Waalhakelhiya attu 9
9
Pasaka o nayeelhi
1Paahi, vaapilhe aya mweeri wo upacha wo iyaakha yo nayeelhi toka attu o Israeli vaathamachilhe aya Umisri, Apwiiya Nlhuku yahoolhumana ashinna Musa uthakoni Usinai. Nkayeerelha wiira, 2“Attu o Israeli alhieke isikukuu yo Pasaka ikatema yeeshiye. 3Yeyo ikhalheke uchechilho, wo nihuku no khumi ni ncheshe no ulha mweeri ulha, apangeke chiicho wo uttwaraana malheheriyo ni malhehero aya onkhaye.” 4Paahi etu, ashinna Musa nkayeerelha attu o Israeli wiira anoothananiya uttapelhelha isikukuu yo Pasaka. 5Paahi, nkayaalhia isikuukuu yo Pasaka uchechilho, nihuku no khumi ni ncheshe no mweeri wo upacha, uthakoni Usinai. Attu o Israeli yahopanga chonkhaye, thoko Apwiiya Nlhuku chaalhehenre aya ashinna Musa chiyo.
6Nansho attu akina yaari ahoriaka ulhia rata isikukuu yo Pasaka iyo, wo nlhatu no unyalha ni uhirumelhelhiya umihoolho wa Apwiiya Nlhuku, ukhalhawaya yaari attu avanre mitembo. Yayo attu ayo yahorwaa wa ashinna Musa ni Naharuni, 7nkayeerelha, “Hiyaano nihonyalha, khaninorumelhelhiya umihoolho wa Apwiiya Nlhuku, ukhalhawaya nihovara mitembo, nansho wo ishiyani nichiichihiye waakumihera Apwiiya Nlhuku isadaka aya wo ikatema ithalhiye, vamoka ni attu o Israeli akina?”
8Ashinna Musa nkayaakhulha yiiraka, “Nlhiteke thoko, mpaka vanohalha aka upatta malhehero anowaachani mwaatti ukhuma wa Apwiiya Nlhuku.”
9Paahi, Apwiiya Nlhuku nkayeerelha ashinna Musa wiira, 10“Mmoka inyu ama mmoka o achishaana inyu yakhalhaka nowiinyalhiha umihoolho wa Apwiiya Nlhuku wo nlhatu no uvara ntembo, ama akhalhaka rii munkwahani utayi, nansho noothanana ulhia isikukuu yo Pasaka, 11ntu thoko yoyo noohiyereriya upanga chiicho mweeri mmoka kaanyuma, uchechilho wo nihuku no khumi ni ncheshe no mweeri wo nayeelhi. Alhieke isikukuu iyo wo ulhia mikatte cho uhihelhiya ihengedure ni mathapa owawa. 12Ahihalhihe mmithe wo yoolhia iriyoothe, mena ahipweshe mena ata nikhuva nimoka no mwannama o Pasaka. Alhieke isikukuu yo Pasaka ilha wo ulhikaana ni malheheriyo aya onkhaye. 13Nansho ntu riyoothe hinyanlhe umihoolho wa Apwiiya Nlhuku, ama khari munkwahani, hilhie isikukuu yo Pasaka, noohaulhiya munlhokoni mwa attu awe ukhalhawaya khakikumihenre isadaka ikatema iphwanelhiye upanga chiicho. Yoyo ntu uyo atwarushiyeke wo nlhatu wo uwonya wawe.
14“Ni yakhalhaka haawo nlheto nokhalha vamoka ni inyu, ni uyo noothanana unlhia Pasaka uyo, yoyo ntu uyo apangeke chiicho wo ulhikaana ni ikano ni malheheriyo onkhaye o Pasaka. Kila ntu attwareke yayo malheheriyo ayo, yakhalhaka nnenchi ama nlheto.”
Nihute no mooro
(Ukh40:34-38)
15Nihuku Nihema Nitakatifu veemeshiya aya nne, nihute nahokhuruwa ni ukhuneelha Nihema nno. Uhiyu woothene mpaka wichishu, nihute nno noonia thoko mooro. 16Phi chiichammo chaari aya kila nihuku, uthana nihute nahokhunelha Nihema, ni uhiyu nahoonia thoko mooro. 17Kila ikatema nihute nno vaathamme vachulhu nihema, attu o Israeli ahophomolha nipuro, ni utheka tho vakittu nihute nno vaakhuruwenlhe aya. 18Nkayeeta nkwaha thoko chaalheheriya aya ni Apwiiya Nlhuku, ni weesha nipuro tho thoko chaalheheriya aya. Ikatema yonkhaye nihute nno vaakhalha aya vachulhu Nihema, attu yahokhalhacha vavawo vanipuroni vawo. 19Ata nihute nno vaakhanlhe aya vachulhu Nihema wo mahuku mechi, attu o Israeli yahothepa waarumelhelha Apwiiya Nlhuku, ni mena khayaathamanche vavawo. 20Ikatema ikina nihute nno naakhanlhe vachulhu Nihema vawo wo mahuku vakani tu, nansho kila ikatema attu o Israeli yaahalhanche vavawo vanipuroni vawo, yaathamme thoko Apwiiya Nlhuku chaalhehenre aya. 21Ikatema ikina nihute nahokhalha vachulhu Nihema toka uchechilho mpaka wichishu tu, ni ikatema vaathamme aya, attu ni ayo chiicho yaheeta nkwaha. Ni yakhalhaka nahokhalha vachulhu Nihema uthana woothe ni uhiyu woothe, attu ayo yaathama tu nihute vaathamilhe aya. 22Yakhalhaka yaari mahuku meelhi, ama mweeri mmoka, ama iyaakha, ama uthepa, yaani ikatema yonkhaye nihute nno vaari aya vachulhu Nihema, attu o Israeli nkayaathamanche. Nansho vaathamme aya, ni ayo yahothamacha. 23Wo malhehero a Apwiiya Nlhuku yaheesha nipuro, ni wo malhehero a Apwiiya Nlhuku yaheeta nkwaha. Yahovarechesha malhehero a Apwiiya Nlhuku, thoko chaavahiye aya wo iphiro ya ashinna Musa.
The Bible Version in Makua @The Word for The World International and Makua Language translators. All rights reserved.