Waalhakelhiya attu 10
10
Mapalhapata o fedha
1Yamalheke, Apwiiya Nlhuku nkayeerelha ashinna Musa wiira, 2“Nkooroshe mapalhapata meelhi ahaniye wo fedha. Mwoopeke yayo ikatema yo weehana attu ni ikatema inyu yo uthama nipuro. 3Mapalhapata o meelhi ayo oopiyaka vamoka, attu onkhaye athukumaneke umihoolho winyu, unlhakoni wo Nihema Nitakatifu. 4Nansho nipalhapata noopiyaka nimoka tu, paahi ahoolhelhi tu o makosho a attu o Israeli athukumaneke umihoolho winyu. 5Nlhove no mapalhapata neewaniaka vanoopiya aya vawo, attu anokhalha nipuro no unosha nchuwa achokholheke nkwaha. 6Oopiyaka nkwaha wo nayeelhi, attu o nipuro no uchawa achokholheke nkwaha. Yayo mapalhapata ayo oopiyeke wo nlhove nuulhupalhe, kila ikatema yo uchokholha nkwaha. 7Nansho ikatema vaneehana inyu attu wiira athukumane vamoka, mapalhapata oopiyeke wo nlhove no kawaida. 8Opochera ishaani, achishaana a Naharuni, phi ayo o woopa mapalhapata ayo. Ni chiichammo phi nohalha aya uttwariya ni iyari chinyu chonkhaye chinowa, wo mahuku onkhaye o uhimalha.
9“Ikhoto yawaakaru, nkamwaatakana ni amalhaponi anoukelhelhani mwiilhaponi mwinyu, mwoopeke mapalhapata ayo wo nlhove ninoopa inyu vanothama inyu, wiira, mii Apwiiya Nlhuku, Nlhuku inyu kuwupuwelheni ni uwopolhani mmathathani mwa amalhaponi inyu. 10Ni chiichammo tho, mahuku inyu o mpuha, thoko isikukuu cho woonia mweeri ama isikukuu chikina chiyo, mwoopeke mapalhapata ayo ikatema inokumiha inyu isadaka chinyu cho upahiya vamooroni, ni isadaka chinyu cho ulhepelha mpuha. Vavawo mii Nlhuku inyu kinowupuwelhani mwaatti. Mii phi Apwiiya Nlhuku, Nlhuku inyu.”
Attu o Israeli anoothamacha uthakoni Usinai
11Naphiyeke nihuku no makhumi meelhi no mweeri wo nayeelhi, iyaakha yo nayeelhi toka attu o Israeli vaathamilhe aya Umisri, nihute naari vachulhu Nihema Nitakatifu nno nahotheeshiya. 12Attu o Israeli ni ayo ahochokholha nkwaha aya ukhuma uthako wo Usinai. Nihute nno nahowelha uchulhu ni ukhuruwelha uthako wo Uparani.
13Wo nkwaha wo upacha, attu o Israeli ahochokholha nkwaha uyo wo malhehero a Apwiiya Nlhuku thoko chaahimiye aya ni ashinna Musa. 14Alhe yeemelhelhiya ni ibendera yo miphingo cho attu o nikosho ni Nayuda, ahoholhelha uthama, mphingo mmoka baada yo mphingo nkina. Nholhelhi aya aari Nanashoni anaaya Naaminadabu. 15Nanethaneli anaaya Nasuari, aari phi nholhelhi o mphingo wa attu o nikosho ni Naisakari. 16Ni ayo Naeliabu anaaya Naheloni, aari phi nholhelhi o mphingo wa attu o nikosho ni Nazabuloni.
17Yamalheke, nihema nahokwanyulhiya, ni attu o nikosho ni Nagershoni ni a Namerari, aathathihiye ukusha nihema ni ayo, ahopachera nkwaha wo uthama.
18Nkaatttwara attu o ibendera yo mphingo wa attu ahoolhelhihiye ni nikosho ni Narobeni, yaattwara mphingo mmoka baada yo mphingo nkina. Nholhelhi aya aari Naelisuri anaaya Nashedeuri. 19Nashelumieli anaaya Nasurishadai, phi aholhenlhe nikosho ni Nasimeoni. 20Ni nikosho ni Nagadi, naahoolhelhiye ni Naeliasafu anaaya Nadeueli.
