Waalhakelhiya attu 35
35
Iwani chaavahachiye aya Alawi
1Yamalheke, Apwiiya Nlhuku yaholhumana ashinna Musa umatimbeni Umoabu, ukhopelhelhe wo mwoolhoko wo Uyordani vakhiviru ni Uyeriko, nkayeerelha wiira, 2“Mwaahimerieke attu o Israeli wiira, ilhapo ihiyeriye aya iyo, aavaheke Alawi iwani cho ukhalha, ni vakittu wo ulhihera mihuwo chaya, uchereshere iwani chiyo. 3Chechiyo iwani chiyo chinookhalha chawaya Alawi ayo, ni ayo akhalheke wowo, ni vakittu vo ulhihera vawo vakhalheke vo uhuwelha ing'ope ni mihuwo chaya, vamoka ni ashinama aya akina. 4Vakittu vo waalhihera mihuwo vanaavaha inyu Alawi uchereshere iwani vawo, vawanelheke kila mpata, mpaka utayi imita imia ncheshe ni makhumi nthanu, ukhuma ishiri cho iwani iyo. 5Chiichammo etu, vavawo vakittu vo waalhihera mihuwo vawo, vakhalheke imita imia tisa, ni vawo vawanelheke kila mpata wo iwani, iwani inenene iyo ikhalhaka variyari. Vavawo vakittu vawo vanookhalha vo waalhihera mihuwo uchereshere iwani chaya.
Iwani cho uttawelhelha
(Itor19:1-13; Nayos20:1-9)
6“Mwaavaheke Alawi iwani sita cho uttawelhelha ntu amwiivaka nkhunanawe wo uhilhakelha, ahiyereriyeke attawelheke wowo. Vamoka ni iyo, mwaavaheke iwani chikina makhumi ncheshe ni piilhi. 7Iwani chonkhaye chinohalha inyu waavaha Alawi, chikhalheke makhumi ncheshe, mwaavaheke iwani chiyo vamoka ni vakittu vo ulhihera mihuwo. 8Tho, iwani chinohalha inyu waavaha Alawi ukhuma ilhapo inyu yo uhiyeriya attu o Israeli chiyo, chilhikaaneke ni wunnuwa wo nikosho, nikosho nuulhupalhe nikumiheke iwani chinchi, ni nikosho nikaani nikumiheke vakani. Kila nikosho no attu o Israeli, nikumiheke iwani chaya waavaha Alawi, wo ulhikaana ni wunnuwa wo iwani chinohalha aya uhiyeriya.”
9Yamalheke, Apwiiya Nlhuku yaholhumana ashinna Musa ni weerelha wiira, 10Apwiiya Nlhuku aneera, “Mwaahimerieke attu o Israeli wiira, ikatema vanohalha inyu ulhapuwa mwoolhoko wo Uyordani ni uphiya ilhapo yo Ukanaani, 11mwaathanlheke iwani chinohalha ukhalha iwani cho uttawelhelha yakhalhaka ntu noomwiiva nkhunanawe wo uhilhakelha, attawelheke wowo, ni ulhama. 12Chechiyo iwani chiyo chinookhalha phi vakittu vo uttawelha, wookholha ukumi wiira yoyo o wiiva uyo, hiiviye ni ntu o uhokolhoshera hinaaya uhukumulhiya ni nlhoko wa attu. 13Mwathekeke iwani sita wo nlhatu no uttawelha. 14Wo chechiyo iwani sita chinohalha inyu utheka chiyo, iwani ttaru chikhalheke unoshelha nchuwa mwoolhoko wo Uyordani, ni iwani ttaru chikhalheke ilhapo yo Ukanaani. 15Chechiyo iwani chiyo chinookhalha phi iwani cho uttawelha wo nlhatu no attu o Israeli, ni alheto wo mahuku menchi ama mahuku anohalha aya waakhalhana ayo. Ntu riyoothe amwiivaka ntu nkina wo uhilhakelha umwiiva, nowooria uttawelhelha wowo.
