Imethali 12
12
1Ntu anottuna meettuchiho yoyo nottuna uchuwelha,
nansho nokhotta waamukiya yoyo nkumbafu.
2Ntu oombone nopatta nthimicho wa Apwiiya Nlhuku,
nansho Nlhuku nonhukumulha ntu o uhilhoka.
3Ntu khanokhalha ni machiri wo upanga chittu cho uhilhoka,
nansho khiiwo ittu inooria unkumiha ntu o ikekheaye.
4Nthiyana orera nrima phi ittaji ya owaannyawe,
nansho noonhelha ishoni owannyawe yoyo anokhalha thoko nikhwata.
5Moopuwelho a ntu owaaminika phi yo ikekhiaye,
malhove a ntu o uhilhoka yowoothacha.
6Malhove a attu o uhilhoka anothanana wiiva,
nansho malhove a ntu o irusho anowoopolha attu anoopophihiya.
7Attu o uhilhoka anorimelhihiya ni upotera chinene,
nansho attu o irusho malhove aya anokhalha o wiiwania.
8Ntu nooshipia wo ulhikaana ni irusho chawe,
nansho ntu o chittu cho uhilhoka yoyo noonyoholhia.
9Horeeriya ntu nshikini neelhiha mwanene,
upwaha ntu neettimarika wo wiipanga haana chittu, uno norimeelha wo ithalha.
10Ntu o ikekhiaye nowaashunga ashinama awe,
nansho ikiriri ya ntu o uhilhoka phi ushilhilhi.
11Namalhima o upanga ntheko haana cholhia chinchi,
nansho anottwara chittu cho uhilhoka khaarina irusho.
12Attu o uwonya anothanana ifaida yo uhilhoka,
nansho ntu owaaminika anookhalha o ikeekheene.
13Ntu o uhilhoka noovaria niuwoothacha wawe mwanene,
nansho ntu norumelhelha nookhuma muuhuvani.
14Ntu nopatta ulhikaana ni malhivo awe,
thoko ntu nopatta awe chittu chorera apangilhe wo miono chawe.
15Ntu nkumbafu nowoona iphiro chawe wiira choombone,
nansho ntu o irusho nowiiwelhelha malhove nohimeria.
16Nkumbafu noochuwania nkwaha mmoka,
nansho ntu o irusho noovilhelha uruwaniya.
17Ntu nohimiacha malhove o ikekheene nookumiha malhove o ikekhiaye,
nansho ntu anohimiechesha malhove o woothacha anohimia chittu cho woothacha.
18Malhove o unanara anorakhalhiha thoko uphanga,
nansho malhove anohimia awe ntu o irusho anowiiha ukumi.
19Ikekheene inolhokelha mahuku o uhimalha,
nansho nlhimi no woothacha ninoolhokelha wo ikatema ikani.
20Attu anopangacha chittu cho uhilhoka ahochara chittu cho wootha munrimani,
nansho anopangacha moombone anopatta mpuha.
21Attu o irusho khaninaapattacha ittu nirinoothe yo unanara,
nansho attu o uhilhoka ahochara uhuva chinene.
22Iyano inoolhumacha malhove o woothacha anorusha Apwiiya Nlhuku.
nansho attu anoolhumacha malhove oombone phi mpuha awe.
23Ntu o ibusara novitha irusho chawe,
nansho attu nkumbafu nochiichiha ukumbafu awe.
24Miono inopanga ntheko inoompanga ntu ataware,
nansho ureshi unoompanga ntu akhalhe ipotta.
25Nrima o woova unoohuviha ntu mwanene,
nansho nlhove no urera ninoonvaha ntu mpuha.
26Ntu o ikekhiaye nooshemba chittu cho uhilhoka,
nansho iphiro cha attu o uhilhoka chinowamoriha attu.
27Nreeshi khaarina ittu yo waapia,
nansho ntu nopanga ntheko haana yoolhia yinchi.
28Ikekhiaye phi iphiro yo ukumi,
nansho uhilhoka unohoolhelha mukhwani.
The Bible Version in Makua @The Word for The World International and Makua Language translators. All rights reserved.