Waalhakelhiya attu 34
34
Miinano cho ilhapo yo Ukanaani
1Yamalheke, Apwiiya Nlhuku nkayeerelha ashinna Musa wiira, 2“Mwaahimerieke attu o Israeli wiira, vanohalha inyu uphiya Ukanaani, ilhapo kuvahilhe akani ikhalhe yawinyu, miinano yo vakittu winyu vonkhaye inohalha ukhalha thoko chinottwara chi. 3Mpata wo uchawa, mwiinano inyu unohalha ukhalha ukhuma uthako wo Usini uvirelha mpata wo Uedomu. Uchokholheke unosha nchuwa mpata wo uchawa unomalhelha ibahari yo Maakha. 4Yamalhaka vavawo, uhapuwelheke mpata wo uchawa, urweeke mphitho wo Uakrabimu, ni uvirelha Usini mpaka Ukadesh Barnea, mpata wo uchawa. Ukhuma vavawo, mwiinano uhapuweke ukelheke mpata wo uchulhu uneelha nchuwa mpaka Uhasar Adari ni uvira mpaka Uazimoni. 5Ukhuma Uazimoni uhapuweke urweeke nshepa no Umisri vaari mwiinano wo Umisri ni umalhelha ibahari yo Umediteraniya.
6“Mpata uneelha nchuwa, mwiinano unohalha ukhalha ibahari yo Umediteraniya.
7“Mpata wo uchulhu mwiinano unohalha ukhalha thoko choo. Ukhuma ibahari yo Umediteraniya, mweesheke ialama mpaka mwaako wo Uhori. 8Ukhuma mwaako wo Uhori, mweesheke ialama mpaka niphitho no Uhamathi, ni urwaa mpaka Usedadi, 9ni uvira mpaka Uzifroni ni umalhelha Uhazar Enani, yoyo phi nohalha ukhalha mwiinano inyu wo uchulhu.
10“Mpata wo unosha nchuwa, mwiinano ukhalheke ukhuma Uhazar Enani mpaka Ushefamu. 11Ni ukhuma Ushefamu mwiinano urweeke mpata wo uchawa mpaka Uribula, mwiinano wo unosha nchuwa wo Uaini. Yamalhaka, mwiinano uyo urweeke vathi mpaka uhito, unosha nchuwa nthapwi no Ukinerethi. 12Wathamaka vavawo, mwiinano ukhuruweke ni uttwara mwoolhoko wo Uyordani mpaka Ibahari yo Maakha, ilha phi nohalha ukhalha ilhapo inyu thoko mwiinano chiri aya.”
13Paahi ashinna Musa nkayeerelha attu o Israeli wiira, “Ilha phi ilhapo inohalha ukhalha yawinyu wo upangiya mwaavi, ilhapo ilhehenre aya Apwiiya Nlhuku wiira avahiye makosho tisa ni nusu. 14Nikosho ni Narobeni ni Nagadi, ni inusu yo nikosho ni Namanase ahovahiya chittu chaya wo ulhikaana ni mahimo aya. 15Makosho meelhi ni nusu ayo ahohiyeriya ukhopelhelhe wo mwoolhoko wo Uyordani mpata unosha nchuwa, unowehana ni Uyeriko, unosha nchuwa.”
Aholhelhi o weemelhelha umianihiya ilhapo
16Yamalheke, Apwiiya Nlhuku nkayeerelha ashinna Musa wiira, 17“Opochera ishaani Naeliazari ni Nayoshua anaaya Nanuni phi nohalha waaminiahachera attu ilhapo ukhalha nhakhu aya. 18Tho, mwaakusheke nholhelhi mmokammoka o ukhuma kila nikosho o ukaviha ntheko wo umianiha ilhapo. 19Machina aya phi alha,
Nikosho ni Nayuda, akhalheke Nakalebu anaaya Nayefune. 20Ukhuma nikosho ni Nasimeoni, akhalheke Nashemueli anaaya Naamihudi. 21Ukhuma nikosho ni Nabenyamini, akhalheke Naelidadi anaaya Nakisiloni. 22Ukhuma nikosho ni Nadani, akhalheke Nabuki anaaya Nayogili. 23Ukhuma nikosho ni Namanase anaaya Nayusufu, akhalheke Nahanieli anaaya Naefodi. 24Ukhuma nikosho ni Naefraimu, anaaya Nayusufu, akhalheke Nakemueli anaaya Nashiftani. 25Ukhuma nikosho ni Nazabuloni, akhalheke Naelisafani anaaya Naparnaki. 26Ukhuma nikosho ni Naisakari, akhalheke Napaltieli anaaya Naazani. 27Ukhuma nikosho ni Naasheri, akhalheke Naahihudi anaaya Nashelomi. 28Ni ukhuma nikosho ni Naftali, akhalheke Napedaheli anaaya Naamihudi. 29Yayo phi attu Apwiiya Nlhuku alhehenre aya wiira, avare ntheko wa waamianihera attu o Israeli ilhapo yo Ukanaani, ukhalha nhakhu aya wo uhiyeriya.”
The Bible Version in Makua @The Word for The World International and Makua Language translators. All rights reserved.