21Yamalheke, nkaattwara attu o nihimo ni Nakohathi, anari anakushilhe ikaruma chitakatifu. Vaapilhe aya, Nihema naari ninamanlhe uthekiya.
22Yavireke yayo manyaattu ayo, ahottwara attu yeemelhelhiya ni ibendera yo mphingo waahoolhelhiye ni attu o nikosho ni Naefraimu, mphingo mmoka baada yo mphingo nkina. Nholhelhi aya aari Naelishama anaaya Naamihudi. 23Nikosho ni Namanase naahoolhelhiye ni Nagamalieli anaaya Napedasuri, 24ni ayo o nikosho ni Nabenyamini, aahoolhelhiye ni Naabidani anaaya Nagidioni.
25Wo umalhihera, alhe yeemelhelhiya ni ibendera yo mphingo uholhihiye ni nikosho ni Nadani, yaari phi miphingo wo utulhi wenkelha miphingo chonkhaye, yayo yaarwa mphingo mmoka baada yo mphingo nkina. Alha yaahoolhelhiye ni Naahiezeri anaaya Naamishadai. 26Napagieli, anaaya Naokirani, ahoholhelha nikosho ni Naasheri. 27Ni Naahira anaaya Naenani, aholhenlhe nikosho ni Nanaftali. 28Paahi etu, ilha phi iphiro yaattwanre aya attu o Israeli wo ulhikaana ni miphingo chaya, kila ikatema vaaphomonlhe aya nipuro ni uchokholha nkwaha tho.
29Yamalheke, ashinna Musa nkayeerelha alhamu aya, Nahobabu anaaya Nareueli, ntu o Umidiyani, wiira, “Hiyaano niri munkwahani urwaa vakittu Apwiiya Nlhuku venre aya wiira, ‘Kinouvahani inyuva vavawo vakittu vawo.’ Paahi nirweeke vamoka, ni hii ninoupangelhani mwoombone, ukhalhawaya Apwiiya Nlhuku aholheha univahera ibarakha hii attu o Israeli va.” 30Nansho Nahobabu nkayaakhulha yeeraka, “Mii akinoottukanani inyu mwaatti, nansho kinoohokolhia wiilhaponi waka ni wa ashilhoko aka.” 31Ashinna Musa nansho nkayeerelha wiira, “Chonte nhinihiye, ukhalhawaya inyuva nhochuwelha vakittu vanohalha ihu weesha nipuro uthakoni, ni inyu nnowooria ukhalha phi o unooniha vakittu wo utheka nipuro. 32Tho, mwanittukanaka, ittu iriyoothe yoombone inohalha aya unipangelha Apwiiya Nlhuku, phi nohalha ni inyu upangelhiya chiicho.”
Nkwaha unoochokholha
33Paahi attu nkayeeta nkwaha wo uthama Usinai, Mwaako wa Apwiiya Nlhuku, nkayeeta nkwaha wo mahuku mararu. Nsanduku no Malhehano na Apwiiya Nlhuku nahaaholhelha nkwaha wo mahuku mararu wiira naaverie vakittu vo weesha nipuro. 34Kila veetilhe aya nkwaha, ukhuma nipuro nimoka urwaa nikina, nihute na Apwiiya Nlhuku naari vachulhu waya uthana.
35Ni kila ikatema Nsanduku vaakushiya aya urwaa umihoolho, ashinna Musa yeera,
“Mweemelheke, inyuva Apwiiya Nlhuku!
Mwaamwarushacheke amalhaponi inyu.
Ni ayo ahinottunani ayo, mwoomolhacheke umihoolho winyu.”
36Ni kila ikatema attu veettuwilhe aya, ashinna Musa yeera,
“Inyu Apwiiya Nlhuku, mwaakhalhaneke attu inyu, maelufu wo maelufu o attu o Israeli, ahinaalhakelhia alha.”
The Bible Version in Makua @The Word for The World International and Makua Language translators. All rights reserved.