Imethali 4
4
Ifaida cho Irusho
1Achishaanaka, mwiiwelhelheke meettuchiho a athumwaninyu,
mwiiweke rata upatteke irusho.
2Ukhalhawaya kinouvahani malheheriyo moombone,
nhikhote meettuchiho aka.
3Ikatema kaari mwaana wa athumwanaka,
kaari mwaana o veeka kittuniye ni anumwanaka.
4Athumwanaka ahookittuchiha wiira,
“Uvarechesheke malhove aka wo nrima inyu wonkhaye,
nvareke malhehero aka ni inyu nnoolhokelha.
5Upatteke irusho, upatteke uchuwelha,
nhilhiyalhe mena uhirumelhelha malhove aka.
6Nhihiye irusho, ni iyo inouushungani,
nttuneke, ni iyo inoulhitelhelhani.
7Upatta irusho phi ittu yoombone chinene.
Nthamiheke chonkhaye nrina inyu upatteke uchuwelha.
8Nttuneke, ni iyo inouushungani,
mwavarelhelhaka inouuvahani nthimicho.
9Inouttukani mphumburu woreera upambie vamuruni winyu,
inouuvahani ittaji yo nthimicho.”
10Mwaamwanaka, mwiiweke ni upochera malhove aka,
wiira upatteke ukhalha iyaakha chinchi.
11Kihowonihani iphiro cho irusho,
kihouuholhelhihani mu iphiro yo ikekhiaye.
12Mweetaka khachinoutiyelhelhani,
ni mwattawaka, khunokwakwathuwa.
13Uvarechesheke meettuchiho o irusho ni nhihiye yarweeke,
nshungerereke rata wo nlhattu yeyo phi ukumi inyu.
14Nhipange thoko chinopanga attu o uwonya,
mena nhittware iphiro cha attu ohilhoka.
15Nshembeke uwonya waya mena nhaatamerie,
nshembeke nrweeke.
16Attu o uwonya khanorupacha wo uhiwonya,
khanopatta ikhove wo uhinkwakwanya ntu.
17Ukhalhawaya uhilhoka thoko yoolhia aya,
ni ushilhilhi thoko idivai aya.
18Nansho iphiro cha attu oombone chiri thoko nttuko o mapikoosha,
unopharelha ni uthepa uthana wonkhaye.
19Iphiro cha attu ohilhoka chiri thoko ipiiphi totoro,
khanochuwelha ittu inaakwakwathuwiha.
20Mwaamwanaka, mwiiwelhelheke rata malhove aka,
mpatakulheke rata maaru inyu wiiwelhelha moolhumo aka.
21Nhihiye athameke unrimani winyu,
nshungeke rata.
22Ukhalhawaya yayo phi ukumi wa ntu nopatta,
phi nrete wo iruttu awe yonkhaye.
23Nlhiteke nrima inyu upwaha chittu chonkhaye,
ukhalhawaya mwommo phi unokhuma marapo o ukumi.
24Malhove ohilhoka akhalheke utayi ni uwe,
mena iyano inyu ihuulhumache malhove o woothacha.
25Miitho inyu yaweheke rata umihoolho,
mena nhirukunushe miitho inyu uweha ukina.
26Nkooresheke iphiro nnohalhe inyu uvira,
ni iphiro chinyu chonkhaye chinookhalha cho ikekheene.
27Nhirukunuwelhe wiimonono mena wiimushi,
mweto inyu uhivire mu uwonyani.
The Bible Version in Makua @The Word for The World International and Makua Language translators. All rights reserved.