Waalhakelhiya attu 8
8
Uthomeiya ikhandiri vaphatani
1Yamalheke, Apwiiya Nlhuku nkayeerelha ashinna Musa wiira, 2“Mwaahimerieke Naharuni wiira, ikatema vanohalha aya uthomia ikhandiri saba chilhe vaphatani, athomieke wiira chimwalhelheke mpata wo umihoolho wo iphata iyo.” 3Naharuni nkayaarumelhelha malhehero ayo, nkayeesha ikhandiri chiyo wiira chimwalhelhe mpata wo umihoolho wo iphata iyo, thoko Apwiiya Nlhuku chaalhehenre aya ashinna Musa. 4Iphata yo uthomeiya ikhandiri iyo, yaakooroshiye wo urata chinene, toka uchulhu mpaka vathi, wo idhahabu yaahaniye wo ulhikaanihiya thoko Apwiiya Nlhuku chooninhe aya ashinna Musa.
Uttukuriya ni weesheriya miono wa Alawi
5Tho, Apwiiya Nlhuku nkayeerelha ashinna Musa wiira, 6“Mwaahaulhe Alawi ukhuma wa attu o Israeli, ni mwaattukurieke. 7Mwaattukurieke wo ilha iphiro ilha. Mwaamichereke maashi o uttukuria, mwamalhihaka mwaahimerieke echuwulhacheke iruttu yonkhaye, apuputteke ikuwo chaya ni wiittukuria. 8Amalhihaka vavawo, ankumiheke mwaang'ope mmoka vamoka ni isadaka aya yo choolhia, yaani iphepa yo ushilhia ithakanihiye ni makhura, ni inyu munkusheke mwan'dume nkina o ing'ope wo nlhatu no isadaka yo ulhevelhelhiya uwonya. 9Baada yo vavawo, tho, mwaathothokaniheke attu o Israeli onkhaye ni wawiiha Alawi umihoolho wo Nihema Nitakatifu. 10Vanohalha inyu waawiiha Alawi umihoolho waka, attu o Israeli yeeshereke Alawi miono, 11ni tho, Naharuni eesheke yayo umihoolho waka, ukhalha thoko isadaka yo utheeshiya uchulhu ukhuma wa attu o Israeli, wiira avare ntheko aka. 12Yamalhakaru, Alawi eeshereke miono chaya vamiuruni wo madume o ingo'pe ayo, ni inyu munkumiheke mmoka ukhalha isadaka yo ulhevelhelhiya uwonya, ni nkina uyo munkumiheke ukhalha isadaka yo upahiya vamooroni, inokumihiya uwannyaka, wo nlhatu wo unaathaniha ni Alawi.
13“Mwamalhihaka, mweemesheke Alawi umihoolho wa Naharuni ni achishaana aya ni weemesha umihoolho waka ukhalha thoko isadaka yo utheeshiya uchulhu. 14Phi chiichammo chinohalha inyu waahaulha Alawi mmilhokoni mwa attu o Israeli akina, wiira akhalhe awaka. 15Mwamalhihaka waattukuria Alawi, ni waakumiha ukhalha thoko isadaka yo utheeshiya uchulhu, vavawo anowooria uvara ntheko unaacha Nihema Nitakatifu. 16Yayo ahokumihiya ukhalha awaka wakani, vakittu vo mattara a attu o Israeli. 17Ukhalhawaya mattara onkhaye a attu o Israeli phi awaka, mmilhokoni mwa attu ni ashinama, ukhalhawaya nihuku neevilhe aka mattara onkhaye Umisri, kaheesha ukhalha awaka. 18Vano kinowaakusha Alawi vakittu wa mattara o attu o Israeli, 19ni vavawo kihaavaha Naharuni ni achishaana aya, ukhalha thoko imboote ukhuma wa attu o Israeli, wiira avarache ntheko wo Nihema Nitakatifu wo nlhatu wa attu o Israeli, ni ukhalha ni nkutano wiira attu o Israeli ahiwe yaakhwa, yaatameriaka Vakittu Vatakatifu.”
20Paahi etu ashinna Musa, Naharuni ni nlhoko wonkhaye wa attu o Israeli nkayaattukuria Alawi, thoko Apwiiya Nlhuku chaalhehenre aya ashinna Musa. 21Yamalheke, Alawi aheettukuria uwonya ni upuphuttacha ikuwo chaya, ni Naharuni nkayaakumiha ukhalha thoko isadaka yo utheeshiya uchulhu umihoolho wa Apwiiya Nlhuku. Chiicho, Naharuni ahaapangelha ittu yo waathaniha ni Apwiiya Nlhuku, wo nlhatu waya wiira attukuriye. 22Yamalheke, Alawi ahokelha ni uvara ntheko aya u Nihema Nitakatifu, yeemelhelhiyaka ni Naharuni ni achishaana aya, thoko Apwiiya Nlhuku chaalhehenre aya ashinna Musa.
23Baada yo vavawo, Apwiiya Nlhuku nkayaalhehera ashinna Musa wiira, 24“Kila Nlawi o malhipa o iyaakha makhumi meelhi ni nthanu ni upwaha, avareke ntheko u Nihema Nitakatifu naka, 25ni uhiya ntheko uyo vanophiya awe malhipa o iyaakha makhumi ni nthanu. 26Yamalhaka yayo, yoyo ntu uyo nowooria waakaviha Alawi nanawe vanopanga aya ntheko u Nihema Nitakatifu, nansho khanothananiya uvara ntheko uriwoothe vekha aweru. Phi chiichammo chinohalha inyu waavaha ntheko Alawi.”
The Bible Version in Makua @The Word for The World International and Makua Language translators. All rights reserved.