Waalhakelhiya attu 3
3
Achishaana a Naharuni
1Anottwara ayo phi achishaana a Naharuni ni a ashinna Musa, ikatema Apwiiya Nlhuku volhumanne aya ashinna Musa umwaakoni Usinai. 2Alha phi machina a achishaana a Naharuni. Ni ayo yaari, Nanaadabu, mwaamwanaya o nttara, Naabihu, Naeliazari ni Naitamari. 3Ni alha phi ayo yeeshiyeriye miono ni uhikiya makhura, ni uvahiya ntheko wo opochera ishaani. 4Nansho Nanaadabu ni Naabihu ahokhwaacha umihoolho wa Apwiiya Nlhuku, ikatema vaakumihilhe aya wa Apwiiya Nlhuku mooro uhiri ntakatifu uthakoni Usinai. Yayo elhi ayo yaakhwilhe wo uhikhalha ni achishaana, paahi etu Naeliazari ni Naitamari ahovara ntheko wo opochera ishaani, Naharuni athumwanaya vaari aya akumi.
Alawi anoothanlhiya waapangelha ntheko opochera ishaani
5Yamalheke, Apwiiya Nlhuku nkayeerelha ashinna Musa wiira, 6“Mwaawiiheke attu o nikosho ni Alawi, mweesheke umihoolho wo opochera ishaani Naharuni, wiira mwaavahe ntheko wo upanga. 7Yayo attu ayo avareke ntheko wo waakaviha Naharuni, ukavihera ntheko wo nlhoko wonkhaye, ntheko wo Nihema Nitakatifu, ni ntheko wo Vakittu Vatakatifu. 8Tho, awehaweheke ni uthokoreria chittu chonkhaye cho Nihema Nitakatifu, ni waakaviha attu o Israeli vanovara aya ntheko Vakittu Vatakatifu. 9Mwaavaheke Naharuni ni achishaana aya opochera ishaani ayo, Alawi ayo. Ukhalhawaya kihaathanlha wiira aakavihere ntheko munlhokoni mwa attu o Israeli. 10Mwaathanlheke Naharuni ni achishaana aya, ukhalhawaya kihaathanlha wiira oriacheke uvara ntheko wo opochera ishaani, nansho yakhalhaka ntu riyoothe nkina nowaatameria Nihema Nitakatifu, eeviyeke.”
11Vaamalhinhe aya vavawo, Apwiiya Nlhuku ahothepa waahimeria ashinna Musa, yeeraka wiira, 12“Mwooneke vano, kihaathanlha Alawi mmilhokoni mwa attu o Israeli onkhaye, vanipuroni va kila mwaana o nttara mwanlhopwana wo kila iwani yo Israeli. Alawi phi awaka, 13ukhalhawaya kila mwaana o nttara munlhokoni mwa attu o Israeli phi awaka. Ikatema veevilhe aka achishaana o nttara ashilhopwana onkhaye a attu o Umisri, kahaathanlha ni weesha vathetho kila mwaana o nttara mwanlhopwana, munlhokoni mwa attu ata mwa ashinama a attu o Israeli, ayo anookhalha awaka. Mii phi Apwiiya Nlhuku.”
Alawi anowaalhakelhachiya
14Kaanyuma, Apwiiya Nlhuku nkayeerelha ashinna Musa uthakoni Usinai wiira, 15“Mwaalhakelheke achishaana ashilhopwana a Alawi onkhaye wo ulhikaana ni mahimo aya ni makosho aya, mwaalhakelheke wo uchokholhelha achishaana o mweeri mmoka ni upwaha.” 16Paahi, ashinna Musa ahaalhakelha wo uttwara nlhove na Apwiiya Nlhuku, thoko chaalheheriye aya.
17Machina a achishaana a Nalawi phi alha anottwara vano alha, Nagershoni, Nakohathi ni Namerari. 18Ni machina a achishaana a Nagershoni wo uttwarani ni iwani chaya phi alha, Nalibini ni Nashimei. 19Achishaana acheshe a Nakohathi wo uttwarana ni iwani chaya yaari, Naamramu, Naishari, Nahebroni ni Nauzieli. 20Achishaana a Namerari wo uttwarana ni iwani chaya yaari, Namahili ni Namushi. Alha phi yaari ashilhoko aya Alawi wo uttwaraana ni mahimo aya.
21Mahimo meelhi aakhumelhenlhe u Nagershoni, yaari a achishaana aya, Nalibini ni Nashimei. 22Manyaalhopwana onkhaye yaalhakelhiye, wo yayo mahimo meelhi ayo, o malhipa mweeri mmoka ni upwaha, yaari attu 7,500. 23Attu o ukhuma mahimo a Nagershoni, aathananiye utheka nipuro naya mpata uneelha nchuwa, utulhi wo Nihema Nitakatifu. 24Nholhelhi o nihimo ni Nagershoni nno, aari Naeliasafu anaaya Nalaeli. 25Ntheko wa achishaana a Nagershoni ayo waari uwehaweha Nihema Nitakatifu, nihema vamoka ni itiyelhelho aya, nipaziya no nlhako Nihema Nitakatifu, 26mapaziya o ntenje naari iriyari yo Nihema Nitakatifu ni madhubahu, nipaziya no nlhako wo ntenje, ni mikhoyi chaya. Mitheko chonkhaye chaacha chechiyo chittu chiyo chaari chawaya.
