Imethali 3
3
Ikano chikina wa ashimirawo
1Mwaamwanaka, nhilhiyalhe meettuchiho aka,
nansho ushungerereke malhehero aka munrimani mwinyu.
2Ukhalhawaya unowuncherera mahuku yo ukumi inyu,
ni uwiiherani nnema mwinchi.
3Urumelhelha ni ukhulhuvelhiya chihimwalhaane ni uwe mena,
uttukelhelheke nshikoni mwao;
nlhepeke munrimani mwao.
4Chiicho nnoorumelhelhiya ni utotopelhiya,
umihoolho wa Nlhuku ni umihoolho wa attu.
5Waakhulhuvelheke Apwiiya Nlhuku wo nrima awo wonkhaye,
mena uhikhulhuvelhe irusho chinyu mwanene.
6Munkhulhuvelheke Nlhuku wo nrima wonkhaye wo kila ittu nnopanga inyu,
ni uyo anowookholha iphiro chinyu.
7Nhiichoone mwanene wiira nhaana irusho chinchi,
mmooveke Apwiiya Nlhuku ni ushemba mwaha wo uwonya.
8Mwapangaka chiichammo inookhalha ukumi mwiiruttuni mwinyu,
ni machiri mmakhuvani mwinyu.
9Mwaathimicheke Apwiiya Nlhuku wo nhakhu inyu,
ni milhipu cho choolhia chinyu chonkhaye.
10Wo upanga chiicho makhupi inyu yanoochara chinene,
ni mitumpa chinyu cho idivai chinoochara idivai yo naanano.
11Mwaamwanaka, uhikhote waamukiya ni Apwiiya Nlhuku,
ni mena uhirushiye vanochacheria inyu,
12Ukhalhawaya Apwiiya Nlhuku anowaamuka attu anaattuna,
thoko naangoro chinaachachera aya mwaamwanawe anonttuna.
13Horeeriya ntu novitulha irusho,
ntu ulhe nopatta uchuwelha,
14irusho phi choombone upwaha isiliva,
ihana ifaida upwaha idhahabu.
15Irusho chihaana nhakhu mwinchi upwaha ijohari,
khiiwo ittu iriyoothe nnottuna inyu inoolhikana ni yeyo.
16Moono awe wo wiimonono uhoochara mahuku menchi,
moono awe wo wiimushi uhochara nhakhu ni nthimicho mwinchi.
17Iphiro chawe chiri cho urera,
mitalha chawe chonkhaye chiri cho mpuha.
18Irusho phi mwiri wo ukumi wa attu onkhaye anokhulhuvelha,
ahoreria attu onkhaye anovarelhelha.
19Apwiiya Nlhuku aheesha misingi cho ilhapo wo irusho chawe,
Apwiiya Nlhuku wo uchuwelha waya aholhipiha irimu.
20Uvirelha wo irusho chaya ibahari cho wiisha chahoomiania,
ni mahute ahomoriha ukhame mwiilhaponi.
21Mwaamwanaka, uvarechesheke irusho choombone ni ibusara,
nhihiye chithame mmiithoni mwao,
22Ni chiyo chinouvahani ukumi munrimani mwao,
ni inepo cho ureera nshikoni mwao.
23Vavawo nnowooria urwaa wo mpuha,
mena mweto inyu khachinokwakwathuwa.
24Vanorupa inyu khunova ittu,
eiyo, vanorupa inyu ikhove tapatapa.
25Nhoove uthuthushiya,
mena ukelhelhia ukhuma wa attu o uhilhoka,
26Ukhalhawaya Apwiiya Nlhuku anookhalha phi nikhulhuvelho ninyu,
ni anoushembihani nhiwe mwaawaya munriankhoni.
27Nhaathuwe attu anoovendani nsaada,
mwakhalhaka nhaana machiri o upanga chechiyo chittu chiyo.
28Uhimwiirelhe amwaatamana inyu
nhokolhie mpaka meelho, uweeke kinouvaha,
uno wooriaka unvaha ittu inothanana awe lhelho.
29Nhipange chittu cho uhilhoka wa amwaatamana awo,
anokhalha vakhiviru ni uwe wo uhikhalha ni nipampa.
30Nhaanane ni ntu wo uhikhalha nlhattu,
yakhalhaka khanouttekelha ittu iriyoothe.
31Uhintotopelhe ntu o ushilhilhi,
mena uhittware meetelho awe.
32Ukhalhawaya attu o uhilhoka anoorushiya ni Apwiiya Nlhuku,
nansho anowaattuna attu anopanga chittu cho ikekhiaye.
33Apwiiya Nlhuku noolhupelha inupa cha attu o uhilhoka,
nansho anoohelha ibarakha inupa cha attu anopanga chittu cho ikekhiaye.
34Nlhuku nowaaveehacha attu o mattepwa,
nansho nowooniha nnema wa attu anorumelhelha.
35Attu ari ni irusho anoopatta nthimicho,
nansho akumbafu anowoona ishoni.
The Bible Version in Makua @The Word for The World International and Makua Language translators. All rights reserved.