Imethali 23
23
Nuulhumo no sita
1Mwalhiaka yolhia vamoka ni amwene,
nhilhiyalhe wiira nri vamoka ni apani,
2nchiichihe chinene ithalha inyu,
mwakhalhaka inyu nnoottuna chinene ulhia,
3nhittune cholhia chawe cho uchiva,
ukhalhawaya cholhia chiyo chinowoori uuthepiani.
Nuulhumo no saba
4Yakhalhaka nhana irusho chinchi mwichiichihe,
nhiihuvihe waavia nhakhu,
5uhichilha ni upathusha miitho nhakhu inyu unoopotera,
nnookhalha thoka nhaana mapupha,
ni uvava nchulhu thoko nrepo.
Nuulhumo no nane
6Nhilhie yolhia ya ntu o ilhema,
mena nhithanane cholhia chawe choombone,
7ukhalhawaya munrimani mwawe anowaalhakelha chittu nnolhia inyu,
eeraka wiira, nlhieke, “Mmurieke!”
nansho munrimani mwawe khaawo vamoka ni inyu,
8nnoraphia yoolhia nlhilhie inyu iyo,
ushukuru winyu unookhalha wo mpwetu.
Nuulhumo no tisa
9Nhihimieke malhove inyu umihoolho ya attu akumbafu,
ukhalhawaya khannorumelhelha ikekhiaye yo malhove inyu yo irusho.
Nuulhumo no khumi
10Nhithamihe ikomo cheeshiye khalhai,
mena nhaathurulhe mamata a achishaana ahiiye ni manyanaangoro,
11ukhalhawaya Apwiiya Nlhuku phi moopolhi ni uyo ari ni machiri,
anowaakavihera ikekhiaye uchulhu aya.
Nuulhumo no khumi ni imoka
12Nrima inyu uvareke meettuchiho,
mwiiwelhelheke malhove o irusho.
Nuulhumo no khumi ni piilhi
13Nhihiye umwaamuka mwaamwaninyu,
mwamwaataka wo ikopo kanookhwa,
14mwamwaataka ikopo,
nnoomopolha ukumi awe ni nookhwa.
Nuulhumo no khumi ni ttaaru
15Mwaamwanaka, nrima inyu wakhalhaka ni irusho,
paahi nrima aka unooteelhiya;
16nrima aka unooshangarara,
ikatema iyano inyu yoolhumachaka malhove moombone.
Nuulhumo no khumi ni ncheshe
17Nrima inyu uhoonelhe ihache attu o uwonya,
nansho nthepeke unthimicha Apwiiya Nlhuku mahuku inyu yonkhaye,
18ukhalhawaya ihaawo meelho yo uhimalha,
ni nikhulhuvelho ninyu khanimmalha.
Nuulhumo no khumi ni nthanu
19Mwiiweke, mwaamwanaka nkhalheke ni irusho,
muupuwelheke chinene makhalhelho inyu,
20nhikalheke mmoka a attu o uhapalhiya,
mena attu okongwa ni attu o ikhwilhu,
21ukhalhawaya attu o uhapalhiya ni okongwa anookhalha amashikini,
ni nreeshi anoowaracha matapwata.
Nuulhumo no khumi ni sita
22Mmwiiwelhelheke athumwaninyu,
mena uhihiye umwiiwelhelha anumwaninyu olhuvalhaka,
23nttumeke ikekheene, mena nhittumihe,
nttumeke irusho, meettuchiho ni uchuwelha,
24naangoro ri ni mwaana oombone anoothepa ushangarara,
ni ri ni mwaana o irusho nooteelhia,
25Mwaashangarariheke manyanaangoro inyu,
anumwaninyu oyanreni ni uyo ashangarareke.
Nuulhumo no khumi ni saba
26Mwaamwanaka, nkiiwiwelhelheke wo nrima inyu,
nttwareke meetelho a ukumi aka,
27ukhalhawaya nthiyana o ulhavalhava rii thoko nlhikiti no urekama no waaria attu,
nthiyana ishembwere phi thoko ilhushi yo uyevayeva,
28Noohothelha thoko ntu o vara makhuche,
ni waapanga alhopwana enchi ahaaminike.
Nuulhumo no khumi ni nane
29Phi apani anokhuwelha?
Phi apani o ichuku?
Phi apani anaatakana indewo?
Phi apani anotukutuwacha?
Phi apani arakaanlhe wo uhikhalha ni milhatu?
Phi apani o khwiilha miitho?
30Phi attu anohinothama utheka,
anorwaacha ulhawiha utheka.
31Nhithanane idivai ata wo ukhwiilha wawe,
ata yareeraka mu ikiroto,
vanomiria inyu vammilhoni.
32Umalhelha waya inoweria thoko inwaa,
ni uhoma thoko imboma inohapalha.
33Miitho inyu anookhalha ni naawilhiphi,
nrima inyu wuupuwelha chittu cho unanara.
34Nnoolhikaana ni ntu arupilhe variyari nthapwi nuulhupalhe,
thoko ntu arupilhe vachulhu nipoto no imeli.
35Nnoohimia wiira, “kihaatiya, nansho akachuwenlhe,
Kinoonkwa yakhani?
Wiira kawurieke tho.”
The Bible Version in Makua @The Word for The World International and Makua Language translators. All rights reserved.