Waalhakelhiya attu 36
36
Ilhapo yaahiyeriye achishaana ashithiyana a Naselofehadi
1Aholhelhi o imbumba cho nihimo ni Nagileadi, anaaya Namakiri, anaaya Namanase, anaaya Nayusufu, ahorwaa wolhumanani ashinna Musa ni ahoolhelhi akina o mahimo a attu o Israeli. 2Nkayeeracha wiira, “Athumwanihu, Apwiiya Nlhuku ahoulheherani wiira mwaakawelhe attu o Israeli ilhapo wo upanga mwaavi, ukhalha nhakhu aya wo uhiyeriya, tho, ahoulheherani wiira mwaavahe achishaana ashithiyana a alhoko ihu Naselofehadi, ilhapo ihiyeriye aya ni athumwanaya. 3Nansho yayo avekiyaka ni attu o Israeli o makosho makina, ilhapo aya yo uhiyeriya inoothama uwanihu ni urwaa wa attu o makosho makina, paahi etu ilhapo ihu yo uhiyeriya inoowukuwa. 4Nihuku no isikukuu yo wuupusheriya iyaakha yo makhumi nthanu, mihakhu chithumihiye vanohokolhoshiya aya wa mwanene aathumihilhe uyo, paahi etu, ilhapo ihiyeriye aya achishaana ashithiyana a Naselofehadi iyo inookushiya uthelhiye aya uwo, ni nikosho nihu khaninowa naapatta yeyo ilhapo iyo tho.”
5Paahi, ashinna Musa nkayaahimeria attu o Israeli malhehero anottwara o ukhuma wa Apwiiya Nlhuku alha, yeeraka wiira, “Attu o nikosho ni Nayusufu, ahoolhumacha ikekheene. 6Ni phi chiichammo chilheheriye aya ni Apwiiya Nlhuku, vanaacha achishaana ashithiyana a Naselofehadi, ahohiyereriya wiira avekiyeke ni ntu riyoothe anonthanana aya, nansho avekiyeke ni ntu o imbumba aya, 7ikhalhe wiira nhakhu wa attu o Israeli uhithamihiye urwaa nikosho nikina, kila ntu o Israeli avarelheke ilhapo ihiyeriye imbumba awe. 8Kila nthiyana riyoothe ri ni ilhapo yo uhiyeriya, munlhokoni mwo makosho a attu o Israeli, avekiyeke ni ntu o imbumba awe, wiira kila ntu o Israeli akhalheke ilhapo ya manyaapwiiya awe. 9Wo chiichammo etu, khunowa waakhalha ilhapo yo uhiyeriya iriyoothe, inohalha ukushiya ukhuma nikosho nimoka urwaa nikosho nikina. Kila nikosho no attu o Israeli nivarelhelheke ilhapo aya yo uhiyeriya.”
10Achishaana ashithiyana a Naselofehadi ahopangacha thoko Apwiiya Nlhuku chaalhehenre aya ashinna Musa. 11Onkhaye, Namala, Natirza, Nahogla, Namilka ni Nanoa nkayaavekachiya ni achishaana a manyaathumwanaya olhupalhe ni akani. 12Aavekachiye ni ashilhoko aya o imbumba chi Namanase, anaaya Nayusufu, ni ilhapo aya yo uhiyeriya yahohalha u nikoshoni wa athumwanaya.
13Alha etu phi malhehero ni malheheriyo aakumihilhe aya Apwiiya Nlhuku waavaha attu o Israeli wo iphiro ya ashinna Musa, umatimbeni wo ilhapo yo Umoabu, ukhopelhelhe wo mwoolhoko wo Uyordani, vakhiviru ni iwani yo Uyeriko.
The Bible Version in Makua @The Word for The World International and Makua Language translators. All rights reserved.