Waalhakelhiya attu 4
4
Ntheko waavahiye aya attu o nihimo ni Nakohathi
1Yamalheke, vavawo, Apwiiya Nlhuku ahaalhehera ashinna Musa ni Naharuni wiira, 2“Mwaalhakelhe attu o nihimo ni Nakohathi, mmoka o mahimo a Alawi, wo uttwarana iwani chaya ni mahimo aya, 3mwaalhakelheke manyaalhopwana onkhaye o malhipa iriyari yo iyaakha makumi mararu ni makhumi nthanu anothananiya uvara ntheko wo Nihema Nitakatifu. 4Ilha phi nohalha ukhalha ntheko wa achishaana a Nakohathi, uthokoreria chittu chitakatifu chinene.
5“Ikatema yo uthama unipuroni, Naharuni ni achishaana aya akelheke nnihemani, ni ukurusha nipaziya nirii umihoolho wo Nsanduku no Malhehano, ninotiyelhelha Vakittu Vatakatifu chinene. Amalhihaka, akhunelheke wo nipaziya nno. 6Vachulhu waya vawo, eesheke itiyelhelho yo nrapalha no wolhwaa no ipuri, amalhaka, aathalheke ikitambaa yorera yo kibuluu. Vanomalhiha aya vavawo, akelhiheke mishaamu yo uthathelha nsanduku nno.
7“Vachulhu imeza yo ukumihera mikatte ineeshiya umihoolho wa Apwiiya Nlhuku aathalheke ikitambaa yo kibuluu, vachulhu waya eesheke isahani, ivisahani cho ubani, inyipo ni ibirika, wo nlhatu yo ukumihera isadaka yo uwuriya. Mikatte chikhalheke vachulhu imeza mahuku onkhaye. 8Yamalhaka, akhuneelheke iyoombo chiyo chonkhaye wo ikitambaa yo khwilha, ni vachulhu waya eesheke ikifuniko yo nrapalha nowoolhwaa no ipuri. Akelhiheke mishaamu chaya cho uthathelha imeza iyo.
9“Akusheke ikitambaa yo kibuluu ni ukhuneelha iphata yo ikhandiri ni ikhandiri chaya, mikasi chaya, ni isahani cho uhelhiya ituura, ni iyoombo chonkhaye chinohelhelhiya makhura. 10Attukacheke vamoka ni iyoombo chaya chonkhaye, nhina nrapalha nowolhwaa no ipuri, ni weesha vachulhu mishaamu cho uthathelha chiyo.
11“Aathalheke ikitambaa yo kibuluu vachulhu madhubahu o idhahabu o utusherera ubani, ni ukhunelha nrapalha nowolhwaa no ipuri vachulhu waya. Yamalhaka, akelhiheke mishaamu chaya cho uthathelha chiyo. 12Akusheke iyoombo chonkhaye chinopangelha aya ntheko Vakittu Vatakatifu, attukeke ikitambaa yo irangi yo kibuluu ni ukhunelha nrapalha nowolhwaa no ipuri, yamalhihaka eesheke vachulhu mishaamu cho uthathelha chiyo. 13Akhupeke ituura vachulhu madhubahu o shaaba, unokumiheriya isadaka cho upahiya. Amalhihaka, aathalheke ikitambaa yo irangi yo zambarau vachulhu waya. 14Vachulhu waya eesheke iyoombo chonkhaye chinopangelhiya ntheko umadhubahuni. Yaani ichetezo, iyuuma, mikhori ni inyipo. Yamalhakaru, vachulhu waya aathalheke ikifuniko yo nrapalha no wolhwaa no ipuri ni uviriha mikurio chaya cho uthathelha. 15Naharuni ni achishaana aya amalhihaka ukhuneelha Vakittu Vatakatifu vamoka ni iyoombo ni chittu chaya chonkhaye, vanokhalha aya tayari uchokholha nkwaha, attu o nikosho ni Nakohathi aweeke yaakusha. Nansho yayo, khanohiyereriya mena uvara iyoombo chitakatifu chiyo, ahiwe yaakhwacha. Yoyo etu phi ntheko wa attu o nikosho ni Nakohathi kila ikatema Nihema Nitakatifu vanothamihiya aya. 16Naeliazari anaaya opochera ishaani Naharuni avareke ntheko wo uthokoreria makhura o ikhandiri, ubani wo nihiriri no unukhelha, ishaani yo choolhia cho kila nihuku, makhura o uhikiya wiira eesheriye miono ni kila ittu yeesheriye miono Nnihemani mmo.”
17Yamalheke, Apwiiya Nlhuku nkayeerelha ashinna Musa ni Naharuni wiira, 18“Nhihiye nihimo no iwani i Nakohathi mmilhokoni mwa Alawi, wiira nirimelhihiye. 19Paahi wo wookholha wiira ahiwe yeevakachiya, wo nlhatu no waatameria chechiyo iyoombo chitakatifu chinene chiyo, mpangeke cho. Naharuni ni achishaana aya akelheke ni umvariha kila mmoka ntheko awe wo upanga. 20Nansho achishaana a Nakohathi khanokelha mena ni woona chittu chitakatifu chinene chiyo, apangaka chiicho anookhwacha.”
