Imethali 25
25
Imethali chikina cho Naselemani
1Chilha phi imethali chikina cha amwene Naselemani, chalhephiye tho ni attu o Nahezekia, amwene o Uyuda.
2Utotopelhiya wa Nlhuku unoovitha chittu, nansho amwene nothimichiya wo malhove chinoolhumachaya.
3Thoko irimu chiri aya utayi chinene ni nchusha no ittaya, phi chiichammo mirima cha mamwene khachinooria uwehecheshiya.
4Nthamiheke ikokholha mu isiliva, ni ntu o chipara noukhoroshelhani ittu yoombone.
5Mwaathamiheke attu o uhilhoka umihoolho wa amwene, ni utawara wawe unookhalha o ikekhiaye.
6Nhiipepechihe wa amwene, mena nhiipangeke nhoolhelhi;
7Nambaya amwene mwanene ohimeriekeni wiira, mmweeke mwaakhalha umihoolho va kuliko uthamihiya umihoolho wa ashulhupalhe. Mwaha woonilhe wo miitho inyu,
8Nhaakuvie urweeha mwaha umahakamani, nnohalha upanga ittu yaani umihoolho vawo, ntu ohimiechesha nkina arukunushaka malhove muulhumanche inyu ayo?
9Mmalhiheke indewo ni nkhunaninyu, ni kila mmoka inyu hikumihe vathe malhove a nkhunana awe,
10Attu ahiwe uchuwelha wiira ihaawo ittu ivithiye, nhiwe mwaatanganya nthimicho ninyu mahuku o uhimalha.
11Nlhove ninoolhumachia wo ikatema aya, phi thoko inepo cho idhahabu vachulhu malhuku o isiliva.
12Waamuka wa ntu o irusho wa ntu neewa, uhoreera upwaha ipete ama idhahabu yoombone.
13Akarumiya o ukhulhuvelhiya noonteelhiha ntu anrumme awe, thoko maashi yo uririya ikatema yo ntukutta no iitha. Noopanga nrima wa Athithi awe uteelhiye.
14Thoko mahute ni iphioo wo uhikhalha ni ipulha, phi chiichammo ntu neetotopelha ukumiha nttuvo ahikhumihe.
15Wo uvilhelha ntawara nooria waarukunusha attu, nlhimi no woolhwa ninowuntha makhuva.
16Mwapattaka urawo, nlhieke vakani, uhiwe mwaawona chinene ni uraphiaa.
17Uhimweetelhelhe amwaatamana inyu kila nihuku, uhiwe mwanhuviha nkoovengani.
18Ntu nohimia malhove yo wootha wa nkhunanawe, inowoopiha thoko indoonga, uphanga ama muura wo wiithia.
19Unkhulhuvelha ntu o uhilhoka ikatema yo uhuva phi thoko niino no wuunthia ama mweto o uremara.
20Umwiipelha nchipo ntu ri ni ichuku munrimani, ri thoko urulha ikuwo ikatema yo uririya, ama uhelha chisambwani vanikhwatani.
21Mmalhaponi inyu wolhiyaka ithalha, munvaheke yolhia. Awolhiyaka nttona, munvaahe maashi.
22Ukhalhawaya nnoonvalhelha makhalha o mooro vamuruni wawe, ni Apwiiya Nlhuku anouuttuvani.
23Iphioo inokhuma mpatta o nchulhu inoowiiha ipulha, chiichammo malhove yo unanara anoowiiha nrushiho.
24Nambaya ukhalha vaphirothi inupa, kuliko ukhalha inupa vamoka ni nthiyana o indewo.
25Thoko maashi o uririya wa ntu ri ni nttona, phi chiichammo mwaha orera ukhuma utayi.
26Ntu o irusho attwaraka chittu cho uhilhoka, phi thoko nthapwi nirihelhiye ikokholha ni ilhushi ikhoronyihiye
27Kuhena mwaha woombone ulhia urawo mwinchi, wo chiichammo khinlhoka wiichaavelha nthimicho mwanene.
28Ntu hinooria uchiichiha nrushiho nawe, ri thoko iwaani hirii ni ishiri.
The Bible Version in Makua @The Word for The World International and Makua Language translators. All rights reserved.