Imethali 27
27
1Nhiitotopelhe wo nlhattu no meelho, khanochuwelha ittu inohalha aya ukhumelhelha lhelho.
2Nhiyeke attu akina oototopelhekeni, mena kahena iyano inyu mwanene, ni ntu nkina ototopelhekeni kahena nlhimi ninyu mwanene.
3Nlhuku ni nhaava chonkhaye chiyo choolhemelha, nansho urushiha wa ntu nkumbafu unoothepa chonkhaye elhi chiyo.
4Urushiya khurina ikiriri ni nrushiho ninoolhakalhiha, nansho phi apani anooria uvilhelha ihache?
5Nambaya waamukia voonene, kuliko ntu novitha uttuna.
6Marakalhiho a mannyampwaana anowooniha uttuna chinene, nansho nikumbatiro na amalhaponi nowootha.
7Ntu arupanlhe ata avahiyaka urawo khanttuna, nansho ntu ri ni ithalha ata ittu yo uwaawa inonchiva.
8Ntu apotenrie utayi ni uwaannyawe, rii thoko mwaanuni apotenre mu iphuuru awe.
9Makhura onukelha ni chittu chikina cho unukhelha chinooteelhiha nrima, ni ulhoka wa mpwana unochokholha mu malhove awe o uttuna.
10Nhihiye anlhoko inyu ama anlhoko a athumwaninyu, mena nhirwee wa ahima inyu, ikatema yo uhuva. Nambaya urwaa wa amwaatamana arii vakhiviru kuliko ahima inyu rii utayi.
11Mwaamwanaka nkhalheke ni irusho mpatteke ukiteelhiha nrima aka, wiira kipatteke umwaakhulha ntu o mattepwa.
12Ntu o irusho anowoona ittu yo woopiha, nansho ntu nkumbafu noorwaa umihoolho nkaarakalha.
13Ntu alhupelhaka umihoolho winyu umweeshera idhamana nlheto, nkusheke ikuwo chawe, nvarelhelheke nlhove nawe wiira apangeke chiicho.
14Ntu anoonvaha nkhunana awe ibarakha wo nlhove nuulhupalhe mapikoosha, ittu iyo inolhakelhiya thoko ulhavia.
15Nthiyana o indewo mahuku onkhaye, ri thoko nveevelha ninothepa; 16unchiichiha yoyo uri thoko Utiyelhelha iphioo, ama uvara makhura yo maashi moononi awe.
17Yuuma unona yuuma ikina, chiichammo ntu nowiittuchihiya ni nkhunanawe.
18Ntu noshunga mwiri noolhia mapephu yo mwiri uyo, ni karumiya nonshunga Athithi awe noothimichiya.
19Thoko chinoona inyu ikhove inyu mmaashini, phinechoona ntu munrimani mwawe.
20Unaminepa ni utanganyaa khunowona, ni miitho a attu khanowona.
21Urera wo isiliva ama idhahabu chilhikachiye vamooroni, ni ntu anoophimia ulhikaana ni utotopelhia unovahiya awe.
22Ntu nkumbafu ata mwaanthitaka uraweni, ukumbafu awe khunooria uthama.
23Nshungeke rata mihuwo chinyu, nlhiteke mikuttiro cho ashinama, 24ukhalhawaya nhakhu khunolhokelha mahuku onkhaye, mena ittaji khinolhokelha iyari chonkhaye. 25Ikatema mataakhuru yo wuuma anootupulhia ni mataakhuru yo naanano anoomelha tho, ni mataakhuru ukhuma umwaakoni ahothothokanihiya, 26mapururu o ikhondoro chanyu chinouvahani ikuwo, ipuri chinyu nnoottumiha ni uthuma mamatta. 27Chinouvahani mapelhe menchi yo ipuri uwuria inyuva ni ashilhoko inyu onkhaye, ni wo nlhattu na akarumiya inyu ashithiyana.
The Bible Version in Makua @The Word for The World International and Makua Language translators. All rights reserved.