Ntheko waavahiye aya attu o nihimo ni Nagershoni
21Yamalheke, Apwiiya Nlhuku nkayeerelha ashinna Musa wiira, 22“Mwaalhakelheke attu o nikosho ni Nagershoni, wo uttwarana ni iwani ni mahimo aya, 23mwaalhakelheke manyaalhopwana onkhaye arii ni malhipa iriyari yo iyaakha makumi mararu ni makumi nthanu anophwanelhiya ukelha ni uvara ntheko wo Nihema Nitakatifu.
24“Ntheko aya unohalha ukhalha, 25ukusha mapaziya o Nihema Nitakatifu ni ikifuniko aya, ikifuniko yo nrapalha no wolhwaa no ipuri yo vachulhu waya, nipaziya no nlhako, 26mapaziya ni mikhoyi cho ntenje nirii vachereshere nihema ni madhubahu, mapaziya yo nlhako wo ipuwa, ni chittu chonkhaye chinopangelhiya ntheko vamoka ni chittu chilha. Yayo avarelhelhacheke malhove onkhaye anaacha chittu chilha. 27Naharuni ni achishaana aya opochera ishaani phi nohalha weemelhelha ntheko wonkhaye wo attu o nihimo ni Nagershoni, yaachaka chittu chonkhaye chinohalha aya ukusha ni mitheko chinohalha aya uvara. Mwaavariheke chittu chonkhaye chilheheriye aya ukusha chiyo. 28Ni ntheko wa ashilhoko a Nagershoni u Nihema Nitakatifu, weemelhelhiyeke ni Naitamari anaaya opochera ishaani Naharuni.”
Ntheko waavahiye aya attu o nihimo ni Namerari
29Chiicho tho, Apwiiya Nlhuku ahothepa weerelha wiira, “Mwaalhakelheke achishaana a Namerari, wo uttwaraana iwani chaya ni mahimo aya. 30Yaalhakelheke manyaalhopwana onkhaye arii o malhipa arii iriyari yo iyaakha makhumi mararu ni makhumi nthanu, anophwanelhiya upanga ntheko u Nihema Nitakatifu. 31Yayo ntheko aya ukhalheke ukusha ifuremu, mataruma, mikurio ni ikhalhelho cho Nihema Nitakatifu. 32Ni chiichammo tho, akusheke mikurio cho ntenje cho urukureria mpatta wonkhaye, ikhalhelho, ikhomo ni mikhoyi vamoka ni chittu chaya chonkhaye ni ikerero chaya chikina chonkhaye. Ni inyu mwaavariheke ntheko wo uttwaraana ni machina aya chittu chinohalha aya ukusha. 33Yoyo phi nohalha ukhalha ntheko wa achishaana o nikosho ni Namerari munthekoni mwaya mwonkhaye nhina Nihema Nitakatifu, wo uholhelhiya ni Naitamari anaaya opochera ishaani Naharuni.”
Alawi anowaalhakelhiya
34Paahi ashinna Musa, Naharuni ni ahoolhelhi o milhoko chonkhaye cha attu o Israeli yahaalhakelha attu o nihimo ni Nakohathi, wo ulhikaana ni iwani chaya, 35nkayaalhepa machina a attu onkhaye aari ni malhipa o iriyari yo iyaakha makhumi mararu ni makhumi nthanu, kila ntu athananiye upanga ntheko wo Nihema Nitakatifu. 36Waalhakelhiya waya wo ulhikaana ni iwani chaya, onkhaye yaari attu 2,750. 37Alha phi attu onkhaye o imbumba i Nakohathi, aavara ntheko u Nihema Nitakatifu, yaahakelhiye ni ashinna Musa ni Naharuni thoko Apwiiya Nlhuku chalhehenre aya ashinna Musa.
38Tho, attu o nihimo ni Nagershoni yaalhakelhiye wo uttwaraana iwani chaya, 39o malhipa o iriyari yo iyaakha makhumi mararu ni makhumi nthanu, yaathananiye upanga ntheko wo Nihema Nitakatifu, 40onkhaye yaari attu elufu piilhi imia sita ni makhumi mararu. 41Yayo phi attu onkhaye o iwani cha achishaana a Nagershoni, yaavanre ntheko wo Nihema Nitakatifu, yaalhakelhiye ni ashinna Musa ni Naharuni thoko Apwiiya Nlhuku chalhenhere aya. 42Attu o nihimo ni Namerari yaalhakelhiye wo ulhikaana ni imbumba chaya ni iwani chaya, 43o malhipa iriyari yo iyaakha makhumi mararu ni makhumi nthanu, yaathananiye uvara ntheko wo Nihema Nitakatifu, 44onkhaye yaari attu elufu ttaru ni imia piilhi. 45Yayo phi attu o nihimo ni Namerari yaalhakelhiye ni ashinna Musa ni Naharuni thoko Apwiiya Nlhuku chaalhehenre aya ashinna Musa.
46Chiichammo etu tho, Alawi onkhaye aalhakelhiye machina aya ni ashinna Musa ni Naharuni ni ahoolhelhi a attu, wo uttwarana ni iwani chaya ni mahimo aya, 47o malhipa o iriyari yo iyaakha makhumi mararu ni makhumi nthanu, o machiri yaathananiye uvara ntheko wo Nihema Nitakatifu, 48onkhaye yaari attu elufu nane imia nthanu ni makhumi nthanu. 49Kila mmoka ahovahiya ntheko awe wo uvara, unaacha ukusha Nihema Nitakatifu, thoko Apwiiya Nlhuku chaalhehenre aya ashinna Musa.
The Bible Version in Makua @The Word for The World International and Makua Language translators. All rights reserved.