Imethali 7
7
Itiyamaru wo nlhattu no nthiyana o ulhavalhava
1Mwaamwanaka, uvarechesheke malhove aka,
ushungerera malhehero aka nhina mwao.
2Uvarechesheke malhehero aka ni inyu nnokhalha nkumi,
nshungeke chinene meettuchiho aka thoko miitho inyu.
3Muupuwelheke meettuchiho aka,
nlhepeke munrimani mwinyu.
4Nshungeke irusho thoko arokoraka inyu,
mwiihaneke irusho Inyuva phi mwaanhimaka.
5Nnooshembihiya utayi ni nthiyana o ulhavalhava,
ukhalhawaya nthiyana o uhaaminika, o malhove yoopepecha.
Nthiyana o ulhavalhava
6Nihuku nimoka kahotturumelha mu ndirisha no inupa aka,
Kahothurumelha vathe uvirelha ndirisha.
7Kahoona ashimirawo enchi akumbafu,
kahochuwelha munlhokoni mwa ashimirawo ayo
kila mmoka kahochuwelha khaarina ni irusho.
8Yoyo ari aviraka mphironi vakhiviru ni ikona chawe,
eetaka urwaa iphiro yo ukelhelha unupani awe,
9Ikatema yo uchechilho, nchuwa nahowuukuwa uparelha,
vaapiilhe aya uhiyu, ipiiphi yohothepa.
10Paahi nthiyana uyo ahokumaana ni unttwara,
anawanre ikuwo thoko o ulhavalhava,
anari ni mwaha o woothacha.
11Nthiyana o malhaku ni o uruna,
mieto chawe khachinokhalha nipuro,
12mara vamarekhanoni, mara usokoni,
mara mu ipuwa chuulhupalhe,
nnaaphwanya kila vakittu eevithelhaka.
13Nthiyana uyo ahonkumbatira mmirawo uyo ni umbuusu,
nkaammweha wiitho ni umwiirelha malhove o uchivachiva,
14“Kahothanania kikhumiheke isadaka cho mpuha,
ilhelho nna kihotimiriha ishaani aka.
15Wo nlhattu nno kihokhuma vathe uwa uwekamelhani,
kihouuttwarani wo uttunani wiira kuupatteni.
16Kihaathalha ikori aka voombone,
wo ishuka cho irangi yootelha cho ukhuma Umisri.
17kiheesha makhura o unukelha vakhorini waka,
makhura aneehaniya manemane, ubani ni ndalasini.
18Mmweeke, nirupeke vamoka mpaka meelho,
mmweeke nishangarareke ashinene wo uttuna.
19O waannyaka khaawo vawaani,
ahorwaa nkwaha o utayi.
20Ahokusha nrupa o inchurukhu mwinchi,
ni khanohokolhia vawaani mpaka vanohalha aya umalha mweeri.”
21Ahoonthephiacha wo malhove moombone,
ni upepechiya wo malhove moombone.
22Vaavawo nlhopwana ulhe nkayanttwara nthiyana ulhe
thoko ing'ope norweehia uhithiyani,
thoko naahe anowaya unriakoni,
23Khayaachuwenlhe wiira aheekumiha ukumi awe,
mpaka voonne awe wiira hohomia nivaka vanrimani,
ahokhalha thoko mwaanuni awayilhe unriankhoni.
24Vanova achishaanaka, nkiweelhelheke
mwiiwelhelheke rata malhove anokhuma umalhakuni mwaka.
25Nrima inyu nhirumelhelhe malhove a nthiyana uyo,
mena nhivire mu iphiro awe.
26Ukhalhawaya ahowoolhusha ashilhopwana enchi ni uweeva,
attu aakelhinhe mu uwonyani ari enchi.
27Inupa awe phi iphiro yuulhupalhe yo ukelhelha unaminepa,
ni vakittu vo ukhuruwelha mukhwani.
The Bible Version in Makua @The Word for The World International and Makua Language translators. All rights reserved.