Imethali 29
29
1Ntu naamukia kila nihuku alhipihaka ishiko aya, noorakalha wo uthuthuwelha hilhame tho.
2O ikekhiaye atawaraka attu anoshangarara, Nansho attu o uhilhoka atawaraka attu anootukutuwacha.
3Nottuna irusho nooteelhiha athumwanawe, nansho novaraana ni nthiyana o ulhava noopoteriha nhakhu awe.
4Amwene akhalhanaka ikekhiaye ilhapo inookhalha ni ibarakha, nansho athananaka uvahiya nchurukhu ilhapo inootanganyaa.
5Ntu riyoothe nontotopelha amwaatamana awe wo wootha, nooria nriankho ni uwaya mwanene.
6Ntu o uhilhoka noowaya wo uwonya awe mwanene, nansho ntu o ikekhiaye nowiipa ni ushangarara.
7Ntu o ikekhiaye nowaavaha ikekhiaye amashikini, nansho ntu o uhilhoka khanochuwelha chittu chiyo.
8Attu o mattepwa anoovirikaniha ilhapo yonkhaye, nansho ri ni irusho nomaalhiha nrushiho.
9Ntu o irusho oopaka mwaha ni nkumbafu, nkumbafu noothunalha ni uthia wo mattepwa mena khuuwo mpuha.
10Attu neeva noowavenga attu oombone, nansho attu oombone nowopolha ukumi a attu akina.
11Nkumbafu nowooniha nrushiho naya nonkhaye, nansho ntu o irusho nowiivitha ni umaalha.
12Amwene eewelhelhaka malhove o woothacha, attu o ipilhi onkhaye khanolhoka.
13Ntu mmashikini ni ntu o nhakhu anolhikaana wo ittu imoka, ahovahiya miitho onkhaye eelhi ni Apwiiya Nlhuku.
14Amwene aatawara rata amashikini, imwene awe inoolhokelha mahuku onkhaye.
15Ikopo ni waamukiya unowiiha irusho, nansho mwaana ahiiye upanga ittu inothanana yoyo noomwiihera ishoni anumwanawe.
16Attu o uhilhoka atawaraka uhilhoka unowunchereria, nansho attu o ikekhiaye anowoona wuulhuwa wawe.
17Umwaamukeke mwaamwana inyu, ni uyo nouvahani mpuha, ni uyo nooteelhiha nrima inyu.
18Vakittu vahiri ni anamilhohi, attu anoorimeelha, horeeriya ntu anovarechesha malhehero.
19Ipotta khanaamukia wo malhove veekha aya, inakhalhaka noochuwelha wiira khanovarechesha.
20Chani! nhomwoona ntu noolhumacha pufia, nambaya unkhulhuvelha nkumbafu kuliko uyo.
21Yakhalhaka ntu ahonlhelhia pufia mwaamwana aya, umalhelha waya mwaana uyo noohuviha chinene.
22Ntu o urushiya chinene noothotheria indewo, ni ntu waana nowonya chinene.
23Itiyamaru ya ntu inoomuulhusha mwanene, nansho aneekurusha noopatta nthimicho.
24Nokavihana ni ntu o wiiya aneelhakalhiha mwanene, ata alhupelhiyaka mena khanooria wuulhumacha nlhove.
25Uwoova attu phi wiiriya nriankho mwanene, nansho noonkhulhuvelha Apwiiya Nlhuku ri nkumi.
26Attu enchi aneepepechiha wa amwene, nansho ikekhiaye ya ntu inokhuma wa Apwiiya Nlhuku.
27Ntu o uhilhoka noorushiya ni attu o ikekhiaye, ni ntu o nrima woombone noovengiya ni attu o uhilhoka.
The Bible Version in Makua @The Word for The World International and Makua Language translators. All rights reserved.