27Mahimo a Nakohathi aakhumelhenlhe wa achishaana aya, yaani Naamrami, Naishari, Nahebloni ni Nauzieli. 28Waalhakelhiya waya, manyaalhopwana onkhaye o malhipa o mweeri mmoka ni uthepa yaari attu elufu nane ni imia sita, yaavara ntheko Vakittu Vatakatifu. 29Ni mahimo a achishaana a Nakohathi yaathananiye utheka nipuro naya mpatta wo uchawa wo Vakittu Vatakatifu, 30ni Naelisafani, akhalhaka phi nashirongora o nihimo no achishaana acheshe a Nauzieli nno. 31Ntheko aya waari ushunga Nsanduku no Malhehano, imeza, iphata yo uthomeiya ikhandiri, madhubahu o utushereriya ubani, chittu chinopangelhiya ntheko ni opochera ishaani Vakittu Vatakatifu, nipaziya, ni chittu chonkhaye chaavarelhiya ntheko, vanovara aya ntheko vawo, chaari chawaya.
32Naeliazari anaaya opochera ishaani Naharuni, ni ayo yaheeshiya ukhalha phi olhupalhe o manyolhupalhe chinene a Alawi, ni o weemelhelha anamitheko onkhaye o Vakittu Vatakatifu.
33Mahimo a Namahli ni Namushi aakhumme wa Namerari. 34Manyaalhopwana onkhaye o malhipa o mweeri mmoka ni upwaha yaalhakelhiye ukhuma mahimo a achishaana a Namerari yaari attu 6,200. 35Yayo manyaattu ayo yaathananiye utheka nipuro naya mpata wo uchulhu wo Nihema Nitakatifu, ni nashirongora o nihimo ni Namerari nno, aari Nasurieli anaaya Naabihaili. 36Ntheko aya yayo waari uthokoreria ifuremu cho Nihema Nitakatifu, iyuuma chaya, mikurio, ikhalhelho cho ukhalhelha vathi ni mapoopola o uvarelhelha nihema. Mitheko chonkhaye chiyo chaari chawaya. 37Ni tho chiicho, ahothananiya uthokoreria mikurio cho ntenje chaarukurenrie ni ikhalhelho chaya, ikhomo ni mikhoyi chaya.
38Ashinna Musa ni Naharuni ni achishaana aya yaathananiye utheka nipuro naya umihoolho wo Nihema Nitakatifu mpatta unoshelha nchuwa, awehaka unokhuma aya nchuwa. Ntheko aya waari uvara Vakittu Vatakatifu, wo kila ittu yaathananiye upangiya wo nlhatu wa attu o Israeli. Ntu nkina riyoothe achushenre vakhiviru aheeviya. 39Manyaalhopwana onkhaye Alawi, o upachera achishaana o malhipa o mweeri mmoka ni uthepa, yaalhakelhiye ni ashinna Musa ni Naharuni thoko Apwiiya Nlhuku chaalhehenre aya, wo ulhikaana ni iwani chaya yaari attu 22,000.
Wookholhiya wa achishaana o nttara
40Yamalheke, Apwiiya Nlhuku nkayeerelha ashinna Musa wiira, “Mwaalhakelhe wo machina mattara ashilhopwana onkhaye a attu o Israeli, ichokholhelhaka arii ni malhipa o mweeri mmoka ni uthepa. 41Ni inyuva mwaahaulheke Alawi wo nlhatu waka mii Apwiiya Nlhuku. Tho, nhaulheke wo nlhatu waka mihuwo chonkhaye cha Alawi vakittu va mattara o mihuwo cha attu o Israeli.”
42Paahi, ashinna Musa nkayaalhakelha mattara onkhaye a attu o Israeli thoko Apwiiya Nlhuku chaalhehenre aya. 43Mattara onkhaye ashilhopwana thoko chaalhakelhiye aya wo machina, wo upachera o malhipa o mweeri mmoka ni uthepa, yaari attu 22,273.
44Tho, Apwiiya Nlhuku nkayeerelha ashinna Musa wiira, 45“Vano mwaahaulheke Alawi onkhaye ukhalha awaka vakittu va mattara o upacha a attu o Israeli. Ni chiichammo tho, nhaulheke ing'ope cha Alawi onkhaye vakittu va mattara o ing'ope cha attu o Israeli. Mii phi Apwiiya Nlhuku. 46Wo nlhatu wo ulhivelhelhiha vakittu va mattara ashilhopwana a attu o Israeli imia piilhi makhumi saba ni araru, anaathepa manyaalhopwana Alawi, 47mpochereke wo kila nlhopwana ivipande nthanu cho malhuku o nchurukhu, wo ulhikaana ni maphimelhiyo o Vakittu Vatakatifu, yaari yo ulhikaana ni igera makhumi meelhi, 48ni yoyo nchurukhu wo nlhatu wo ulhivelhelhiha athempe wunchereria ayo, mwaavaheke Naharuni ni achishaana aya.”
49Ashinna Musa ahorumelhelha, nkayaakusha nchurukhu wo ulhivelhelhiha, wa attu aathempe munlhokoni mwa Alawi uyo. 50Nkayaapochera ukhuma wa mattara a attu o Israeli nchurukhu umphiyelha ivipande cho ishekeli 1,365, wo ulhikaana ni maphimelhiyo o Vakittu Vatakatifu, 51nkayaavaha Naharuni ni achishaana aya nchurukhu wo ulhivelhelhiha uyo thoko Apwiiya Nlhuku chaalhehenre aya.
The Bible Version in Makua @The Word for The World International and Makua Language translators. All rights reserved.