Imethali 11
11
1Apwiiya Nlhuku noorushiya ni maphimelho yowootha,
nansho maphimelho yo ikekhiaye phi uteelhiya waya.
2Itiamaru chinottwaaraana ni ishoni,
nansho wa attu wiikurusha ahana irusho.
3Urumelhelha wa attu o irusho unowaahoolhelha,
nansho attu o uhaaminika anoorimeelha wo uhaaminika waya.
4Nhakhu kunookavihani ikatema yo urushiya,
nansho waaminika nnowooria woopolha ukumi inyu.
5Waaminika wa attu oombone ukhoolhiha iphiro chaya,
nansho attu o uhilhoka anoowulhuwa wo uhilhoka wawe.
6Attu o ikekhiaye anowookolhia ni ithathako,
nansho attu ahirina ohaaminika anoowaya wo nlhattu wo uttuna chittu cha ashinene.
7Ntu o uhilhoka akhwaaka, nikhulhuvelho nawe ni nno ninoopotera,
chonkhaye aakhulhuvelhaya wo machiri aya kahena ittu.
8Ntu o ikekhiaye nowookolhia mu nttwarushoni,
ni ntu o uhilhoka ni uyo nookelha mu nttwarushoni.
9Ntu ahinoonthimicha Nlhuku nowaarimelhiha akina wo malhaku awe,
nansho ntu o ikekhiaye nowookolhia wo irusho chawe.
10Attu o ikekhiaye apattaka nnema, attu onkhaye anooshangarara,
ni attu o uhilhoka akhwaaka attu nowoopa ilhulhu.
11Iwaani inoopatta ibarakha wo nlhattu na attu ari ni ikekhiaye,
nansho inoorimeelha wo malhaku ya attu o uhilhoka.
12Ntu nkumbafu noonveehacha amwaatamana awe,
nansho ntu o uchuwelha nomaalha shiriri.
13Nothotheria chittu cha nkhunana awe khanokhulhuvelhiya,
nansho ntu norumelhelhiya munrimani noovitha chittu cha akhunanawe.
14Ilhapo ihirii ni ntu ovaha malhove inoomora,
nansho varii ni ovaha malhove enchi varii mpuha.
15Ntu riyoothe nomweeshera idhamana nlheto noohuva,
nansho ntu norushiya idhamana nookhalha nkumi.
16Nthiyana o nrima woombone nnoopatta nthimicho,
nlhopwana anopanga ntheko anookhalha ntu o nhakhu.
17Ntu o ikiriri nopuha mwanene,
nansho ntu o ushilhilhi noohuva mwanene.
18Ntu o uhilhoka noopatta nttuvo nawe,
nansho ntu nopanga chittu chorera noopatta ifaida yo ikekheene.
19Ntu riyoothe nothanana ukhalha o ikekhiaye nookhalha nkumi,
nansho nothaanlha upanga chittu cho uhilhoka nookhwa.
20Apwiiya Nlhuku noorushiya ni attu o nrima oonanara,
nansho noochivelhia ni ntu o nrima woombone.
21W o ikekhiaye ntu riyoothe nopanga chittu cho uhilhoka nootwarushiya,
nansho attu o ulhoka anowoopolhiya.
22Nthiyana orera hiri ni irusho,
ri thoko ipete yo idhahabu mphulhani mwo ikulhuwe.
23Makhulhuvelho ya attu oombone anoopatta chittu choombone,
nansho nikhulhuvelho na attu o uhilhoka chinomalhelha mu nttwarushoni.
24Ntu nokumiha chittu chawe wo nrima woombone nookhalha ni nhakhu mwinchi,
nansho nolhipa nrima noothepa ukhalha nshikini.
25Ntu o nrima wo urera nooshichira,
ntu riyoothe nommaha nkhunana awe maashi, ni uyo noovahia.
26Attu anonlhapa ntu novitha choolhia,
nansho anoontotopelha ntu nothumiha.
27Ntu naavia upanga chittu choombone noopatta nttuvo,
nansho ntu naavia upanga chittu cho uhilhoka, noopatta chittu cho uhilhoka.
28Ntu riyoothe nokhulhuvelha nhakhu awe noowulhuwa,
nansho ntu o ulhoka nooshichira thoko nthaakhuru nikithi.
29Ntu nophomolha inupa awe nookelhelhia ni iphioo,
nkumbafu nookhalha ipotta ya attu o irusho.
30Mitheko cha attu ari ni ikekhiaye chinowiiha ukumi,
ni ntu o irusho inowiihana mirima cha attu.
31Yakhalhaka attu o ikekhiaye anoopatta ibarakha velhaponi va,
ikekhiaye attu o uwonya anoolhiviya wo uthepa.
The Bible Version in Makua @The Word for The World International and Makua Language translators. All rights reserved.