Imethali 5
5
Waamukiya wo nlhattu no ulhavalhava
1Mwaamwanaka, mwiiwelhelheke irusho chaka,
Mwiiwe rata malhove aka o irusho.
2Mwoorieke upanga chittu choreera,
ni iyano inyu yuulhumacheke malhove moombone.
3malhove a nthiyana o ulhavalhava anochiva thoko urawo,
ni malhove awe yo woolhwa upwaha makhura yo izeituni,
4nansho umalhelha waya yanowiawa thoko iyaamwe,
yo wiithia thoko uphanga uneethiya uno ni uno.
5Inyaa chawe chinorwaa vathi unokhwani,
ni ihatua chawe chinorwaa unaminepa.
6Yayo khanolhoha iphiro cho ukumini,
iphiro chawe cho ukukuriacha, nansho khanochuwelha ittu.
7Vanova inyu achishaanaka, nkiiwelhelheke,
nhilhiyalhe mena malhove aka.
8Paahi etu nkhalheke utayi ni iphiro chawe,
mena nhaatamerie nkhora wo inupa awe.
9Nhiwe waavaha akina machiri inyu,
ni waavaha attu o ushilhilhi iyaakha chawo
10Alheto anookusha nhakhu inyu,
ni nkukuta nawo nihiwe naapuhiha alheto.
11Vanomalhelha aya ukumi awo unowa wunlha,
iruttu inyu vanohalha aya ukufia machiri.
12Vavawo nnoowa mweera, “Mooneke chinre aka wo urushiya ni mwaha wo utwarushiya,
ni uhirumelhelha waamukiya munrimani waka?
13Akeewelhelhe nlhove owittuchiha aka,
mena uweewelhelha anokiittuchiha.
14Vanova kiri vakhiviru utanganyaa,
mu nlhoko wa attu utanganyaa.”
15Nthiyana ri thoko ilhushi yo maashi oombone,
uwurieke maashi o ilhushi inyu mwanene.
16Wo ishiyani nrapo ninyu nimwaarushiye utayi,
ni mashepa o maashi akhoolhe mmaphironi?
17Nhiyeke yakhalhe yawinyu mwanene,
mena uhaakawelhe attu akina.
18Nrapo ninyu nivahiyeke ibarakha,
waapuhaneke ahanu inyu waavenke inyu unari mmirawo.
19Yoyo orera thoko ipilha, orera thoko naahe.
Uttuna wawe uuvahekeni mpuha kila ikatema,
ni uttuna wawe urukureriani ikatema yonkhaye.
20Mwaamwanaka, wo ishiyani uwaya wa nthiyana o ulhuva?
Wo sheni unkumbatira vakhakaachani nthiyana nlheto?
21Muupuwelheke wiira, iphiro cha attu chinoochuwania umihoolho wa Apwiiya Nlhuku,
ni uyo anowoona kila ittu inopanga awe ntu.
22Ntu o uhilhoka novariya wo uwonya wawe mwanene,
novariya ni uwonya unopanga awe mwanene.
23Yoyo nokhwa wo nlhattu wo uhiitimarikha,
norimeelha wo nlhattu wo ukumbafu awe mwanene.
The Bible Version in Makua @The Word for The World International and Makua Language translators. All rights reserved.