Imethali 6
6
Waamukiya wo uthepa
1Mwaamwanaka, uheekumiha umweeshera idhamana amwaatamana inyu,
yakhalhaka uhoolheha wo nlhattu na yoyo ntu uyo,
2uheettuka wo malhove awo uwe umwanene,
uheewayiha wo malhehano upangilhe awo.
3Nchuwelheke wiira uri wuuthi wo utawara wa nkhunaninyu,
nansho mwaamwanaka, mwathananaka wiichoopolha, paahi upangeke cho,
unrweelheke ntu uyo ni mwiikurusheke ni unvenda wiira o ohiyerereke.
4Mwiilhipiheke nhirupe ikhove,
mena makwikhwi o miitho inyu ahihichilhe.
5Wichoopolheke wo wiikumiha munriakoni mmo thoko naahe,
thoko mwaanuni chinonttawa awe ntu o ulhupatta.
6Uwe ntu o ureeshi! Urweeke etu waaweheke inenelhe,
wuupuwelheke iphiro inokhalha awe mpatte irusho.
7Inenelhe khachirina nholhelhi,
ama mwene, khaarina anaatawara.
8Nansho chinowiicheshera choolhia ikatema yo ukhunguria,
chinowiishungera choolhia unikupini ikatema yo nlhaalha.
9Uwe ntu nreeshi, unohalha urupa vavawo mpaka iyaakhani?
Unohalha wunkwa iyaakhani nkhoveni mwao?
10Uneera, “Nkihiyeke kirupe vakani,
nkihiyeke kihichilhe vakani!
Nkihiyeke kiittuwiheke miono vakani!”
11Mu ikatema iyo uhumaathi unoukelhelhani thoko ntu o uvara makhuche,
ni ushikini unoottwarani thoko ntu ovara makhuche.
12Ntu uhilhoka, ntu o woothacha,
neeta uno ahimiachaka malhove o uhilhoka.
13Noopilhapilha miitho waawonyiha attu akina,
nowooniha nthoonyero wo inyaa chawe,
ni wattonya attu wo makokho awe,
14uno achariaka injoove munrimani mwawe,
noothathusha indewo kila vakittu.
15Wo milhatu chiyo itatako chinompatta wo uthuthuwelha,
noopatta itatako chuulhupalhe chinene ahorie ulhama tho.
16Chihaawo chittu sita chinaarusha Apwiiya Nlhuku,
eiyo, chittu saba chinaarusha.
17Miitho yo itiamaru,
nlhimi wo woothacha,
miono ineeva attu ahittekilhe ittu.
18Nrima unoopuwelha mitheko cho uhilhoka,
mieto chinottawelhe upanga chittu cho unanara,
19ntu anohimia chittu cho woothacha,
ni ntu nothotheria injoove munlhokoni mwa amuchi.
Waamukiya mwaha wo ulhuva
20Mwaamwanaka, uvarechesheke malhehero a athumwananinyu,
mena nhilhiyalhe meettuchiho a anumwaninyu.
21Mweesheke munrimani mwinyu mahuku onkhaye,
uttukelhelheke thoko nkufu nshikoni mwinyu.
22Anouholhelhani mphironi mwinyu,
anoulhitani vanorupa inyu,
anouvahani irusho unari miitho uthana wonkhaye.
23Ukhalhawaya malhehero ayo phi ikhandiri inyu,
ni meettuchiho ayo phi nthuko.
ni ureeriha waya thoko iphiro yo ukumi,
24Anoushungani wa nthiyana o uhilhoka,
anowookholha ni malhove orera a nthiyana oolhava.
25Nhiinttuneke nthiyana uyo wo nlhattu wo urera wawe,
nhirumelhelhe uwaya wo nlhattu wo makwikhwi awe.
26Ukhalhawaya nthiyana o ulhavalhava noothurulha ata ikipande yo nkatte,
nansho wa nthiyana a ntu nkina nnoopoteriha kila ittu.
27Chani, nnowooria uvalhelha mooro vakhakachani winyu,
wo uhipaha ikuwo chinyu?
28Chani, ntu nowooria unyikhalha makhalha o mooro,
wo uhiivia mieto chawe?
29Phi ri awe nlhopwana vanonrupana awe nthiyana a ntu nkina,
khanooria ukufia nttwarusho.
30Attu khanonheulhacha ntu o wiiya
eiyaka wo nlhattu wo ithalha iri nawe,
31nansho avariyaka noolhiva mikwaha saba,
tho, nookumiha nhakhu wonkhaye arinawe.
32Nansho nlhopwana nonrupana nthiyana a ntu nkina, khaarina irusho,
yoyo neerimeelhiha mwanene.
33Noorakalha ni uveehachiya,
ni ishoni awe kinthama mahuku onkhaye.
34Ukhalhawaya ihache yo owaannya awe inooparelha chinene,
ni mena khanoona ikiriri vanolhiviha awe.
35Khanottuna ulhiviya ittu iriyoothe,
nookhota ata avahiyaka ittu yuulhupalhe chinene.
The Bible Version in Makua @The Word for The World International and Makua Language translators. All rights reserved.