Imethali 1
1
Nnikwa wo imethali
1Chilha phi imethali cha Naselemani amwene o Uisraeli, anaaya mwanlhopwana a Nadaudi. 2Imethali chiyo chinowaavaha attu irusho ni nthimicho, chinowaachuwelhiha malhove o irusho, 3chilha chinompanga ntu akhalhe ni nthimicho, irusho, ikekhiaye, ni upanga chittu chorera. 4Inowaavaha attu akumbafu uchuwelha ni wa ashimirawo irusho ni wiishungerera. 5Ntu o irusho eweelhelheke ni oncherereke irusho chaya, ni uyo rii ni irusho apatteke uhoolhelhia. 6Ntu achuwelheke imethali ni nlhikaaniho, malhove a attu o irusho ni indaavi chawe.
Malhehero wa ashimirawo
7Waathimicha Apwiiya Nlhuku phi nsingi wo irusho, nansho akumbafu anooveehacha irusho ni nthimicho.
8Mwaamwanaka, mwiiwelhelheke malhove a athumwaninyu, mena nhihiye meettuchiho a anumwaninyu; 9yayo anouttuka mphumburu wo urera vamuruni winyu, thoko nkufu o urera vashikoni winyu. 10Mwaamwanaka, nhirumelhelhe uthepiachiya ni attu o uwonya, uhaarumelhelhe yayo. 11Ahimiachaka wiira, “Ngwee nittukaneke, nanvithelhelheke ntu ni umwiiva. Uweeke naakelhelheke attu ahirina milhatu! 12Naamirie anari akumi thoko nihiye,
naamirie anari akumi thoko attu anotumbuchira nlhikitini noorekama. 13Ninookusha chittu chonkhaye cho nhakhu, ni uchariha mateeka unupani wihu. 14Mmweeke ukavihananeke ni hii, chittu chonkhaye chinohalha ihu upata ninookawanacha.”
15Mwaamwanaka, uhilhutaane vamoka ni ayo, uhittwaraaneke mu iphiro chaya. 16Ukhalhawaya mieto chaya chinottimakelha upanga chittu chohilhoka, anaakuvilhe wiiva. 17Nriankho unoreiya uno ashinuni oonaka, nriankho uyo unooreiya wo mpwettu, 18nansho attu ayo aneevithelha ni wiirimelhiha ashineneru, anooria nriankho ni wiiwaya mirima chaya ashinene. 19Phiri aya iphiro cha attu anovara makhuche, aneevacha attu ari ni nhakhu.
Irusho inowiihana attu
20Irusho inowiiwania wo nlhove nuulhupalhe mphironi, inookhuwelha nlhove nawe vakittu vari ni attu enchi, 21inoowiihana vamarekhanoni vawani, inookhuwelha vaari nlhako o iwani. 22“Inyu attu akumbafu nnoothepa uhikhalha ni irusho mpaka iyaakhani? Inyu attu o ncheche nnoshangarara mpaka iyaakhani ncheche awo? Akumbafu ukhota irusho? 23Mwiiwelhelheke waamuka waka, kinouvahani irusho chaka, kinouuchuwelhihani malhove aka. 24Ukhalhawaya kahowiinhanani nkamwakhota, kahowiihanani wo moono aka nansho mwahokhota, 25nkamwaaveehacha malhove aka onkhaye, ni mena khamwaarumelhenlhe waamuka waka, 26chiicho ni mii kinoothatheelha mariro inyu, kinoupangelhani ncheche mariro vanohalha aya uweelhani, 27woova vanohalha aya uupattani thoko iphioo yuulhupalhe, mareta inyu vanohalha inyu uukhupani thoko nayuupuru, ikatema yo uhuva ni ukhwana vanohalha aya uupattani. 28Vavawo phi nohalha inyu ukiihana nansho akinowaakhulhani, nnookavia wo machiri nansho khannokoona. 29Ukhalhawaya mwahokhota irusho, mena umoova Apwiiya Nlhuku. 30Ukhalhawaya mwahokhota malhove aka, ni mena khamwewelhenlhe waamuka waka. 31Paahi, nnoolhivia ulhikaana ni mitheko chinyu, ni nnoohuva wo nlhattu no uwonya winyu mwaashinene. 32Ukhalhawaya ajinga aneechiva wo ukhota irusho, ni akumbafu anowiilhakalhiha wo nlhattu no wiipanga uchuwelha waya, 33Nansho kila ntu riyoothe nokiiwelhelha nookhalha wo mpuha, khanoova chittu chohilhoka.”
The Bible Version in Makua @The Word for The World International and Makua Language translators. All rights reserved.