Imethali 22
22
1Nambaya ukhalha ni nthimicho wo urera kuliko nhakhu mwinchi,
ulhoka phi ittu yoombone kuliko ukhalha ni isiliva ni idhahabu.
2Ntu o nhakhu ni nshikini aholhikaanacha wo ittu imoka,
Apwiiya Nlhuku phi oopilhe onkhaye eelhi ayo.
3Ntu o ibusara nowoona ittu yo woopiha ni wiivitha,
nansho attu ajinga noorwaa umihoolho ni urakhalha.
4Wiikhurusha ni unthimicha Apwiiya Nlhuku,
unoowiha nhakhu, nthimicho, ni ukumi.
5iphiro cha attu o uhilhoka chihochara miiwa ni miriankho,
ntu nolhitelhelha ukumi awe nowiishembiha.
6Munlhelhie mwaana mu iphiro yoombone,
ni uyo khanolhiyalha iphiro ata vanohalha awe wuulhuvalha.
7Ntu o nhakhu nonttawara amashikini,
ntu nokopa chittu nookhalha ipotta wa ntu nonkopiha.
8Naalha uwonya nokhungura uwonya,
ni uwonya waya unoomalha.
9Ntu o rera nrima nopatta ibarakha,
ukhalhawaya cholhia chawe nowakawelha amashikini.
10Umwoomolheke ntu ri ni ncheche,
indewo ni uruwana chinoomalha.
11Ntu o nrima oreera ni malhove oombone,
nookhalha mpwanaawe mwene.
12Apwiiya Nlhuku noolhitelhelha uchuwelha wo ikekheene,
nansho anoothakaniha malhove a attu o uhilhoka.
13Ntu nreeshi neera, “Kharamu ri vathe,
kihiwe ukhwa mphironi uwo!”
14Iyano ya nthiyana o ulhavalhava phi nlhikiti noorekama,
ntu riyoothe anaarushiha ni Apwiiya Nlhuku noottumbuchera mwommo.
15Mwaana noothanana chittu cho uhilhoka munrimani,
nansho wamwaamukaka wo ikopo uhilhoka unonthama.
16Ntu nomoonelha nshikini wiira apatteke nhakhu,
ni ntu nonvaha ri ni nhakhu nttuvo onkhaye eelhi ayo anookhalha amashikini.
Moolhumo makhumi mararu a attu ari ni irusho
17Mwiiwelhelheke malhove a attu o irusho,
nrima inyu uvarechesheke irusho chaka,
18inyuva nnooshangarara yakhalhaka nnoweesha munrima mwinyu,
ni wiittucha kila ikatema.
19Wiira nikhulhuvelho ninyu nikhalhe wa Apwiiya Nlhuku,
ata ni inyu kinowiittuchihani lhelho.
20Kihoulhephelhani meettuchiho makhumi mararu,
moolhumo o waamuka ni o uchuwelha,
21Wiira wiittuchihani malhove o ikekheene ni o waaminika,
ni ntu okohakani mwoorieke umwaakhulha rata.
Nuulhumo no upacha
22Nhimwoonelhe usha nshikini wo nlhattu no ushikini awe,
mena uhinthurulhe ntu nophavelha umahakamani,
23ukhalhawaya Apwiiya Nlhuku anowaakavihera,
ni waathurulha attu anaathurulha.
Nuulhumo no nayeelhi
24Nhiipangeke nlhoko ni ntu o urushiya,
mena nhitwaraane ni attu o waakuvia uthunalha,
25nhiwe mweettuchiha chittu chinopanga aya,
ni wiikelhiha anene mu nriankhoni.
Nuulhumo no neeraru
26Nhikalheke mmoka a ntu o weesha nlhapelho,
attu aneecheesha idhamana wo nlhattu no waalhivelha attu akina,
27yakhalhaka khanrina ittu iriyoothe yo ulhiva,
ata ikori unorupelha inyu inookushiya!
Nuulhumo no ncheshe
28Nhithamihe ikomo yo mwiinano wo khalhai
yeeshiye ni manyaapwiiya inyu.
Nuulhumo no nthanu
29Chani, haawo ntu orata unthekoni wawe?
Yoyo noopanga ntheko wa mamwene;
khanopanga ntheko wa attu akina.
The Bible Version in Makua @The Word for The World International and Makua Language translators. All rights reserved.