Waalhakelhiya attu 5
5
Woomolhachiya attu o unyalha
1Yamalheke, Apwiiya Nlhuku aheerelha ashinna Musa wiira, 2“Mwaalhehereke attu o Israeli wiira, ankumiheke uchereshere nikambi kila ntu rii ni makutulha, kila ntu nokhumiya uworu, ni kila ntu nyalhihiye wo uvara ntembo. 3Mwaarweheke uchereshere nikambi attu onkhaye alha, manyaalhopwana ni manyaathiyana, wiira ahiwe yaanyalhiha nipuro naka, ninokhalha aka.” 4attu o Israeli yahopanga chiicho, nkayoomolhachera uchereshere nikambi. Paahi etu, thoko Apwiiya Nlhuku chaalhehenre aya ashinna Musa, phi chiichammo attu o Israeli chaapangilhe aya.
Ukhoroma baada yo uwonya
5Yamalheke, Apwiiya Nlhuku nkayeerelha, ashinna Musa wiira, 6“Mwaahimerieke attu o Israeli wiira, ntu riyoothe, nlhopwana ama nthiyana anttekelhaka nkhunanawe, iriyoothe ihinolhoka upanga wa Apwiiya Nlhuku, yoyo hotteka. 7Yoyo ntu uyo akhoromeke uwonya upangilhe awe. Akumiheke ittu yo ulhivihera wo uwonya wawe, onchereraka ikilo imoka, ummaha ntu nttekenlhe awe uyo. 8Nansho yakhalhaka ntu uyo hokhwa wo uhikhalha ni mmuchi nohalha upochera malhivo ayo, paahi ittu iyo ikumihiyeke wa Apwiiya Nlhuku, wo uvahiya opochera ishaani vamoka ni ikhondoro ilhopwana yo waathanihana inohalha ukumihiya wo nlhatu no waathanihiya wo nlhatu no uwonya wawe wiira akihokolhelhe mii. 9Tho, chittu chonkhaye ni isadaka chonkhaye chinohalha ukumihiya ni attu o Israeli wa Nlhuku, ni uvahiya opochera ishaani, inohalha ukhalha yawaya opochera ishaani ayo. 10Ni kila ittu ikumihiye ukhalha itakatifu wa Nlhuku ni urweehiya wa opochera ishaani, inohalha ukhalha yawaya opochera ishaani ayo.”
Milhatu cha manyaathiyana anaalhia ikohi manyowannyaya
11Apwiiya Nlhuku nkayeerelha ashinna Musa wiira, 12“Mwaahimerieke attu o Israeli wiira, yakhalhaka nthiyana riyoothe o munthelhini noowonya nkaalhia ikohi owannyawe, 13nkaarupa ni nlhopwana nkina, wo uhichuwania ni owannyawe ama ntu ni nkina, heenyalhiha umihoolho wa Apwiiya Nlhuku, inakhalhaka khaawo ntu onilhe ipangilhe awe iyo ama khavariye ugooni. 14Paahi etu, owannyawe ayo aanyiheraka ahanu awe ayo wiira ahaalhia ikohi, ni uchokholha ukelhiya ihache wa ahanu awe wiira aheenyalhiha umihoolho wa Apwiiya Nlhuku, ama ahokelhiya ihache wa ahanu aya inakhalhaka kheenyalhinhe umihoolho wa Apwiiya Nlhuku, 15onkhaye oyeelhi arweeke wa opochera ishaani. Arweeheke ni isadaka inothananiya, yaani iphepa yo ishayiri yo uhithakanihiya ni makhura ama ubani, ikilo imoka. Ukhalhawaya phi isadaka yo yoolhia inokumihiya ni nlhopwana naanyihera ahanu awe, isadaka inokumihiya wo nlhatu wo uwonya uchuwaneelhe.
