Imethali 17
17
1Nambaya ulhia nkatte o wuuma vakittu varii mpuha,
kuliko ulhia yolhia mu inupa ya attu o waana.
2Akarumiya o irusho noontawara mmirawo nkumbafu o ntu o nhakhu,
ni uyo noopatta vakittu vawe thoko mmoka a achihima.
3Ulhoka wo idhahabu ama isiliva uphimiya vamooroni,
nansho Apwiiya Nlhuku phi nophima mirima cha attu.
4Ntu o uwonya neewelhelha malhove o uhilhoka
ntu o wootha neewelhelha malhove o woothacha.
5Ntu noompangelha ncheche nshikini anonruwana Nlhuku amuupilhe,
nothaathelha mariro a nkhunana awe khanoshemba nttwarusho.
6Uchuulhu phi ittaji ya manyaapwiiya,
manyanaangoro phi mpuha wa achishaana aya,
7Malhove moombone a ntu o ureera khanolhoka wa ntu nkumbafu,
chiichammo malhove o woothacha mu iyano ya nhoolhelhi!
8Wo uhongiya phi thoko ihirizi,
kila ittu anopanga awe noopatta.
9Ntu nohiyerera milhatu yoyo noottuna chinene,
nansho ntu riyoothe noopusha chittu nowaamwalhaaniha ntu ni mpwanaawe.
10Umwaamuka ntu o irusho nkwaha mmoka inoolhoka,
upwaha waatiya mikwaha imia imoka wa ntu nkumbafu.
11Ntu o uhilhoka naavia uwonya tu,
karumiya o ushilhilhi noorumiya vachulhu awe.
12Nambaya ukumaana ni kharamu atturulhiye achishaana awe,
kuliko nkumbafu mu ukumbafu awe.
13Ntu nolhivihera uhilhoka wo ittu yoombone,
uhilhoka khunothama unupani wawe.
14Uthathusha indewo inokhalha thoko utukulhelha nthapwi no maashi,
nhiyeke waana uhinaya indewo ukhumelhelha.
15Unhiyerera ntu arii ni milhatu,
ni unttwarusha ntu hirii ni milhatu,
onkhaye eelhi phi nrushiho wa Apwiiya Nlhuku.
16Ishiani maana aya, nkumbafu ukhalha ni nchurukhu mmathathani mwawe yo uttumelha irusho,
ni uno mwanene uyo khaarina irusho?
17Mpwana o ikekheene noottuna ikatema yonkhaye,
mwanhima inyu yariyee wo nlhattu no ukavihera ikatema yo uhuva.
18kihena ittu yoombone weemeshera chittu,
ni umweeshera iponi ntu nkina.
19Ntu anottuna indewo yoyo nottuna uwonya,
ni ntu notheka ishiri yo urekama yoyo naavia itatako.
20Ntu o nrima o uhilhoka yoyo khanovaheriya.
ni ntu o nlhimi unaapoteriha attu unoopatta marironi.
21Mwaana nkumbafu noowiha ichuku wa athumwanawe,
ni khuuwo mpuha wa naangoro a mwaana nkumbafu.
22Nrima wo ushangarara phi nrete,
nansho nrima uri ni ichuku unowiiha mareta.
23Ntu o waamulha milhatu o uhilhoka noopochera nchurukhu wo nivitho,
wiira apoterihe iphiro yo ikekhiaye.
24Ntu o uchuwelha naavia irusho,
nansho miitho a ntu nkumbafu anoowehaweha kila vakittu velhaponi.
25Mwaana nkumbafu noowiha ichuku wa athumwanawe,
ni ummweeria anumwanawe.
26Khunolhoka unttwarusha ntu hirii ni milhatu,
ni ama umwaata ikopo ntu o ikekhiaye.
27Ntu hinoolhumacha pufia haana irusho,
ni ntu omaalha khaarina malhove menchi.
28Ata ntu nkumbafu yamaalhaka shiriri nowoonia wiira ahaana irusho,
amaalhaka nooniya ntu o uchuwelha.
The Bible Version in Makua @The Word for The World International and Makua Language translators. All rights reserved.