kinorushiya ni malhove o unanara.
14Kinowooria uvaha malhove,
ni kihaana machiri ni uchuwelha.
15Wo ukavihera waka mamwene anotawara,
ni ahoolhelhi weesha malheheriyo yo ikekhiaye.
16Wo ukavihera waka ahoolhelhi anotawara,
ashuulhupalhe ni owaamulha milhatu anotawara wo ikekhiaye.
17Kinowaattuna attu anokittuna,
anokaavia wo nrima anokipatta.
18Nhakhu ni nthimicho chiri uwannyaka,
nhakhu ulhokelha ni mpuha.
19Maphepu aka yo urera upwaha idhahabu yoombone,
ittu inokumihaka inoovira malhuku o isiliva.
20Kineeta mu iphiro yo wookolhia,
kinottwara iphiro cho ikekhiaye.
21Kinowaavaha nhakhu attu anokittuna,
kinochariha makhupi aya attu anokittuna.”
22Apwiiya Nlhuku ahokuupa upacha wo ntheko awe,
ahinaya ntheko aya o khalhayi.
23Khahothanlhia ukhuma khalhai,
khahokalha uhinaaya wuupiya ilhapo.
24Kaayariye uhinaaya wuupiya ibahari,
uhinaaya nrapo ukumiha maashi,
25Uhinaaya wuupiya miako,
ni iruwa weemeshiya vakittu wawe,
mii kahoyariya,
26ahinaaya Nlhuku wuupa ilhapo ni imata chawe,
mena ntukurukhu no ilhapo.
27kahaawo toka ikatema vopilhe aya irimu,
ikatema venshe awe miinano vachulhu ibahari,
28Ikatema vaalhipinhe awe mahute yo wiirimu,
ni vapangilhe awe rata nrapo no wiisha,
29ikatema veeshilhe awe ibahari mwiinano awe,
maashi awe ahiwe wuutha malhehero awe,
ikatema veeshilhe awe nsingi wo ilhapo.
30Kaari vamoka ni uyo thoko ntheki o uchuwelha utheka,
kahokalha ntu o waavaha mpuha kila nihuku,
kahoshangarara umihoolho wawe mahuku onkhaye,
31Kahoshangarara mahuku onkhaye ni attu awe,
ni uchivelhiya ukhalha vamoka ni attu.
32“Vano etu ashaana aka, nkiweelhelheke.
Ahoreeriya attu anottwara iphiro chaka.
33Mwiiwelhelheke meettuchiho wiira mpatteke irusho
mena nhikhote.
34Horeeriya ntu anokiweelhelha,
anokhalha kila nihuku vanlhakoni waka,
noshelhelhiha vakhiviru ni nlhako aka.
35Anokipatta mii ahopatta ukumi,
hopatta nttuvo wa Apwiiya Nlhuku,
36Nansho ntu riyoothe noochelha ukipatta mii anowiiweria mwanene,
ni attu onkhaye anokivenga mii anottuna ukhwa.”
The Bible Version in Makua @The Word for The World International and Makua Language translators. All rights reserved.