Imethali 26
26
1Nthimicho anovahiya nkumbafu khaninonlhoka, iri thoko itheluji yo iitha, ama ipulha ikatema yo nlhaalha.
2Unlhava ntu o ikekhiaye khunaapatta. Thoko nttoche ama imbayuwayu vanovava awe, phi chiichammo unlhava ntu o ikekhiaye khunaapatta ntu.
3Ikopo wo afarasi, nikonkwa wo iphuta, ni ikopo mu nthanani mwa attu akumbafu.
4Nhimwaakhulhe nkumbafu thoko ukumbafu awe, uhiwe mwaalhikaana ni uyo.
5Umwaakhulheke nkumbafu ulhikaana ni ukumbafu awe, ahiwe wiichoona ukhalha arinaa irusho chinene.
6Unruma nkumbafu ittu, ri thoko wiitupulha mwanene mweto ama waavia itatako.
7Imethali iyanoni mwa akumbafu, ri thoko mieto cha ntu o uremara.
8Unvaha nkumbafu nthimicho, ri thoko weesha igololi mmaanatini.
9Nkumbafu wuulhumacha imethali, ri thoko ntu ahapalhiye anolhikacha uphelha mwiiwa wo mathathawe.
10Ntu anoonvaha ntheko nkumbafu ama ntu ahapalhiye, ri thoko ntu o ulhupatta anoonrakalhiha kila ntu.
11Thoko malhapwa anohokolheelha maraphioo awe, phi nopanga awe ntu nkumbafu uhokolheelha tho ukumbafu awe.
12Nnoomwona ntu aneechona wiira ahaana irusho? Kinouhimeriani wiira, nambaya nkumbafu kuliko ntu uyo.
13Ntu nreeshi aneera wiira, uphironi uwo haawo kharamu, akinooria urwaa.
14Thoko nlhako vanorukunuwa awe mu ibawaba chawe, phi nopanga awe nreeshi vankorini vawe.
15Nreeshi noomia yolhia wo miono chawe, nansho khanooria urweeha iyanoni.
16Nreeshi nowiichona wiira ahaana irusho, waapwaha attu saba anooria waakhulha wo irusho.
17Ntu aneehuviha ni indewo hirii yawawe ni urushiya, ri thoko ntu nonvara manyaru malhapwa anovira.
18Thoko nahalhahalha anottweelhiha mithuko cho mooro, ama miura chineeva,
19Phi riawe ntu anoonpoteriha amwaatamana awe, ni uhimia, koopa mwaha tu
20Mooro unottipia wo uhikhalha ni ikhuni, wo uhikhalha ni ntu o uthotheria, indewo inoomalha.
21Thoko makhalha ama ikhuni chinoparihelha awe mooro, phi riawe ntu o waana chinothotheria awe indewo.
22Malhove a ntu o wootha ri thoko yolhia yochiva, vanomiriya awe munthunkwani.
23Thoko yoopwe ilhokihiye rata, phi ri aya malhove o urera akhumilhe mu nrima o unanara.
24Ntu o ichuku noovitha ichuku awe wo malhove moombone, nansho munrimani wawe uhonanara.
25Olhuumachaka malhove moombone nhiinrumelhelhe, munrimani mwawe horushiya chinene.
26Inowooria wiira novitha ichuku awe, nansho chittu cheevithilhe munrimani mwawe chinohumbukulhiya wa attu onkhaye.
27Ntu nonthipelha nkhunanawe nlhikiti, nootumbuchira mwanene, ntu nopirikisha nlhuku ninonhokolheelha mwanene.
28Nlhimi o wootha unaarushiha attu neewa, ni iyano ineepepechiha inoowiha malhakalhiho.
The Bible Version in Makua @The Word for The World International and Makua Language translators. All rights reserved.