16“Nansho ntu amwaataka nkhunanawe wo iyuuma, nkaakhwa, yoyo ntu uyo o wiiva, eeviyeke ni uyo. 17Ntu riyoothe amwaataka nlhuku nkhunanawe, nkaakhwa, yoyo ntu uyo owiiva, eeviyeke ni uyo. 18Yakhalhaka noomwaata ni ittu ikooroshiye ni mwiri, inooria umwiiva ntu, nkaakhwa, yoyo ntu uyo owiiva, eeviyeke ni uyo. 19Mmuchi awe ntu eeviye uyo, alhiveriheke. Yoyo vanonkumaana awe yoyo o wiiva uyo, amwiiveke.
20“Tho, yakhalhaka ntu nomvenga nkhunanawe, nkankakha ama noomwiithelha ni umwaata, 21ama noomwaata makhuche, nkaakhwa, paahi yoyo ntu uyo o wiiva, eeviyeke ni uyo. Mmuchi awe ntu eeviye uyo, alhiveriheke, vanonkumaana awe yoyo o wiiva uyo, amwiiveke.
22“Nansho ntu ankakhaka nkhunanawe wo uhilhakelha, wo uhikhalha ni ichuku ama unrihelha ittu wo uhilhakelha, 23ama ntu awonyaka nlhuku ninooria umwiiva ntu, nkaamwiiva ntu wo uhilhakelha, inakhalhaka kharii mmalhaponi awe, ni mena khaalhakenlhe ummweria, 24paahi, nlhoko wa attu o Israeli waamulheke variyari wa ntu o wiiva uyo ni amuchi awe yoyo ntu uyo eeviye uyo, nothanana ulhiviheriya uyo, wo ulhikaana ni alha malheheriyo alha. 25Nlhoko wa attu uyo umwookholheke ntu evilhe uyo, wiira amuchi a ntu eeviye uyo ahinthurie, ni unhokolhosha unrweeha iwani ittawenlhe awe uwo. Ni uyo akhalheke wowo mpaka opochera ishaani olhupalhe o yeyo ikatema iyo, aathanlhiye ni uhikiya makhura matakatifu, vanohalha aya ukhwa.
26“Nansho yoyo ntu eevilhe uyo akhumaka iwani ittawelhenlhe awe ikatema iriyoothe ilhe, 27ni amuchi a ntu eeviye nkayanvara nari uchereshere miinano cho iwani inottawelhelhiya iyo, nkayaamwiiva, yoyo khanokhalha ni milhatu cho wiiva. 28Ukhalhawaya yoyo eevilhe uyo nothananiya wiira, akhalheke nhina iwani yo uttawelhelha mpaka opochera ishaani olhupalhe vanokhwa aya, nansho opochera ishaani olhupalhe ayo akhwaaka, nowooria uhokolhia uwannyawe.
29“Alha malhehero alha avarecheshiyeke ni iyari chinyu chonkhaye, vakittu variwoothe vanohalha inyu ukhalha.
30“Ntu riyoothe nomwiiva nkhunanawe, noohukumulhiya ukhwa, wo uhimiecheshiya ni attu eelhi ama upwaha. Ntu riyoothe khanooria uhukumulhiya ukhwa wo uhimiecheshiya ni ntu mmoka.
31“Nhipochere malhivo ariyoothe o wookholha ukumi wa ntu eevilhe variye wiira howonya, nkaahukumulhiya wiira eeviye, yoyo ntu uyo eeviyeke.
32“Nhipochere, mena nhirumelhelhe malhivo ariyoothe ukhuma wa ntu aattawenlhe ilhapo yo uttawelhelha, wiira ahiyereriye ahokolhie akhalhe uwannyawe, opochera ishaani olhupalhe ahinaaya ukhwa.
33“Mwapangaka chiicho ilhapo inokhalhacha inyu khinorumelhelhiya umihoolho wa Apwiiya Nlhuku. Iphome iriheelhe iyo, inoonyalhiha ilhapo, ni mena khiiwo isadaka inooria uttukuria ilhapo ipangelhiye milhatu cho wiiviya ntu, yaahikhalhe wo umwiiva ntu o wiiva uyo.
34“Nhipange ilhapo inokhalhacha inyu ihirumelhelhiye umihoolho waka, ilhapo inokhalha aka ni mii, ukhalhawaya mii Apwiiya Nlhuku kinokhalha mmilhokoni mwinyu mwaatti attu o Israeli.”
The Bible Version in Makua @The Word for The World International and Makua Language translators. All rights reserved.