Imethali 31
31
Moolhumo a amwene Nalemueli eettuchihiye ni anumwanawe
1Malhove a amwene Naemueli eettuchihiye ni anumwana awe;
2Kuuhimeriekeni ittu yaani mwanaka? kuuhimeriekeni ittu yaani mwanaka kuuyanreni? kuuhimeriekeni ittu yaani inyuva kuuvende aka wa Nlhuku? 3Nhimalhihe machiri inyu wa athiyana, nhaavahe nhakhu inyu attu anaatanganyaa mamwene. 4Khinlhoka inyuva Nalemueli, khinlhoka mamwene uwuria idivai, mena ahoolhelhi uttuna utheka, 5Ahiwe uwuria nkaalhiyalha malhehero, ni waathuwa amashikini ikekhiaye chaya. 6Unvaheke utheka wo nlhattu na attu apoterie, munvaheke idivai ntu ri ni ichuku unrimani. 7Awuriecheke ni ulhiyalha ushikini awe, ahuupuwelheke tho nihuvo nawe.
8Nansho inyuva, nhimieke wo nlhattu no alhe ahinooria wiulhumachera, ni waakavihera attu onkhaye anophavelha.
9Muulhumacheke wo nlhattu aya ni waamulha wo ikekhiaye, mwaavahe amashikini ni attu anophavelha ikekhiaye aya.
Nthiyana oombone
10Nthiyana oombone phi apani anooria unpatta? Ulhoka wawe unoopwaha ittu yo nhakhu!
11O uwaannya awe noonrumelhelha chinene, mena khanooria ukufia upatta ittu inothanana awe wa ahanu awe.
12Khanaapangelha owaannya awe chittu cho unanara, nansho noompangelha moombone mu ukumini mwawe wonkhaye.
13Nowaavia mapururu o uteelha, ni upanga mitheko chawe wo miono chawe wo uvilhelha.
14Anokhalha thoko imeli cho maronda, chinowiha yolhia awe ukhuma utayi.
15Nowuunkwa mapikoosha, waavierani yolhia ashilhoko awe, ni waakawelha mitheko anamitheko awe.
16Anowaavia imata ni uttuma, ni ulhima izabibu wo miono chawe mwanene.
17Anopanga ntheko wo machiri awe, ni ulhipiha miono chawe mwanene.
18Noochuwelha wiira maronda awe anowuunnchereria, noopanga ntheko mpaka uhiyu.
19Nooritta nripwe wo miono chawe mwanene, ni utotta ikuwo chawe.
20Nowaakavihera amashikini, ni waavaha attu hineechooria wo nrima o uttuna.
21Wo nlhattu na attu aya khanoova nveevelha o ilhimwe, ukhalhawaya kila mmoka ahaana ikuwo chinchi.
22Nowiikoroshelha matatto yo waathalha vankorini vawe, ikuwo chawe cho irangi cho izambarau yoombone.
23Owaannya awe noothimichiya mu iwaani, mu attu o waamulha milhatu o ilhapo.
24Noototta ikuwo ni waattumihera attu nansho tho nowaattumihera anamaronda michako.
25Machiri ni nthimicho phi utotopelhiya wawe, nootelhiya ni khanoopuwelha meelho.
26Noolhumacha malhove yo irusho, ni weettuchiha akina malhove o ureera.
27Nowaashunga attu o uwaannya awe, ikatema yonkhaye nopanga ntheko.
28Achishaana aya anowuunkwa wichishu ni unvaha ibarakha, owaannya awe nowiipa ni untotopelha.
29Eeraka, “Ashithiyana enchi ahopangacha chittu cho ushangiha, nansho inyuva uhaapwaha athiyana onkhaye o veelhaponi va.”
30Utinga unoothephiacha ni ureera khunlhoka, nansho nthiyana naathimicha Apwiiya Nlhuku noototopelhiya.
31Ntukutta nawe ninoophwanelhiya ulhiviya, ni mitheko chawe chihothanania uvahiya nthimicho.
The Bible Version in Makua @The Word for The World International and Makua Language translators. All rights reserved.