Imethali 16
16
1Mwaha wa ntu niri munrimani mwawe mwanene,
nansho Apwiiya Nlhuku phi nooworiha mwaha uyo.
2Ntheko wa ntu chinoonia ukhalha choombone vamiithoni vawe mwanene,
nansho Apwiiya Nlhuku phi anochuwelha nrima wa ntu,
3Unhimerieke Apwiiya Nlhuku kila ittu nnopanga inyu,
ni mwaha inyu unootimira.
4Apwiiya Nlhuku ahoopa kila ittu wo uttuna wawe mwanene,
ata attu o uhilhoka wo nlhattu no nihuku no urimeelhihiya.
5Ntu ri ni itiyamaru noothunalhelhiya chinene ni Apwiiya Nlhuku,
ikekheene ntu thoko uyo noottwarushia.
6Wo uttuna ni waaminika unoohiyereria uwonya,
wo unthimicha Apwiiya Nlhuku ntu noottawa uwonya.
7Apwiiya Nlhuku achivelhiaka ni meetelho a ntu,
nowaarukunusha amalhaponi awe ukhalha manyaampwanawe.
8Nambaya ukhalha ni nhakhu vakani vamoka ni ikekhiaye,
kuliko upatta chittu chinchi wo iphiro yo utturulha.
9Ntu nowooria upanga chittu chawe,
nansho Apwiiya Nlhuku phi nholhelhi o iphiro chawe.
10Amwene noolhumacha wo irusho yo Nlhuku,
mena malhove awe khanorukunusha ikekhiaye,
11Apwiiya Nlhuku nottuna maphimelho yo ikekhiaye,
malhuku onkhaye o uphimelha ari munrupani phi ntheko awe Nlhuku.
12Mamwene anoorushiya chinene uwonya,
ukhalhawaya nsingi wo imwene awe phi ikekhiaye,
13Amwene anoteelhia ni ntu anoolhumacha ikekhiaye,
anaattuna attu anoolhumacha ikekheene.
14Urushiya wa amwene unowiiha nookhwa,
nansho ntu o irusho noomalhiha.
15Amwene ateelhiyaka noowiha ukumi,
uttuna wawe urii thoko nihute neelhimwe.
16Nambaya upatta irusho kuliko idhahabu,
ni uchuwelha kuliko isiliva.
17Iphiro cha attu oombone chooshemba uhilhoka,
ntu anoshunga iphiro awe noshunga ukumi awe.
18Itiamaru chinoowiiha marimeelho,
wiifuna unoowiha umora.
19Nambaya wiikhurusha ni ukhalha vamoka ni amashikini,
kuliko ukawana nhakhu uthurulhiye ni attu o itiamaru.
20Ntu riyoothe novara ikano noopatta ibarakha,
horeeria ntu ulhe noonkhulhuvelha Apwiiya Nlhuku.
21Ntu o irusho munrimani neehania o uchuwelha,
ni nlhove noombone ninoorumelhelhiya chinene ni attu.
22Irusho phi nrapo no ukumi wa ntu rinaawe,
nansho ukumbafu phi nttwarusho na attu akumbafu.
23Nrima wa ntu rii ni irusho nooholhelha iyano awe,
noopanga malhove awe yaachivelheke attu.
24Malhove moombone anookhalha thoko urawo,
ni o uchiva munrimani ni anoowiha iruttu yoombone.
25Ntu nooria woona iphiro awe wiira yoombone,
nansho umalhelha wawe nohoolhelhihia mukhwani.
26Ithalha inoompanga ntu apangeke ntheko,
ni inoompanga athepeke upanga ntheko.
27Ntu o uhilhoka noopuwelha mwaha wo uhilhoka,
malhove awe ari thoko mooro.
28Ntu o uhilhoka noothotheria indewo,
ntu o injoove noomwalhaniha ntu ni mpwana awe.
29Ntu o ishilhilhi noonthephiacha amwaatamana awe,
ni unweeha mu iphiro chawe cho unanara.
30Ntu nopilhapilha niitho wo uhilhoka anoowonya,
ntu hinottuna umalhiha indewo yoyo haana ittu inokhulhuvelha awe upanga.
31Ipwii phi ittaji yo yoreera,
inopatikana wo makhalhelho o waaminika.
32Ntu hinaakuvia urushiya horeera upwaha ntu o machiri,
horeeria ntu aneeshunga nrima upwaha ntu o uvara makhuche iwaani.
33Ikhura inoopiya wo nivitho,
nansho maamulho moombone anokhuma wa Apwiiya Nlhuku.
The Bible Version in Makua @The Word for The World International and Makua Language translators. All rights reserved.