16“Opochera ishaani amweemesheke yoyo nthiyana uyo vakhiviru ni madhubahu, umihoolho wa Apwiiya Nlhuku. 17Amalhihaka, amiineke maashi matakatifu nnyiponi mwo ulhoko ni uhaulha ntukurukhu no vathi u Nihema Nitakatifu, ni uhelha mmaashini mmo wiira awaawe. 18Opochera ishaani anthaphulheke ikharari nthiyana uyo, ni ummaha munthathani isadaka yo yoolhia ikumihiye ni owannyawe, wo nlhatu no ukelhiya nipampa, ichuwanie wiira holhavalhava ama khalhavalhanve. Opochera ishaani anene ayo avarelhelheke inyipo yo maashi o uwawa anolhaviha ilhe. 19Baada yo vavawo, opochera ishaani anlhupelhiheke nthiyana uyo eeraka, ‘Yakhalhaka khanrupe ni nlhopwana nkina, nkamweenyalhiha umihoolho wa Apwiiya Nlhuku uno nnari munthelhini, paahi etu, alha maashi o uwawa alha khanouhavani. 20Nansho yakhalhaka nhowonya uno nnari munthelhini, nkamweenyalhiha umihoolho wa Apwiiya Nlhuku, wo urupa ni nlhopwana nkina hirii awinyu, 21Apwiiya Nlhuku olhavekeni munlhokoni mwa attu inyu, wo ulhupelha winyu, nkhalheke ohiyara ni nthunkwa ninyu nichare. 22Alha maashi alha akelheke munthunkwani mwinyu, ni uttukani wiira nhiyare, ni nthunkwa ninyu nichare.’ Ni nthiyana uyo arumelhelheke, ‘Aye, Aye.’
23“Yamalhaka, opochera ishaani alhepeke malhavo ayo nkitabuni ni uhapihera mmaashini mwo uwawa mmo, 24kaanyuma, ammuriheke nthiyana uyo maashi o uwawa anowiiha malhavo ayo, ni ayo anookelha mmirimani mwawe ni ummweria chinene, yakhalhaka heenyalhiha wo urupa ni nlhopwana nkina. 25Nansho wo upachera, opochera ishaani akusheke isadaka yo iphepa yo ihache ilhe mmathathani mwa nthiyana uyo, ni utheesha umihoolho wa Apwiiya Nlhuku, ni urweeha umadhubahuni. 26Tho, ahaulheke nthatha nimoka no isadaka yo iphepa iyo wo nlhatu wo wuupuwelhiya ni upaha vamadhubahuni. Yamalhakaru, ammuriheke nthiyana uyo maashi ayo. 27Amalhihaka uwuria, yakhalhaka etu aheenyalhiha umihoolho wa Apwiiya Nlhuku wo urupa ni nlhopwana nkina, yayo maashi anowiiha malhavo ayo anommweria chinene. Iruttu awe inoochakhulha ni nthunkwa nawe no uyara ninootanganyia. Yoyo nthiyana uyo nookhalha ntu lhaviye mmilhokoni mwa ashilhoko awe. 28Nansho yakhalhaka nthiyana uyo khaneenyalhiha umihoolho wa Apwiiya Nlhuku, ni mena kharina nlhatu wo utteka, paahi khanothuriya, nowooria waayara ashaana.
29“Paahi, alha phi malhehero anaacha milhatu cho ukelhiya ihache, nthiyana ri munthelhini, awonyaka ni wiinyalhiha umihoolho wa Apwiiya Nlhuku, 30ama nlhopwana akelhiyaka nipampa no waanyihera ahanu awe, nkoonelha ihache ahanu awe ayo, opochera ishaani anoomweemesha nthiyana uyo umihoolho wa Apwiiya Nlhuku. Ni opochera ishaani anootimiriha malhehero onkhaye alheheriye alha. 31Vavawo etu, nlhopwana uyo khanokhalha ni nlhatu, nansho nthiyana uyo nookusha uwonya wawe mwanene.”
The Bible Version in Makua @The Word for The World International and Makua Language translators. All rights reserved.