Imethali 30
30
Malhove o irusho a Naaguri
1Malhove a Naaguri, anaaya Nayake, Namausia ntu ulha aahimenrie Naithieli, eiyo Naithieli ni Naukali wiira,
2mii phi nkumbafu chinene, upwaha attu onkhaye,
akirina irusho thoko attu akina.
3Akeettuchihilhe ukhalha ni irusho, mena akinchuwelha ittu uchulhu wa Apwiiya Nlhuku ari ntakatifu.
4Phi apani aawelhe wiirimu ni ukhuruwa vathi?
phi apani avanre iphioo mmathathani mwawe?
phi apani attukilhe maashi ikuwoni mwawe?
phi pani eeshilhe miinano yonkhaye yo ilhapo? nchina nawe mpani?
Ni nchina na mwaamwana awe? Nkihimerie mwakhalhaka nnonchuwelha!
5Malhove onkhaye ya Nlhuku phi ikekheene, phi ichikopa ya attu onkhaye anoonthawelhelha. 6Nhuncherere nlhove mu malhove awe, ahiwe ochacherani, ni inyu nkawooniya wiira ntu o woothacha.
Imethali chikina
7Kiuhimierani chittu piilhi chilha ama mararu kinolhapelhani inyu Nlhuku, mena nhikiittuwe kihinaya ukhwa; 8Nkithamihelhe wootha waka, nhikivahe ushikini ama nhakhu mwinchi, nkivahe yoolhia kinottuna aka, 9kihiwe khaawona ni uukhotani, kiiraka, “Apwiiya Nlhuku phi apani?” mena kihiwe ukhalha mmashikini nkikeeya, ni uruwana nchina ninyu, inyu Nlhuku aka.
10Uhimwootherieke ahanu a ntu nkina, ahiwe uulhavani, ni inyu nkamwaatteka.
11Ihaawo iyari ya attu inaalhava manyaathumwanawe, mena khanaashukuria manyaanumwanawe.
12Ahawo attu aneechoona wiira oombone, nansho khaneettukuria uwonya wawe.
13Ahawo attu akina o itiamaru ni o uttikineeha! anoopangelha mattepwa kila ittu inoona awe.
14Ahawo attu o miino moolhupalhe thoko uphanga, ni mwaalho o wiithia uno ni uno. wiira aalhakalhihe amashikini, vamoka ni attu o uphavelha mmilhokoni mwa attu.
15Namruba ahaana ashimialhi eelhi aneera, “Nkivahe, nkivahe!” chihaawo chittu ttaaru chihinowona, eiyo, chittu ncheshe chihineera paahi.
16Nihiye, ni nthunkwa na nthiyana hinoyara, ilhapo ihinooma maashi, ni mooro uhineera paahi.
17Niitho na ntu anompangelha athumwane ncheche, ni umpangelha ncheche anumwanawe, anakukhu o unikoteni anoonthova, ni ulhia ni nrepo.
18Chihaawo chittu ttaaru kinoshanga aka, eiyo, chittu ncheshe kihinochuwelha aka;
19Chitottora chinovava awe uchulhu irimu,
Inwaa chineepurulha aya vamwalhani,
Imeli chineeta aya umaashini,
nlhopwana ni nthiyana chinottunana aya.
20Phi ri aya meetelho a nthiyana nolhavalhava, nolhia ni unyawa iyano awe, nkeera, “Akithekilhe ittu riyoothe yo uhilhoka.”
21Chihaawo chittu ttaaru chinotetemiha ilhapo, eiyo, chittu ncheshe chihinooria uvilhelhiya,
22Ipotta vanokhalha awe mwene, nkumbafu nowona awe yoolhia,
23Nthiyana ahinttuniya vakittu athelhiye awe, ni karumiya vanorupa aya ni owaannya aya apwiiya awe.
24Ahaawo ashimwettu ncheshe akani velhaponi, nansho chihaana irusho chinchi.
25Inenelhe ashimwettu ahirii ni machiri, nansho anowiishungelha cholhia iitha;
26Machecheta, ashimwettu ahiri ni machiri, nansho anowiitekelha inupa aya veeruwani.
27Anashombe, khaarina mwene, nansho onkhaye urwaa vamoka wo makuttiro,
28Anaakoko, nnowooria unvara mmathathani,
nansho anookelha mu ihano.
29Ahawo ashinama araru arii ni meteelho yo ureera, eiyo, arii ncheshe arii ni meteelho oombone.
30Kharamu, mwannama arii ni machiri waapwaha ashinama onkhaye, mena khanomwova mwannama nkina riyoothe;
31Nthupi neeta wo utinga vamoka ni ipuri, ni amwene umihoolho wa manyaasikari aya.
32Yakhalhaka nhookhalha nkumbafu ata nkamweetotopelha, ama upanga miruku cho unanara, nshungeke iyano inyu. 33Ukhalhawaya waataka nipelhe anookhuma mapelhe, ni mwaataka ntu mphulhani nookhuma iphome, ni uthotheria nrushiho unoowiha indewo.
The Bible Version in Makua @The Word for The World International and Makua Language translators. All rights reserved.