Waalhakelhiya attu 6
6
Malhehero anaacha woopa ishaani
1Yamalheke, Apwiiya Nlhuku nkayeerelha ashinna Musa wiira, 2“Mwaavaheke attu o Israeli malhehero anottwara alha wiira, Yakhalhaka nlhopwana ama nthiyana noopa ishaani, ishaani yo wiichesha rata, ama yo wiikumiha wo nlhatu wa Apwiiya Nlhuku, 3paahi hiwurie idivai ama utheka, hiwurie isiki yo idivai ama yo ittu ikina, hiwurie maashi o izabibu mena ulhia izabibu cho utokotta ama cho wuuma. 4Ikatema yonkhaye vanottuka awe ishaani, hilhie ittu iriyoothe inokhuma munzabibuni, toka imbeyu mpaka makova aya.
5“Mahuku onkhaye o ishaani awe yo wiihaulha ni wiichesha uchereshere, hihame ikharari chawe. Nookhalha ntakatifu mpaka ikatema ishaani awe yo wiicheesha rata wa Apwiiya Nlhuku vanohalha aya umalha, ahiyeke ikharari chawe chuulhuvalheke. 6Mahuku onkhaye anohalha awe wiicheesha rata wa Apwiiya Nlhuku, yoyo ntu uyo haatamerie ntembo, 7ata ukhalhaka wa athumwanawe, wa anumwanawe, wa nhimawe ama wa arokorawe, hiwe enyalhiha umihoolho wa Apwiiya Nlhuku, ukhalhawaya heechesha rata wa Apwiiya Nlhuku wo ulhupelha. 8Ikatema yonkhaye iri awe nshaanini mmo, nookhalha ntakatifu umihoolho wa Apwiiya Nlhuku.
9“Yakhalhaka ntu noorimelha wo uhikhulhuvelhiya, ni uyo nari vakhiviru vavawo, muru awe yoyo ntu ttukilhe ishaani uyo unoonyalhihiya, paahi ahameke ikharari chawe nihuku no uttukuriya wawe, yaani nihuku no saba. 10Nihuku no nane arweeheke machiya meelhi ama makhandi meelhi o ikhunda wa opochera ishaani varii nlhako wo Nihema Nitakatifu. 11Opochera ishaani akumiheke nimoka aya ukhalha isadaka yo ulhevelhelhiya uwonya ni nkina ukhalha isadaka yo upahiya vamooroni, ni uyo nowaathanihiya wiira akihokolhelhe mii, ukhalhawaya ahowonya wo nlhatu no waatameria ntembo. Nenno nihuku attukurieke muru awe, 12ni wiichesha rata umihoolho wa Apwiiya Nlhuku wo mahuku awe o wiihaulha ni wiichesha rata. Yayo mahuku o upachera ayo khanaalhakelhiya, ukhalhawaya ikharari chawe chaattukelhiye ishaani chahonyalhihiya. Paahi ankumiheke mwaakhondoro mwanlhopwana o iyaakha imoka ukhalha isadaka yo nlhatu no utteka wawe.
13“Alha phi malhehero o ntu noopa ishaani vanomalhiha awe mahuku awe o wiichinanelha, awiihiyeke vanlhakoni Nihema Nitakatifu, 14ni ukumiha izawadi chawe wa Apwiiya Nlhuku. Mwaakhondoro mwanlhopwana mmoka o iyaakha imoka hiri o uremara wo nlhatu no isadaka yo upahiya vamooroni, mwaakhondoro nthiyana mmoka o iyaakha imoka o uhiremaracha wo nlhatu no isadaka yo ulhevelhelhiya uwonya, ni ikhondoro ilhopwana imoka yo uhiremaracha wo nlhatu wo isadaka yo uwiiha mpuha. 15Tho, akumiheke ichikapu yo mikatte cho uhihelhiya ihengedure. Maandazi o iphepa yo ushilhia ikatahunyiye ni makhura, ni mikatte cho vevialha chihikiye makhura vamoka ni isadaka cho choolhia ni cho chittu cho uwuriya. 16Opochera ishaani anonkumihera wa Apwiiya Nlhuku chittu chonkhaye chii vamoka ni isadaka awe yo uwonya ni isadaka awe yo upahiya vamooroni. 17Ankumihereke wa Apwiiya Nlhuku ikhondoro iyo ukhalha isadaka yo upahiya yo uwiiha mpuha, ankumihereke vamoka ni ikikapu yo mikatte cho uhihelhiya ihengedure, isadaka yo choolhia ni yo cho uwuriya. 18Vavawo, vanlhakoni wo Nihema Nitakatifu vawo, ntu ttukilhe ishaani uyo ahameke ikharari chawe ni urihelha vamooroni varii isadaka awe yo upahiya yo nlhatu no uwiiha mpuha.
19“Yamalhakaru, opochera ishaani awiiheke a nikhatha no ikhondoro ilhopwana iyo ninaapiye vamoka ni niandazi nimoka nihelhiye ihengedure ukhuma nchikapuni, ni mikatte yo vevialha yo uhihelhiya ihengedure ni ummaha ntu ttukilhe ishaani uyo mmathathani, amalhihaka uhama ikharari chaarina awe ikatema yo wiicheesha rata. 20Paahi opochera ishaani atheesheke uchulhu chittu chiyo, thoko chineerihiya isadaka yo utheeshiya uchulhu umihoolho wa Apwiiya Nlhuku. Chonkhaye chii phi mpatta ntakatifu wo opochera ishaani, vamoka ni ikakhacha inotheeshiya uchulhu ni mphanja chikumihiye ukhalha isadaka. Baada yo yayo onkhaye ayo, ntu noopa ishaani nowooria uwuria idivai.
21“Yayo phi malhehero anomwaacha ntu noopa ishaani wo ulhupelha. Isadaka awe wa Apwiiya Nlhuku ilhikaaneke ni ishaani awe, wo uhihiya ittu iriyoothe ikina nooria awe ukumiha. Apangeke wo ulhikaana ni ishaani yoopilhe awe, wo ikhadiri yo malhehero o wiichesha rata wawe.”
Ibarakha ya opochera ishaani wa attu
22Yamalheke, Apwiiya Nlhuku nkayeerelha ashinna Musa wiira, 23“Mwaahimerie Naharuni ni achishaana aya wiira, choo phi nohalha inyu waavaha ibarakha attu o Israeli. Mwaahimerieke wiira,
24‘Apwiiya Nlhuku ovahekeni ibarakha ni ushungani.
25Apwiiya Nlhuku owehekeni wo mpuha aya, ni uvaherani.
26Apwiiya Nlhuku owonihekeni urera waya, ni ukhalhihani mu mpuhani.’
27“Phi chiichammo opochera ishaani chinohalha aya waavaha ibarakha attu o Israeli, ni Mii kinowaavaha ibarakha.”
The Bible Version in Makua @The Word for The World International and Makua Language translators. All rights reserved.