Imethali 14
14
1Nthiyana o irusho yoyo nooteka inupa awe mwanene,
nansho nthiyana nkumbafu yoyo nophomolha inupa wo miono chawe mwanene.
2Ntu anopanga chittu cho ulhoka nonthimicha Apwiiya Nlhuku,
nansho ntu o uwonya khanorumelhelhiya ni Apwiiya Nlhuku.
3Ntu nkumbafu nowiittwarusha mwanene wo wuulhumacha pufia,
nansho ri ni irusho nooshungia wo malhove anokhuma mu iyano awe.
4Vakittu vahirii ing'ope choolhimelha, nikhupi na ntu ninohalha chiicho,
choolhia chinchi chinopattikana wo machiri o ing'ope o ulhima.
5Ntu o waaminika khanoothacha,
nansho ntu ohaaminika nowuulhumacha malhove yoowothacha.
6Ntu o uhirumelhelha naavia irusho wo mpwetu,
nansho ntu o irusho nopatta uchuwelha.
7Mwiihaulheke utayi ni ntu nkumbafu,
ukhalhawaya vavawo vari aya khaawo malhove o irusho.
8Irusho cha attu, o ibusara chinomooniha iphiro chawe,
nansho nkumbafu, wa attu akumbafu anowootheriana ashinene.
9Akumbafu anothathelha vanowonya aya,
nansho attu o irusho anopatta nthimicho wa Nlhuku.
10Kila nrima unoochuwelha uweeria wawe mwanene,
mena khaawo ntu riyoothe nooria ushangarara vamoka.
11Inupa ya ntu o uhilhoka inorimeelhihiya,
nansho inupa ya ntu owaaminika inoshichira.
12Ihawo iphiro inoonia yombone wa ntu,
nansho umalhelha waya unorwaa ukhwani.
13Ichuku inowooria uvithia mu ushangarara,
nansho umalhelha wo ushangarara ichuku.
14Attu o uhilhoka anoolhivia wo mitheko awe,
ni uyo ntu o orera nrima uyo nnoopatta nttuvo nawe.
15Ntu nkumbafu norumelhelha kila ittu inohimieria aya,
nansho ntu o irusho nopanga wo uweeha chinene.
16Ntu o irusho anokhalha wo uwehaweha ni ukhota uwonya,
nansho nkumbafu khanooria wiithiyelhelha uwonya.
17Ntu naakuvia urushiya noowonya,
nansho ntu o upenyapenya noorushiya chinene.
18Attu akumbafu anottwaracha chittu cho uhilhoka,
nansho ari ni ibusara nowarihiya ittaji yo irusho.
19Attu o uhilhoka anookhoroma umihoolho wa attu oombone.
attu o uhilhoka anookhoroma wa attu oombone.
20Nshikini nooshembia ata ni amwaatamana awe,
nansho ntu o nhakhu ahana amanyampwanaawe enchi.
21Ntu nompangelha ncheche owaatamana awe wo uwonya,
nansho ahovahiya ibarakha ri ni ikiriri wa ntu nothanana nsaada.
22Chani, anopanga chittu cho uhilhoka khanopotera?
Attu anopangacha chittu cho orera nrima nopatta nnema.
23Ntheko wonkhaye unoopangia wo irusho nowiiha mpuha,
nansho malhoveru anowiiha ushikini.
24Nhakhu wa attu o irusho phi ittaji aya,
nansho ntu nkumbafu phi ittaji ya attu akumbafu.
25Ntu nohimiacha chittu cho ikekhiaye nookhalha nkumi,
nansho ntu noolhumacha chittu cho wootha noowonya.
26Ntu nonthimicha Apwiiya Nlhuku haana nikhulhuvelho noombone.
ni achishaana awe anoopatta nthawelho noombone.
27Unthimicha Apwiiya Nlhuku phi nrapo no ukumi,
noushembihani mu miriankho yo nokhwa.
28Nthimicho na amwene phi winchiva wa attu awe,
nansho wo ukhalha ni attu vakani o waatawara anorimeelha.
29Ntu ahinaakuvia urushiya yoyo ahaana irusho,
nansho ntu nothunalha noothepa ukhalha nkumbafu.
30Nrima wo mpuha unoshichiriha iruttu,
nansho ihache inowiiha mareta wiiruttuni.
31Ntu nomoonelha nshikini nowooniha niphiondo wa Nlhuku awe,
nansho ntu nomoonelha ikiriri nshikini yoyo nonthimicha Nlhuku.
32Ntu o uhilhoka norimeelhihiya wo mitheko chaya mwanene,
nansho attu o ikekhiaye ata akhalhaka mu uhuvani yoyo anoopatta nttawelho.
33Irusho inokhalha munrimani mwa attu ari ni ibusara,
nansho inoochuwania wa attu akumbafu.
34Ikekhiaye inowuunnuwiha ilhapo,
nansho uwonya inowiiha ishoni wa attu onkhaye.
35Amwene nochivelhia ni karumiya ari ni irusho,
nansho norushiya wo nlhattu na attu o uhilhoka.
The Bible Version in Makua @The Word for The World International and Makua Language translators. All rights reserved.