Imethali 24
24
Nuulhumo no khumi ni tisa
1Nhoonelhe ihache attu o uhilhoka,
mena nhithanane ukhalha vamoka ni ayo,
2Ukhalhawaya mirima chaya chinowuupuwelha ushilhilhi,
ni iyano chaya chinoolhumacha pufia.
Nuulhumo no makhumi melhi
3Inupa inothekiya wo irusho,
ni ulhipihiya wo uchuwelha,
4wo iphiro yo irusho ichuumba chawe chinoochara,
chittu cho nhakhu mwinchi ni choombone,
Nuulhumo no makhumi meelhi ni imoka
5ntu o irusho nonvira ntu o machiri,
eiyo, irusho chinoolhoka upwaha machiri;
6Ukhalhawaya wo uhoolhelhiha rata unowooria waatakana ikhoto,
ni ukhalha ni attu o uvaha malhove nnookottolha,
Nuulhumo no makhumi melhi ni piilhi
7wa ntu akumbafu urika uchuwelha irusho,
mu nlhoko wa attu khanooria wuulhumacha nlhove.
Nuulhumo no makhumi melhi ni ttaaru
8ntu noopuwelha chittu cho uhilhoka,
nowiihaniya ntu o uvirikaniha chittu,
9Mwaha anoopuwelha akumbafu phi uwonya,
ntu o mattepwa noorushiya ni kila ntu.
Nuulhumo no makhumi melhi ni ncheshe
10mwakhwaaka nrima ikatema yo nihuvo,
paahi inyuva nhoririelha mmakhuvani,
Nuulhumo no makhumi melhi ni nthanu
11Umwoopolheke ntu akushie wiira eeviye,
nhoove woopolha attu anothananiya wiiviya wo uhikhalha ni milhatu,
12mwahimiaka wiira, hiyaano khanichuwenlhe yayo Nlhuku nophima mirima cha attu nowoona,
anoulhivani ulhikaana ni mitheko inyu,
Nuulhumo no makhumi melhi ni sita
13Mwaamwanaka, nlhieke urawo ukhalhawaya woombone,
nseega naya ninoochiva iyanoni,
14nchuwelheke wiira irusho chiri choombone munrimani mwinyu,
mwapattaka nnookhalha ni makhulhuvelho oombone,
mena nikhulhuvelho ninyu khaninpotera wo mpwettu.
Nuulhumo no makhumi melhi ni saba
15Nhiivithelhe thoko ntu o uhilhoka vanokelhelha aya inupa yo ntu oombone,
mena uhiphomolhe inupa awe,
16Ukhalhawaya ntu o ikekhiaye noomora mikwaha minchi nansho nowuunkwa,
nansho ntu o uhilhoka noolhakalhihiya ni mariro.
Nuulhumo no makhumi melhi ni nane
17Uhithatheelhe umora wa amalhaponi inyu,
uhishangarare munrimani mwinyu wo ukwakhwattuwa wawe,
18Apwiiya Nlhuku hiwe woona ni urushiya,
nkaanhiyerera,
Nuulhumo no makhumi melhi ni tisa
19Nhithunalhe wo nlhattu na attu o uhilhoka,
mena nhoonelhe ihache attu o uhilhoka,
20ukhalhawaya ntu o uhilhoka khanolhokelha mahuku menchi,
ukumi awe unookumihiya. Nuulhumo no makhumi marara
21Mwaamwanaka, unthimicheke Nlhuku ni mwene,
mena uhikhalhe vamoka ni attu o urukunuwacha,
22ukhalhawaya mariro yanowaapatta wo uthuthuwelha.
phi apani nochuwelha inohalha ukhumelhelha?
Moolhumo makina o irusho.
23Alha phi malhove attu o irusho,
waattuna attu akina mu uhukumulhiya khunlhoka.
24Nonhimeria ntu o uwonya, nhaana ikekhiaye,
anoolhavia ni makosho a attu onkhaye mwiilhaponi.
25Nansho anaattwarusha attu o uhilhoka anooteelhiya,
ni ibarakha choombone chinoowawelha.
26Waakhulha wo ikekhiaye,
uri thoko uttuna wa mpwana.
27Mmalhiheke mitheko chinyu vathe,
nlhokiheke imata inyu,
yamalheke nthekeke inupa inyu.
28Nhihimecheshe amwaatamana inyu wo uhikhalha ni nlhattu,
mena uhimwootherie wo iyano inyu.
29Nhihimie, “kinompangelha thoko akipangilhe awe,
kinonlhiva ntu uyo thoko akipangilhe awe.”
30Kahovira vakhiviru ni imata ya ntu nreeshi,
vakhiviru ni imata yo imizabibu ya ntu nkumbafu;
31Kahoshanga woona chihomelha miiwa,
mahichi ahowanelha imata aya yonkhaye,
ni ishiri awe yo malhuku ihophomwaa.
32Kahoweha, nkakoopuwelha,
nansho nkakeettucha ittu.
33Nrupeke vakani, uhichilheke vakani,
mwiichookholhe miono chinyu mwiittuweke,
34Paahi, ushikini unoweelhani thoko ntu o uvara makhuche,
ni uvekelha thoko ntu o ikerero.
The Bible Version in Makua @The Word for The World International and Makua Language translators. All rights reserved.