Imethali 2
2
Nttuvo no irusho
1Mwaamwanaka, mwarumelhelhaka malhove aka, ni ushungerera chinene malhehero aka; 2mwiiwelhelheke rata irusho, ni nrima inyu upatteke uchuwelha, 3eiyo, mwavendaka nvahiye irusho, munlheke wiira npatteke uchuwelha, 4Mwaaviaka irusho thoko isiliva
ama thoko nhakhu uvithiye, 5vavawo nnoochuwelha maana yo umoova Apwiiya Nlhuku, ni uchuwelha maana yo unchuwelha Nlhuku. 6Ukhalhawaya Apwiiya Nlhuku anowaavaha attu irusho, ni umalhakuni mwawe anookhuma malhove o irusho ni o uchuwelha. 7Anoweeshera irusho choombone attu o mirima choombone, yayo phi mwaakiho wa attu anolhokelha wo urumelhelha. 8Anooweha rata meetelho a attu o ikekhiaye, ni ushunga iphiro cha attu o urumelhelha awe. 9Paahi mwaakiiwelhelhaka nnoochuwelha meetelho oombone ni ikekhiaye, ni nnochuwelha ittu inothananiya upangiya. 10Ukhalhawaya irusho inookelha munrimani mwinyu, ni irusho uchuwelha unouttunani. 11Irusho inouulhitelhelhani, ni uchuwelha unoushungani, 12irusho chinoowokholhani ukhuma mu iphiro cho unanara, ni wa attu o wuulhumacha pufia, 13Attu alhe anohia iphiro chaya choombone wiira etakache mwiiphiro cho uhilhoka, 14attu alhe anoshangarara upanga chittu cho uhilhoka, ni uchivelhiya mwaha o uwonya, 15attu apotenre meetelho chaya, ni iphiro chaya cho uhaaminika. 16Irusho chinoupangani wiira munchuwelhe nthiyana o ulhuva, nthiyana o ulhuva ri ni malhove o uchivachiva, 17nthiyana nonhiya nlhopwana o umirawo aya, ni ulhiyalha nlhehano na Nlhuku awe. 18Ukhalhawaya inupa awe inohoolhiha mukhwani, ni iphiro chawe chinokelha unaminepa. 19Ntu riyoothe norwaa wa nthiyana uyo khanohokolhia, mena khanohokolhelha iphiro yo ukumi. 20Paahi etu nnoottwara iphiro cha attu orera, ni uvaraana ni attu orera nrima. 21Ukhalhawaya attu o orera nrima anookhalha veelhaponi, ni attu o waaminika anokhalha mwoommo. 22Nansho attu o uhilhoka anoothamihia mwiilhaponi, ni attu o uwonya anoophelhiya ukhuma mwommo.
The Bible Version in Makua @The Word for The World International and Makua Language translators. All rights reserved.